தேர்வு அறையை கண்காணிக்க 4 ஆயிரம் பேர் கொண்ட பறக்கும் படை

தேர்வுக் கால கண்காணிப்புக்காக மாவட்ட ஆட்சியர் தலைமையில் மாவட்டத் தேர்வுக் குழு அமைக்கப்பட்டுள்ளது. இவர்கள் கல்வித்துறை அதிகாரிகளுடன் இணைந்து செயல்படுவார்கள். இதில், மாவட்ட காவல் கண்காணிப்பாளர், வருவாய் அலுவலர், சார் ஆட்சியர், வருவாய் கோட்டாட்சியர் உள்ளிட்டோர் இடம் பெற்றுள்ளனர்.

மேலும், தேர்வு மையங்களில் ஆய்வு செய்வதற்காக சுமார் 4 ஆயிரம் பேர் கொண்ட பறக்கும் படை, நிலையான படைகள் ஆகியன முதன்மைக் கல்வி அலுவலர்களால் நியமிக்கப்பட்டுள்ளன.

மாணவர்கள் தேர்வு மைய வளாகத்துக்குள் செல்லிடப்பேசியை எடுத்து வருவது தடை செய்யப்பட்டுள்ளது. தேர்வுப் பணியில் ஈடுபடும் ஆசிரியர்களும் தேர்வு அறையில் செல்லிடப்பேசியை வைத்திருக்கத் தடை விதிக்கப்பட்டுள்ளது.

இந்த உத்தரவுகளை மீறி, தகவல் தொடர்பு சாதனங்களை வைத்திருக்கும் மாணவர்கள், ஆசிரியர்களுக்கு கடுமையான தண்டனை வழங்கப்படும் என்று தேர்வுத் துறை எச்சரித்துள்ளது.

அதேபோல், துண்டுத் தாள் (பிட்) வைத்திருத்தல், பிற மாணவர்களைப் பார்த்து எழுதுதல், விடைத்தாள் மாற்றம் செய்தல், ஆள்மாறாட்டம் போன்ற ஒழுங்கீனங்கள், முறைகேடுகளுக்கு கடுமையான தண்டனை வழங்கப்படும்.

ஒழுங்கீனச் செயல்களுக்கு உடந்தையாகவும், அதை ஊக்குவிக்கும் விதமாகவும் பள்ளி நிர்வாகம் செயல்பட்டால், பள்ளியின் தேர்வு மையத்தை ரத்து செய்யவும், பள்ளியின் அங்கீகாரத்தை ரத்து செய்யவும் பள்ளிக் கல்வித் துறை இயக்குநருக்குப் பரிந்துரைக்கப்படும் என்று அரசுத் தேர்வுத் துறை எச்சரித்துள்ளது.