ஆந்திராவில் சாலையில் லாரி கவிழ்ந்து விபத்து: 18 பேர் பலி; 17 பேர் காயம்

ஆந்திர மாநிலத்தில் குண்டெப்பள்ளி என்ற இடத்தில் சாம்பல் ஏற்றிச் சென்ற லாரி சாலையில் கவிழ்ந்து விபத்துக்குள்ளானதில் 18 தொழிலாளர்கள் பரிதாபமாக உயிரிழந்தனர். 17 பேர் காயமடைந்தனர்.

ஆந்திர மாநிலம் கிழக்கு கோதாவரி மாவட்டம் விஜயவாடாவிலிருந்து விசாகபட்டிணத்திற்கு சாம்பல் ஏற்றிச் சென்ற லாரி குண்டெப்பள்ளி அருகே சாலையின் வளைவில் திரும்பும் போது ஓட்டுநரின் கட்டுப்பாட்டை இழந்து கவிழ்ந்து விபத்துக்குள்ளானது.

இதில் டிரக்கில் வந்த 18 தொழிலாளர்கள் பலியாயினர். காயமடைந்த 17 பேர் ராஜமுந்தரி மருத்துவமனையில் சிகிச்சைக்காக அனுமதிக்கப்பட்டுள்ளனர். இதில் 8 பேரின் நிலைமை கவலைக்கிடமாக இருப்பதாக காவல்துறையினர் தெரிவித்துள்ளனர்.

எலுரு அருகே வேலை செய்து விட்டு தங்களது சொந்த கிராமங்களுக்குத் திரும்ப 30க்கும் மேற்பட்ட தொழிலாளர்கள் சாலையில் சென்ற லாரியை வழி நிறுத்தி ஏறியுள்ளனர் என்றும், இவர்கள் அனைவரும் 35 - 45 வயது மதிக்கத்தக்கவர்கள் என்றும் தெரிய வந்துள்ளது.