மத்திய அரசு ஊழியர்களுக்கு இனி மிகை ஊதியம் இல்லை

மத்திய அரசு பணியாளர்கள் கூடுதல் நேரம் பணியாற்றும்போது வழங்கப்படும் மிகை ஊதியத்தை ரத்து செய்ய முடிவு செய்யப்பட்டுள்ளதாக மத்திய பணியாளர் நலத்துறை அமைச்சகம் தெரிவித்துள்ளது.
அதே சமயம், தொழிற்சாலை ஊழியர்களுக்கு வழங்கப்படும் மிகை ஊதியம் ரத்து செய்யப்பட மாட்டாது என தெரிவிக்கப்பட்டுள்ளது.
கடந்த சில ஆண்டுகளாக ஊதியத்தை மத்திய அரசு அதிகரித்து வழங்கி வருவதால், மிகை ஊதியத்தை ரத்து செய்யலாம் என்ற 7-ஆவது ஊதியக் குழுவின் பரிந்துரை ஏற்றுக் கொள்ளப்பட்டதாக மத்திய செலவினங்கள் துறை விளக்கம் அளித்துள்ளது.
மத்திய அரசின் கீழ் வரும் அனைத்து அமைச்சகம், துறைகள் மற்றும் சார்பு அலுவலகங்களிலும் இந்த ஊதிய ரத்து நடவடிக்கையை செயல்படுத்த முடிவெடுக்கப்பட்டுள்ளது.
அதே சமயம், தொழிற்சாலை பணியாளர்கள் என வரையறைக்குள் வரும் பணியாளர்களை பட்டியலிடுமாறு அனைத்து அமைச்சகங்கள் மற்றும் அரசுத் துறைகளுக்கு அறிவுறுத்தப்பட்டுள்ளது.
தொழிற்சாலை ஊழியர்களுக்கு வழங்கப்படும் மிகை ஊதிய முறையை பயோமெட்ரிக் வருகைப்பதிவுடன் இணைக்கவும் திட்டமிடப்பட்டுள்ளது.
மேலும், மிகை ஊதியத்தின் அளவை, மூத்த அதிகாரிகளின் பரிந்துரையின் அடிப்படையில் நிர்ணயிக்கும் முந்தைய முடிவில் எவ்வித மாற்றமும் செய்வதில்லை என அரசு முடிவெடுத்துள்ளது.