திருவனந்தபுரம்: பிரபல சமூக வலைத்தளமான முகநூலை கேரளத்துப் பெண் ஒருவர் திருமண சேவைத்தளமாக மாற்றியுள்ள சம்பவம் அனைவருக்கும் ஆச்சர்யத்தினை ஏற்படுத்தியுள்ளது
உலகின் பிரபல சமூக வலைத்தளங்களுள் ஒன்றாக முகநூல் விளங்குகிறது, இதன்மூலம் நாம் நமது நண்பர்களுடன் தொடர்பில் இருக்கலாம். அதனைப் பயன்படுத்தி வீடியோக்கள் மற்றும் புகைப்படங்கள் பகிர்ந்து கொள்ளுதல் மற்றும் தகவல்களை அறிந்து கொள்ளல் உள்ளிட்ட விஷயங்களை அனைவரும் செய்து வருகிறாரகள்.
இந்நிலையில் முகநூலை கேரளத்துப் பெண் ஒருவர் திருமண சேவைத்தளமாக மாற்றியுள்ள சம்பவம் அனைவருக்கும் ஆச்சர்யத்தினை ஏற்படுத்தியுள்ளது.
கேரள மாநிலம் மலப்புரத்தில் வசித்து வருபவர் ஜோதி, இவர் தனது முகநூல் பக்கத்தில் கடந்த மாதம் ஏப்ரல் 26-ஆம் தேதி அன்று ஒரு பதிவிட்டுள்ளார். அதில் அவர் கூறியுள்ளதாவது:
எனது பெயர் ஜோதி. வயது 28. எனக்கு பெற்றோர் கிடையாது. பேஷன் டிசைனிங் படித்து முடித்துள்ள எனக்கு ஒரு நல்ல வாழ்க்கை துணை வேண்டும். நண்பர்களே, உங்களுக்குத் தெரிந்தவர்கள் யாரேனும் இருந்தால் என்னைத் தொடர்பு கொண்டு தெரியப்படுத்துங்கள்.
எனக்கு பொதுவாகவே ஜோதிடம் மற்றும் ஜாதி உள்ளிட்ட விஷ்யங்களில் நமபிக்கை இல்லை. இவைகளை நான் பார்ப்பதூவும் இல்லை.
இவ்வாறு தெரிவித்துள்ள இவர் தனது பதிவில் தனது அண்ணன் மற்றும் சகோதரி ஆகியோரின் படிப்பு, அவர்கள் செய்யும் வேலை முதலான விஷயங்களையும் குறிப்பிட்டுள்ளார். இவரது இந்த திருமண வேண்டுகோள் பதிவானது இதுவரை 6,000 தடவைகளுக்கு மேல் பகிரப்பட்டுள்ளது.
அத்துடன் முகநூல் நிறுவனரான மார்க் ஸூக்கர்பெர்க்குக்கும் ஜோதி ஒரு வேண்டுகோள் விடுத்துள்ளார். அதில் என்னைப் போன்றவர்கள் தங்களது வாழ்க்கை துணையை தேடிக்கொள்வதற்கு உதவியாக நீங்கள் 'பேஸ்புக் மேட்ரிமோனி' என்ற வசதியை ஏற்படுத்திக்கொடுக்க வேண்டும்' என்று அவர் கேட்டுக் கொண்டுள்ளார்.