மாவோயிஸ்ட் தலைவர் சரண்

3 மாநிலங்களில் போலீஸாரால் தேடப்பட்டு வந்த மாவோயிஸ்ட் தலைவர் கமலேஷ் காஞ்சு வியாழக்கிழமை போலீஸில் சரணடைந்தார். 
பிகார்-சத்தீஸ்கர்-ஜார்க்கண்ட் ஆகிய 3 மாநிலங்களின் மாவோயிஸ்ட் குழு தலைவராக இருந்த கமலேஷ் காஞ்சு என்னும் பிர்சை ஜி, ஜார்க்கண்ட் மாநிலத்தின் பலமாவ் பிரிவு காவல் துறை அதிகாரிகள் மனோஜ் குமார் ஜா மற்றும் விபுல் சுக்லா முன்பு சரணடைந்தார்.
3 மாநிலங்களிலும் 100-க்கும் மேற்பட்ட வழக்குகள் அவர் மீது பதிவு செய்யப்பட்டுள்ளதால் போலீஸார் அவரை தேடி வந்தனர். அதையடுத்து அவரை ஒப்படைப்பவருக்கு ரூ. 25 லட்சம் பரிசு என போலீஸார் அறிவித்திருந்தனர். இந்த நிலையில் வியாழக்கிழமை அவர் சரணடைந்தார்.
இதுகுறித்து காவல் துறை அதிகாரி ஒருவர் கூறுகையில், பெல்காடா கிராமத்தைச் சேர்ந்த கமலேஷ், பல நக்ஸல் தீவிரவாத குழுவினருடன் தொடர்பில் இருந்தார். அவர் 12 வயதிலேயே நக்ஸல் குழுவினருடன் இணைந்து விட்டார். 3 மாநிலங்களிலும் நடந்த பல தீவிரவாத நடவடிக்கைகளில் அவருக்கு தொடர்பு உண்டு என்றனர்.
நக்ஸலில் இணைந்தது குறித்து கமலேஷ் கூறுகையில், ஆதிவாசி சமூகத்தினரை மக்கள் இழிவாகப் பார்த்தனர். அது தான் என்னை நக்ஸல் குழுவினருடன் சேர வைத்தது. நான் தெரியாமல் தான் அவர்களுடன் இணைந்தேன். அவர்களுக்கு கடிதம் பரிமாறவும், பொருள்களை பரிமாறிக் கொள்ளவும் என்னைப் பயன்படுத்திக் கொண்டனர். எனது குடும்பத்தினரை பாதுகாக்கும் கடமை உள்ளதால் தற்போது போலீஸாரிடம் சரணடைந்தேன். எனது சமூகத்தினர் குறித்து வெளி உலகத்துக்கு தெரியப்படுத்தும் நோக்கில் சரணடைந்தேன் என்றார்.