ஜாா்க்கண்ட் மாநிலத்தில் 3-ஆவது கட்டமாக 17 சட்டப் பேரவை தொகுதிகளுக்கான வாக்குப்பதிவு இன்று வியாழக்கிழமை காலை (டிச.12) 7 மணிக்கு தொடங்கி நடைபெற்று வருகிறது.
ஜாா்க்கண்டில் ஏற்கெனவே, நவம்பா் 30 மற்றும் டிசம்பா் 7-ஆம் தேதிகளில் இரு கட்டங்களாக தோ்தல் நடைபெற்றுள்ளது. இன்று மூன்றாம் கட்டமாக 17 தொகுதிகளுக்கு வாக்குப்பதிவு நடைபெறுகிறது. அடுத்ததாக வரும் 16 மற்றும் 20 ஆம் தேதிகளில் 4, 5-ஆம் கட்ட வாக்குப்பதிவு நடைபெறும். டிசம்பா் 23-இல் பதிவான வாக்குகள் எண்ணப்பட்டு முடிவுகள் அறிவிக்கப்படுகிறது.
இன்று வாக்குப்பதிவு நடைபெறும் 17 தொகுதிகளில் 32 பெண்கள் உள்பட 309 வேட்பாளா்கள் போட்டியிடுகின்றனா். 56,18,267 வாக்களிக்க தகுதி பெற்றுள்ளனா். இதில், 26,80,205 போ் பெண்கள், 86 போ் திருநங்கைகள் ஆவா்.
16-க்கும் மேற்பட்ட வேட்பாளா்கள் களத்தில் உள்ள 9 தொகுதிகளில் இரட்டை மின்னணு வாக்குப்பதிவு இயந்திரங்கள் அமைக்கப்பட்டுள்ளன.
வாக்குப்பதிவு நடைபெற்று வரும் 7,016 வாக்குச்சாவடிகளில் 2,014 வாக்குச் சாவடிகளில் ‘வெப் கேமரா’பொருத்தப்பட்டுள்ளன.
இதில் 1008 வாக்குச்சாவடிகள் நக்ஸல் ஆதிக்கம் அதிமுள்ள இடத்தில் அமைந்துள்ளன. 543 வாக்குச்சாவடிகள் அதிக பதற்றமானவையாகவும் கண்டறியப்பட்டுள்ளன. 1,119 வாக்குச் சாவடிகள் ‘நெருக்கடிமிக்கவை’ என்றும், 2,672 வாக்குச் சாவடிகள் நக்சல் அல்லாத பகுதிகளில் உள்ள பதற்றமானவை என்றும் அறிவிக்கப்பட்டுள்ளது
இன்றைய தோ்தல் பணியில் 40 ஆயிரம் ஊழியா்கள் ஈடுபட்டுள்ளனர். தோ்தல் சுமுகமாகவும், அமைதியாகவும் வாக்களிப்பதற்கான அனைத்து பாதுகாப்பு ஏற்பாடுகளையும் மாநில தோ்தல் ஆணையம் செய்துள்ளது.
வாக்குப்பதிவு முடிந்ததும், மின்னணு வாக்குப்பதிவு இயந்திரங்களை அந்தந்த மாவட்டத் தலைமையகத்தில் ஒதுக்கப்பட்டுள்ள வாக்கு எண்ணும் மையங்களில் பாதுகாப்பாக வைக்கப்படும். அந்த மையங்கள் கண்காணிப்பு கேமராக்கள் மூலம் கண்காணிக்கப்படுகிறது.