உத்தவ் தாக்கரே தோ்தலில் போட்டியிட்டிருக்க வேண்டும்

மகாராஷ்டிர சட்டமேலவை உறுப்பினராக நியமிக்குமாறு ஆளுநருக்கு அழுத்தம் அளிக்காமல், மாநில முதல்வா் உத்தவ் தாக்கரே மேலவைக்கான தோ்தலில் போட்டியிட்டிருக்க வேண்டும் என்று அந்த மாநில பாஜக தலைவா் சந்திரகாந்த் பாட்டீல் தெரிவித்தாா்.

மகாராஷ்டிரத்தில் ஆட்சியமைத்த சிவசேனை-தேசியவாத காங்கிரஸ்-காங்கிரஸ் கூட்டணி அரசின் முதல்வராக சிவசேனை கட்சித் தலைவா் உத்தவ் தாக்கரே கடந்த ஆண்டு நவம்பா் 28-ஆம் தேதி பதவியேற்றாா். எனினும், அவா் மாநில சட்டப்பேரவையின் உறுப்பினராக இல்லாததால், 6 மாதங்களுக்குள் சட்டப்பேரவை அல்லது சட்டமேலவையின் உறுப்பினராக வேண்டிய கட்டாயம் ஏற்பட்டது.

அவருக்கான 6 மாத அவகாசம் மே மாதம் 28-ஆம் தேதியுடன் நிறைவடையவுள்ள சூழலில், உத்தவ் தாக்கரேவை மாநில சட்டமேலவை உறுப்பினராக நியமிக்குமாறு ஆளுநா் பகத் சிங் கோஷியாரிக்கு மாநில அமைச்சரவை அண்மையில் பரிந்துரை அனுப்பியிருந்தது. எனினும், அது தொடா்பாக ஆளுநா் இதுவரை எந்த முடிவும் எடுக்கவில்லை.

இந்தச் சூழலில், மாநில பாஜக தலைவா் சந்திரகாந்த் பாட்டீல் மும்பையில் செய்தியாளா்களிடம் புதன்கிழமை கூறுகையில், ‘‘ஆளுநருக்கு அளிக்கப்பட்டுள்ள ஒதுக்கீட்டின் கீழ் உத்தவ் தாக்கரே சட்ட மேலவை உறுப்பினராக நியமிக்கப்படுவதை பாஜக எதிா்க்கவில்லை. ஆனால், கரோனா நோய்த்தொற்றால் இக்கட்டான சூழல் ஏற்பட்டுள்ள நிலையில், உத்தவ் தாக்கரேவை மேலவை உறுப்பினராக நியமிக்குமாறு ஆளுநருக்கு அழுத்தமளிப்பது முறையல்ல.

அவருக்கு மே மாதம் 27-ஆம் தேதி வரை அவகாசம் உள்ளது. அதுவரை அவா் காத்திருக்கலாம். சட்ட மேலவைக்கு நடைபெற்ற தோ்தலில் உத்தவ் தாக்கரே போட்டியிட்டிருக்கலாம். ஆனால், சிவசேனை-தேசியவாத காங்கிரஸ்-காங்கிரஸ் கூட்டணி அரசு தற்போது இந்த விவகாரத்தை அரசியலாக்கி வருகிறது’’ என்றாா்.