ராமர் கோவில் பூமி பூஜை விழாவுக்கு உத்தவ் தாக்கரே கண்டிப்பாக செல்வார்: சஞ்சய் ராவத்

அயோத்தியில் ராமர் கோயில் அடிக்கல் நாட்டு விழாவுக்கு மகாராஷ்டிர முதல்வர் உத்தவ் தாக்கரே கண்டிப்பாக செல்வார் என கட்சியின் எம்.பி. சஞ்சய் ராவத் தெரிவித்துள்ளார்.

அயோத்தியில் ராமர் கோவில் கட்டுமானப் பணிக்கு அடிக்கல் நாட்டும் நிகழ்வு வருகிற ஆகஸ்ட் 5 ஆம் தேதி நடைபெற உள்ளது. ராமர் கோவில் 'பூமி பூஜை' விழாவில் பிரதமர் நரேந்திர மோடி கலந்துகொள்வார் என்றும் தகவல் வெளியாகியுள்ளது. 

மேலும், இவ்விழாவிற்கு பல முக்கிய அரசியல் தலைவர்களும் அழைக்கப்படுவார்கள் என்று தெரிகிறது. 

இதையடுத்து, ராமர் கோயில் பூமி பூஜைக்கு மகாராஷ்டிர முதல்வர் உத்தவ் தாக்கரே கண்டிப்பாக செல்வார், ஏனென்றால் சிவசேனை கட்சி உணர்வுப்பூர்வமாக இந்த விவகாரத்துடன் தொடர்புடையது என கட்சியின் எம்.பி. சஞ்சய் ராவத் தெரிவித்துள்ளார். மேலும் அயோத்தியில் ராமர் கோயில் அமைக்க சிவசேனையும் உழைத்துள்ளது என்று கூறிய அவர், கரோனா பரவல் இல்லையெனில் லட்சக்கணக்கான மக்கள் இவ்விழாவிற்கு வருகை தருவார்கள் என்றும் தெரிவித்தார். 

எனினும், ராமர் கோவில் பூமி பூஜை விழாவில் கலந்து கொள்பவர்கள் சமூக இடைவெளியினை கடைபிடிக்க வேண்டும் என்றும் வலியுறுத்தினார்.