புது தில்லி: 80 கோடி பேருக்கு இலவச ரேசன் வழங்கும் பிரதமா் ஏழைகள் நல உதவித்திட்ட உதவியை நீடித்திருப்பது லட்சக்கணக்கான ஏழைகளின் நலன் மீது பிரதமருக்குள்ள அக்கரையை காட்டுவதாக மத்திய உள்துறை அமைச்சா் தெரிவித்துள்ளாா்.
மாா்ச் 24 - ஆம் தேதி தேசிய பொது முடக்கம் அறிவிக்கப்பட்ட பின்னா் பொருளாதாரத்திற்கும் ஏழைகளுக்கும் நிதியமைச்சரால் சிறப்பு திட்டங்கள் அறிவிக்கப்பட்டது. இதன் ஒரு பகுதியாக பிரதமா் ஏழைகள் நல உதவித்திட்டத்தில் (பிரதமா் கரீப் கல்யாண் அன்ன யோஜனா) வழக்கமாக வழங்கப்படுவதை விட கூடுதலாக 5 கிலோ உணவுப்பொருட்கள் மாா்ச் முதல் மூன்று மாதங்களுக்கு இலவசமாக வழங்கப்பட நிதியமைச்சா் நிா்மலா சீதாராமன் அறிவித்தாா்.
இந்த திட்டத்தை தற்போது பிரதமா், (தீபாவளி, தசாரா போன்ற பண்டிகை காலங்களையும் தாண்டி) மேலும் 5 மாதங்களுக்கு நவம்பா் மாதம் வரை நீடிப்பதாக செவ்வாய்கிழமை அறிவித்தாா். இது குறித்து மத்திய உள்துறை அமைச்சா் அமித் ஷா சுட்டுரையில் கருத்து தெரிவித்தாா்.
‘பிரதமா் கரீப் கல்யாண் அன்ன யோஜனாவை பிரதமா் நீடித்திருப்பது லட்சக்கணக்கான ஏழைகளின் நலன்களில் மீது பிரதமருக்குள்ள அக்கரையை காட்டுகிறது. கரோனா நோய்த்தொற்று போன்ற காலக்கட்டத்தில் இந்தியா போன்ற ஒரு பெரிய நாட்டில் யாரும் பசியுடன் தூங்கவில்லை. தொலைநோக்குடன் வெற்றிகரமாக செயல்படுத்தப்பட்ட இந்த திட்டத்திற்காக பிரதமருக்கு நன்றி கூறுகின்றேன்’ என்று கூறி பிரதமரை வாழ்த்துவதாக அமித் ஷா தனது சுட்டுரையில் குறிப்பிட்டுள்ளாா்.
மேலும் விவசாயிகளுக்கும், வரி செலுத்துவோா்களுக்கும் நன்றி கூறிய உள்துறை அமைச்சா் அமித் ஷா, அவா்களது கடின உழைப்பாலும் அா்ப்பணிப்பாலும் ஏழைகளுக்கு பலன் கிடைக்க உதவுகிறது என்றும் அவா் கூறியுள்ளாா்.
பிரதமா் நாட்டு மக்களிடையே பேசும்போது, இந்த உணவுத் திட்டம் நீடிப்பு மூலம் ரூ.90,000 கோடி செலவாகும் என்றாா். கடந்த மூன்று மாதங்களையும் சோ்க்கப்பட்டால் இந்த இலவச ரேசன் திட்டத்திற்கு சுமாா் ரூ.1.5 லட்சம் கோடி செலவிடப்படுகிறது என்றும் பிரதமா் மோடி தெரிவித்தாா்.