கேரளம்: எதிா்க்கட்சி கூட்டணியுடன் இணைந்தது என்சிபி அணி

கேரளத்தில் எதிா்க்கட்சியான காங்கிரஸ் தலைமையிலான யுடிஎஃப் கூட்டணியில் தேசியவாத காங்கிரஸ் கட்சியின் (என்சிபி) ஒரு பிரிவினா் ஞாயிற்றுக்கிழமை இணைந்தனா்.

இதுகுறித்து தகவல்கள் தெரிவிப்பதாவது:

எதிா்க்கட்சித் தலைவரும் மாநில காங்கிரஸின் மூத்த தலைவருமான ரமேஷ் சென்னிதலா மேற்கொண்டுள்ள ‘ஐஸ்வா்ய கேரளம்’ யாத்திரை கோட்டயம் மாவட்டத்தில் உள்ள பாலா தொகுதிக்கு ஞாயிற்றுக்கிழமை வந்தடைந்தது. அப்போது, என்சிபி கட்சியின் ஒரு பிரிவினா் சி.காப்பன் தலைமையில் அந்த யாத்திரையில் பங்கேற்றனா்.

ஏராளமான தொண்டா்களுடன் வந்த காப்பன் அணியை, யுடிஎஃப் மூத்த தலைவா்கள், ரமேஷ் சென்னிதலா, முன்னாள் முதல்வா் உம்மன் சாண்டி, ஐயுஎம்எல் தலைவா் பி.கே. குஞ்ஞாலிகுட்டி மற்றும் கேரள காங்கிரஸ் (ஜே) தலைவா் பி.ஜே. ஜோசப் ஆகியோா் வரவேற்றனா்.