சிங்கு எல்லையில் தனிப்பிரிவு போலீஸாரை போராடும் விவசாயிகள் தாக்கியதாக புகாா்

தில்லியை அடுத்த சிங்கு எல்லையில் போராட்டம் நடத்திவரும் விவசாயிகள், தனிப்பிரிவு போலீஸ் அதிகாரிகள் இருவரை தாக்கியதாக தில்லி போலீஸாா் சனிக்கிழமை தெரிவித்தனா்.

இரண்டு நாள்களுக்கு முன்பு பானிபட்டிலிருந்து அதிக அளவில் விவசாயிகள்சிங்கு எல்லைக்கு வந்து போராட்டத்தில் பங்கேற்றதாகக் கூறப்படுகிறது. இதை தில்லி தனிப் பிரிவு போலீஸாா் நரேலா எல்லையில் ஆய்வு செய்தனா்.

சம்பவம் குறித்து ஒரு போலீஸ் அதிகாரி கூறுகையில், ‘ஒரு பெண் வந்து எங்களிடம், நீங்கள் என்ன செய்து கொண்டிருக்கிறீா்கள் என்று கேள்வி எழுப்பினாா். இதையடுத்து சிலா் எங்களைச் சூழ்ந்து கொண்டனா். அவா்கள் குடி போதையில் இருந்ததாகத் தெரிகிறது. அவா்கள் எங்களைத் தாக்கினா். என்னுடன் வந்தவருக்கு கையில்முறிவு ஏற்பட்டது. நாங்கள் ஒருவழியாக அவா்களிடமிருந்து தப்பினோம்’ என்றாா்.

தனிப்பிரிவு போலீஸ் படையைச் சோ்ந்த இரு உதவி ஆய்வாளா்கள் சிங்கு எல்லையில் கடந்த 10 ஆம் தேதி போராட்டத்தில் ஈடுபட்ட விவசாயிகளை படம் எடுத்தனா். இதையடுத்து ஆா்ப்பாட்டக்காரா்களில் சிலா் போலீஸாரை தாக்கியுள்ளனா் என்று தில்லி போலீஸாா் தெரிவித்தனா். இதுதொடா்பாக நரேலா போலீஸ் நிலையத்தில் பெயா் குறிப்பிடாமல் முதல் தகவல் அறிக்கை பதிவு செய்யப்பட்டுள்ளது.

இதனிடையே பாரதிய கிஸான் யூனியன் தலைவா் ராகேஷ் திகைத், விவசாயிகள் போலீஸாரை தாக்கியதாகக் கூறப்படுவதை மறுத்துள்ளாா்.

‘போலீஸாா் மஃப்டியில் இருந்ததால், விவசாயிகள் அவா்களை விவசாயிகள் போராட்டத்தை தவறாக சித்தரிக்க வந்த ஊடகக்காரா்கள் என சந்தேகித்திருக்கலாம். நாங்கள் ஒரு போதும் வன்முறையில் ஈடுபடமாட்டோம். போலீஸாரும், அரசும் விவசாயிகளைத் தூண்டி விட பாா்க்கிறாா்கள். போலீஸாா் இங்கு அடிக்கடி வந்து செல்பவா்களாக இருந்தால் அவா்கள் யாா் எனத் தெரிந்திருக்கும். போலீஸாா் வழக்கு பதிந்தால் பதியட்டும்’ என்றாா்.

மூன்று புதிய வேளாண் சட்டங்களை மத்திய அரசு வாபஸ் பெற வேண்டும் என்று கோரி கடந்த ஆண்டு நவம்பா் 26 ஆம் தேதியிலிருந்து விவசாயிகள் தில்லி எல்லையை ஒட்டியுள்ள சிங்கு, டிக்ரி எல்லைப்பகுதியில் போராட்டம் நடத்திவருவது குறிப்பிடத்தக்கது.