"ரயில்வே திட்டங்களில் தமிழகம் புறக்கணிப்பு '

தமிழகத்தின் பெரும்பான்மை ரயில்வே திட்டங்களை மத்திய அரசு புறக்கணித்துவிட்டதாக மக்களவையில் தருமபுரி தொகுதி உறுப்பினர் டி. என்.வி.செந்தில்குமார் குற்றம்சாட்டியுள்ளார்.
 மக்களவையில் ரயில்வே துறை மீதான மானியக் கோரிக்கைகள் விவாதத்தின்போது அவர் கூறியதாவது:
 தமிழகத்தில் 10 ரயில் பாதைத் திட்டங்கள் நிறைவேற்றப்படும் என்று மத்திய ரயில்வே துறை உறுதி அளித்திருந்தது. அதில், முக்கியமானது சென்னை மாமல்லபுரம் - கடலூர் ரயில் பாதை திட்டம், திண்டிவனம்-நகரி இடையே விழுப்புரம், வேலூர், திருவண்ணாமலை, திருவள்ளூர் , சித்தூர் ஆகிய நகரங்களை இணைக்கும் புதிய ரயில் பாதைத் திட்டம் என தமிழகத்தை முன்னேற்றச் செய்யும் முக்கிய ரயில் பாதைகளுக்கான திட்டங்கள் அறிவிக்கப்பட்டிருந்தன. இந்தத் திட்டங்களில் எந்தவிதமான முன்னேற்றமும் இல்லாமல் முடக்கப்பட்டுள்ளது.
 மேலும், தருமபுரி ரயில் நிலையத்துக்கு வரும் ரயில்கள் அனைத்தும் 2-ஆவது நடைமேடையில் நிறுத்தப்படுகின்றன. பொதுமக்கள் வசதிக்காக நடைமேடை ஒன்றில் நிறுத்தப்பட வேண்டும் அல்லது தானியங்கி படி அமைத்துத் தர வேண்டும் என்றார்.