கரோனா தடுப்பூசியிலிருந்து தப்பிக்க ஆற்றில் குதித்த கிராமத்தினர்

அயோத்தியா: உத்தரப்பிரதேச மாநிலம் பாராபாங்கி மாவட்டத்தில் உள்ள கிராம மக்களுக்கு கரோனா தடுப்பூசி போட வந்த சுகாதாரத் துறையினரைப் பார்த்த மக்கள், தடுப்பூசி போட்டுக் கொள்வதில் இருந்து தப்பிக்க ஆற்றில் குதித்துள்ளனர்.

கிராம மக்களிடையே விஷ ஊசி செலுத்தப்போவதாக புரளி பரவியதாகவும், அப்போது கரோனா தடுப்பூசி செலுத்த வந்த சுகாதார ஊழியர்களைப் பார்த்த ஊர் மக்கள் பலரும், தடுப்பூசி செலுத்திக் கொள்வதில் இருந்து தப்பிக்க சரயு ஆற்றில் குதித்ததாகவும் தகவல்கள் தெரிவிக்கின்றன.

சிசௌடியா கிராமத்தில் நடந்த சம்பவம் குறித்து சுகாதாரத் துறையினர் கூறுகையில், கிராமத்தினருக்கு கரோனா தடுப்பூசி செலுத்த கிராமத்துக்குள் நுழைந்ததும், எங்களைப் பார்த்த கிராமத்தினர் அலறி அடித்துக் கொண்டு ஓட்டம் பிடித்தனர். அவர்களை தடுத்து நிறுத்த நாங்கள் முயன்றும், அவர்கள் ஓடிச் சென்று ஆற்றில் குதித்துவிட்டனர். அவர்களுக்கு கரோனா தடுப்பூசி குறித்து எவ்வளவு எடுத்துச் சொல்லியும் அவர்கள் யாரும் தடுப்பூசி போட்டுக் கொள்ள முன்வரவில்லை. இறுதியாக 14 பேர் தடுப்பூசி போட்டுக் கொள்ள முன்வந்தனர் என்று கூறினர்.