செமிகன்டெக்டருக்கு பற்றாக்குறை: பயணிகள் வாகன விற்பனையில் மந்த நிலை

செமிகன்டெக்டருக்கான பற்றாக்குறையின் எதிரொலியால் பயணிகள் வாகன விற்பனை கடந்த அக்டோபா் மாதத்தில் 27 சதவீதம் சரிவடைந்துள்ளதாக இந்திய மோட்டாா் வாகன தயாரிப்பாளா்கள் சங்கம் (சியாம்) தெரிவித்துள்ளது.

இதுகுறித்து அந்த சங்கம் மேலும் கூறியுள்ளதாவது:

செமிகன்டெக்டருக்கு பற்றாக்குறை ஏற்பட்டுள்ளது மோட்டாா் வாகன உற்பத்தியாளா்களை வெகுவாகப் பாதித்துள்ளது. இதனால், வாகன உற்பத்தி குறைந்து விற்பனையில் மந்த நிலை ஏற்பட்டுள்ளது.

புள்ளிவிவரங்களின் படி, கடந்த அக்டோபா் மாதத்தில் பயணிகள் வாகனமொத்தவிற்பனை 2,26,353-ஆக இருந்தது. இது, கடந்த 2020 அக்டோபரில் விற்பனையான 3,10,694 வாகனங்களுடன் ஒப்பிடும்போது கணிசமான வீழ்ச்சியாகும்.

விநியோகஸ்தா்களுக்கு விற்பனைக்கு அனுப்பப்பட்ட இருசக்கர வாகனங்களின் எண்ணிக்கை நடப்பாண்டு அக்டோபரில் 15,41,621-ஆக இருந்தது. இது, 2020 அக்டோபா் மாத எண்ணிக்கையான 20,53,814-ஐக் காட்டிலும் 25 சதவீதம் குறைவாகும்.

கடந்த மாதம் பயணிகள் வாகனங்கள், இருசக்கர-மூன்று சக்கர வாகனங்கள், குவாட்ரிசைக்கிள் உள்ளிட்ட அனைத்து வகையான வாகனங்கள் விற்பனை 25 சதவீதம் குறைந்து 17,99,750-ஆக இருந்தது. 2020 அக்டோபரில் இந்த விற்பனை 23,91,192-ஆக இருந்தது.

அதேபோன்று ஒட்டுமொத்த வாகன உற்பத்தியும் 28,30,844-லிருந்து 22 சதவீதம் சரிந்து 22,14,745-ஆனது என சியாம் தெரிவித்துள்ளது.