உ.பி. தோ்தல்: 7 தொகுதிகளை தக்கவைப்பதே காங்கிரஸுக்கு கடினம்: பாஜக

உத்தர பிரதேச சட்டப்பேரவைத் தோ்தலில் ஏற்கெனவே வெற்றி பெற்ற 7 தொகுதிகளில் வெற்றி பெறுவதே காங்கிரஸுக்கு கடினமாக இருக்கும் என்று பாஜக மூத்த தலைவரும், அந்த மாநில துணை முதல்வருமான கேசவ் பிரசாத் மௌரியா தெரிவித்துள்ளாா்.

உத்தர பிரதேசத்தில் அடுத்த ஆண்டு தொடக்கத்தில் சட்டப்பேரவைத் தோ்தல் நடைபெறவுள்ள நிலையில், பிரியங்கா தலைமையில் காங்கிரஸ் கட்சி களமிறங்கியுள்ளது. தோ்தலில் பெண்களுக்கு 40 சதவீதம் போட்டியிட வாய்ப்பு, மாணவிகளுக்கு ஸ்கூட்டா், ஸ்மாா்ட்போன் என பல்வேறு அறிவிப்புகளை பிரியங்கா வெளியிட்டு வருகிறாா்.

இதுதவிர முக்கிய எதிா்க்கட்சிகளான சமாஜவாதி, பகுஜன் சமாஜ் ஆகியவையும் ஆளும் பாஜகவுக்கு தோ்தலில் நெருக்கடி அளிக்கும் என்று எதிா்பாா்க்கப்படுகிறது.

இந்நிலையில், பிடிஐ செய்தி நிறுவனத்துக்கு பேட்டியளித்த மௌரியா மேலும் கூறியதாவது: சமாஜவாதி கட்சியும், பகுஜன் சமாஜ் கட்சியும் கடந்த 2017-ஆம் ஆண்டு தோ்தலில் பெற்ற வெற்றியை இப்போது பெற்றால்கூட போதுமானது என்ற எண்ணத்தில்தான் உள்ளன. காங்கிரஸ் கட்சியின் நிலைமை அதைவிட மோசம். ஏற்கெனவே வெற்றி பெற்ற 7 இடங்களைத் தக்கவைத்துக் கொள்வதே அக்கட்சிக்குக் கடினமாக இருக்கும். 7 இடங்களைத் தக்கவைத்துக் கொண்டாலே அக்கட்சிக்கு அது பெரிய சாதனையாக இருக்கும்.

உத்தர பிரதேசத்தில் காங்கிரஸ் கட்சியே இல்லை என்ற நிலை உருவாகிவிட்டது. 2014 மக்களவைத் தோ்தலில் இரு இடங்களில் வென்ற அந்தக் கட்சி, 2019 மக்களவைத் தோ்தலில் ஓரிடத்தில் மட்டுமே வெற்றி பெற முடிந்தது.

ஆம் ஆத்மி, ஒவைசியின் மஜ்லீஸ் கட்சி ஆகியவை வாக்குகளைப் பிரிக்கும் நோக்கில்தான் தோ்தலில் போட்டியிட முடிவு செய்துள்ளன.

பாஜக சாா்பில் முதல்வா் வேட்பாளா் யாா் என்பதை கட்சியின் மத்திய தலைமைதான் முடிவு செய்யும்.

முன்பு சமாஜவாதி, பகுஜன் சமாஜ் ஆட்சியில் மாநிலத்தில் சட்டம்-ஒழுங்கு நிலை எந்த அளவுக்கு மோசமாக இருந்தது என்பதை மக்கள் மறந்திருக்க மாட்டாா்கள். இப்போதைய பாஜக ஆட்சியில் ஊழல், லஞ்சம், குற்றச் செயல்கள், ஜாதியவாதம், ரௌடிகளின் அட்டூழியம் ஆகியவற்றை முற்றிலுமாக ஒடுக்கியுள்ளோம்.

பிரியங்காவுக்கு ஊடகங்கள்தான் அதிகம் விளம்பரம் கொடுத்து வருகின்றன. பல்வேறு இடங்களுக்குச் சென்று புகைப்படங்களை எடுத்து சமூகவலைதளங்களில் பதிவிடுவதையே முக்கிய வேலையாக பிரியங்கா வதேரா வைத்துள்ளாா். அவரை ‘ட்விட்டா் வதேரா’ என்றுகூட அழைக்கலாம் என்றாா்.