பாஜகவின் மூத்தத் தலைவர் எல்.கே.அத்வானியின் பிறந்தநாளையொட்டி, பிரதமர் நரேந்திர மோடி, அமித் ஷா உள்ளிட்டோர் நேரில் சென்று அவருக்கு வாழ்த்துத் தெரிவித்துள்ளனர்.
முன்னாள் துணை பிரதமரும், பாஜகவின் மூத்தத் தலைவருமான எல்.கே. அத்வானி இன்று தனது 94-வது பிறந்தநாளைக் கொண்டாடுகிறார். இதையொட்டி பிரதமர் நரேந்திர மோடி உள்ளிட்ட அரசியல் தலைவர்கள் பலரும் அவருக்கு நேரிலும் சமூக வலைத்தளங்களிலும் வாழ்த்து தெரிவித்து வருகின்றனர்.
இதையொட்டி, பிரதமர் நரேந்திர மோடி, குடியரசு துணைத் தலைவர் வெங்கையா நாயுடு, மத்திய உள்துறை அமைச்சர் அமித் ஷா, பாதுகாப்புத்துறை அமைச்சர் ராஜ்நாத் சிங், பாஜக தேசியத் தலைவர் ஜெ.பி.நட்டா ஆகியோர் அத்வானியின் இல்லத்திற்கு நேரில் சென்று வாழ்த்துத் தெரிவித்தனர். பின்னர் அவரது குடும்பத்தினருடன் கேக் வெட்டியும் கொண்டாடினர்.
முன்னதாக பிரதமர் நரேந்திர மோடி தனது ட்விட்டர் பக்கத்தில்,
'மரியாதைக்குரிய அத்வானி ஜி-க்கு பிறந்தநாள் வாழ்த்துகள். அவர் நீண்ட ஆயுளும் ஆரோக்கியமும் பெற பிரார்த்திக்கிறேன். மக்களுக்கு அதிகாரம் அளிப்பதற்காகவும், நமது கலாசாரப் பெருமையை மேம்படுத்துவதற்காகவும் அவர் மேற்கொண்ட பல முயற்சிகளுக்காக இந்த நாடு அவருக்குக் கடன்பட்டிருக்கிறது. தனது அறிவார்ந்த நோக்கங்களுக்காகவும், வளமான அறிவாற்றலுக்காகவும் அனைவராலும் மதிக்கப்படுகிறார்' என்று குறிப்பிட்டுள்ளார்.