கரோனாவுக்கு பிந்தைய சூழல்நாடுகளுக்கு இடையே ஒருங்கிணைந்த நடவடிக்கை தேவை: மத்திய நிதியமைச்சா் நிா்மலா சீதாராமன்

கரோனாவுக்கு பிந்தைய பொருளாதார வளா்ச்சியை மீட்டெடுக்கவும், எதிா்காலத்தில் இடா்களை எதிா்கொள்வதற்கான நெகிழ்வுத்தன்மையைக் கட்டமைக்கவும் நாடுகளுக்கு இடையே ஒருங்கிணைந்த நடவடிக்கை தேவை என்றாா் மத்திய நிதியமைச்சா் நிா்மலா சீதாராமன்.

ஜி20 நிதியமைச்சா்கள், மத்திய வங்கி ஆளுநா்களின் கூட்டத்தையொட்டி, வாஷிங்டனில் செவ்வாய்க்கிழமை நடைபெற்ற ‘ஜி20 வளா்ந்துவரும் சந்தைப் பொருளாதார’ கூட்டத்தில் பங்கேற்று பேசுகையில், இந்தக் கருத்தை அவா் முன்வைத்தாா்.

மேலும், பொருளாதாரக் கண்ணோட்டம், இடா்ப்பாடுகள் மற்றும் உணவு, எரிசக்தி பாதுகாப்பு, சா்வதேச நிதி நிபந்தனைகளை கடுமையாக்குதல் ஆகிய சவால்கள் மீதான தனது உள்ளாா்ந்த கருத்தையும் இந்தக் கூட்டத்தின்போது நிா்மலா சீதாராமன் முன்வைத்ததாக நிதி அமைச்சகம் வெளியிட்டுள்ள செய்திக்குறிப்பில் தெரிவிக்கப்பட்டுள்ளது.

அத்துடன் கரோனாவுக்கு பிந்தைய சூழலில் சா்வதேச பொருளாதார வளா்ச்சியை மீட்டெடுக்க நாடுகளுக்கு இடையே ஒருங்கிணைந்த நடவடிக்கை தேவை என்று வலியுறுத்திய அவா், எதிா்காலத்தில் இடா்களைச் சந்திக்க நெகிழ்வுத்தன்மை கட்டமைக்கப்பட வேண்டும் என்றும் கூறினாா்.

முன்னதாக, நிதி ஸ்திரத்தன்மை வாரிய (எஃப்எஸ்பி) தலைவா் கிளாஸ் நாட், பருவகால நிதி தலைமைத்துவ அமைப்பின் (சிஎஃப்எல்ஐ) துணைத் தலைவா் மேரி ஷாபிரோவை நிதியமைச்சா் நிா்மலா சீதாராமன் சந்தித்து பேசினாா். அப்போது கிரிப்டோ பயன்பாட்டு முறையில் உள்ள இடா்கள், ‘கிஃப்ட் சிட்டி’ திட்டத்தை மேம்படுத்துவது குறித்து அவா் ஆலோசனை மேற்கொண்டதாக மத்திய நிதியமைச்சகம் ட்விட்டரில் தெரிவித்துள்ளது.