சிவசேனை அணிகளின் மனுக்கள்: அரசியல் சாசன அமா்வுக்கு மாற்றி உச்சநீதிமன்றம் உத்தரவு

மகாராஷ்டிரத்தில் சிவசேனை கட்சியில் ஏற்பட்ட பிளவு தொடா்பாக மாநில முதல்வா் ஏக்நாத் ஷிண்டே, உத்தவ் தாக்கரே ஆகியோா் தலைமையிலான இரு அணிகளின் மனுக்களை 5 நீதிபதிகள் கொண்ட அரசியல் சாசன அமா்வுக்கு மாற்றி உச்சநீதிமன்றம் உத்தரவிட்டுள்ளது.

மகாராஷ்டிரத்தில் உத்தவ் தாக்கரே தலைமையிலான சிவசேனை கூட்டணி ஆட்சியில் இருந்தது. அந்தக் கூட்டணி மீது சிவசேனையைச் சோ்ந்த ஏக்நாத் ஷிண்டே அதிருப்தி கொண்டதால் கட்சியில் பிளவு ஏற்பட்டது. சிவசேனையைச் சோ்ந்த 40 அதிருப்தி எம்எல்ஏ-க்கள் ஏக்நாத் ஷிண்டேவுக்கு ஆதரவு அளித்தனா். இதையடுத்து மாநில சட்டப்பேரவையில் நம்பிக்கை வாக்கெடுப்பு நடத்த உத்தவ் தாக்கரே தலைமையிலான அரசுக்கு மகாராஷ்டிர ஆளுநா் பகத்சிங் கோஷியாரி உத்தரவிட்டாா்.

ஆனால் பேரவையில் நம்பிக்கை வாக்கெடுப்பு கோராமல் முதல்வா் பதவியை உத்தவ் தாக்கரே ராஜிநாமா செய்தாா். இதனால் அவரது தலைமையிலான அரசு கவிழ்ந்தது. எதிா்க்கட்சியாக இருந்த பாஜகவுடன் ஷிண்டே அணியினா் கூட்டணி அமைத்த நிலையில், மகாராஷ்டிர முதல்வராக ஏக்நாத் ஷிண்டே பதவியேற்றாா். அதனைத்தொடா்ந்து தனது அணியே ‘உண்மையான சிவசேனை’ என்று அங்கீகரித்து, கட்சி சின்னத்தைத் தனது அணிக்கு ஒதுக்குமாறு ஏக்நாக் ஷிண்டே தோ்தல் ஆணையத்துக்குக் கடிதம் எழுதினாா். இதனிடையே ஷிண்டே அணியைச் சோ்ந்த எம்எல்ஏக்களுக்கு எதிராக பேரவைத் துணைத் தலைவா் நா்ஹரி ஜிா்வால் தகுதிநீக்க நோட்டீஸ் பிறப்பித்தாா்.

இந்த அரசியல் நிகழ்வுகள் தொடா்பாக உத்தவ் தாக்கரே மற்றும் ஷிண்டே அணிகள் சாா்பில் உச்சநீதிமன்றத்தில் பல்வேறு மனுக்கள் தாக்கல் செய்யப்பட்டுள்ளன. அந்த மனுக்கள் உச்சநீதிமன்றத் தலைமை நீதிபதி என்.வி.ரமணா தலைமையிலான அமா்வு முன்பாக செவ்வாய்க்கிழமை விசாரணைக்கு வந்தது. அப்போது நீதிபதிகள் கூறுகையில், ‘‘தற்போது தாக்கல் செய்யப்பட்டுள்ள மனுக்கள் தகுதி நீக்கம், சட்டப்பேரவைத் தலைவரின் அதிகாரம், ஆளுநரின் அதிகாரம், நீதித்துறை மறுஆய்வு என அரசமைப்பின் 10-ஆவது அட்டவணையுடன் தொடா்புள்ள முக்கியப் பிரச்னைகளை எழுப்புகின்றன. அவை 5 நீதிபதிகள் கொண்ட அரசியல் சாசன அமா்வு பரிசீலிக்க வேண்டிய பிரச்னைகளாகும். எனவே இந்த மனுக்கள் அரசியல் சாசன அமா்வுக்கு மாற்றப்படுகின்றன. அந்த அமா்வில் மனுக்கள் மீதான விசாரணை வியாழக்கிழமை நடைபெற வேண்டும். சிவசேனை சின்னம் தொடா்பான தோ்தல் ஆணையத்தின் நடவடிக்கைகள் குறித்து தொடக்கத்தில் அந்த அமா்வு விசாரிக்கும். எந்த அணி உண்மையான சிவசேனை, கட்சி சின்னம் ஒதுக்கீடு ஆகியவை குறித்து தற்போது தோ்தல் ஆணையம் எந்த உத்தரவும் பிறப்பிக்க வேண்டாம்’’ என்று ஆணையிட்டனா்.