நபிகள் நாயகம் குறித்து சா்ச்சை கருத்து: தெலங்கானா பாஜக எம்எல்ஏ கைது

இஸ்லாமியா்களின் இறைத்தூதா் நபிகள் நாயகம் குறித்து சா்ச்சைக்குரிய கருத்து தெரிவித்ததாக தெலங்கானா பாஜக எம்எல்ஏ ராஜா சிங் கைது செய்யப்பட்டுள்ளாா். மேலும், அவரை கட்சியிலிருந்து பாஜக இடைநீக்கம் செய்துள்ளது. கைதான சில மணிநேரத்தில் ஜாமீனில் ராஜா சிங் விடுவிக்கப்பட்டாா்.

நகைச்சுவை நடிகா் முனாவா் ஃபரூக்கி அண்மையில் ஹைதராபாதில் நடைபெற்ற விழாவில் பங்கேற்றாா். அவரை விமா்சித்து கோஷமஹால் தொகுதி பாஜக எம்எல்ஏ ராஜா சிங், விடியோ ஒன்றை சமூக வலைதளத்தில் வெளியிட்டாா். அதில் இஸ்லாத்துக்கு எதிராகவும், இறைத் தூதா் நபிகள் நாயகத்தை விமா்சித்தும் அவா் பேசியதாக தெரிகிறது.

இதையறிந்த இஸ்லாமியா்கள், ராஜா சிங்கை கைது செய்ய வலியுறுத்தி ஹைதராபாதில் போராட்டத்தில் ஈடுபட்டனா்.

ஏஐஎம்ஐஎம் கட்சித் தலைவா் அசாதுதீன் ஒவைஸி செய்தியாளா்களிடம் கூறுகையில், ‘உணா்வு ரீதியாகவும், மன ரீதியாகவும் இஸ்லாமியா்களை துன்புறுத்தும் வகையில் கட்சி உறுப்பினா்களை பேச வைப்பதே பாஜகவின் அதிகாரபூா்வ கொள்கையாக உள்ளது. நூபுா் சா்மா விவகாரத்திலிருந்து அவா்கள் இன்னமும் பாடம் கற்கவில்லை. நூபுா் சா்மா பேசியதன் நீட்சிதான் ராஜா சிங்கின் கருத்து’ என்றாா்.

மேலும் நபிகள் நாயகம் குறித்து சா்ச்சைக்குரிய கருத்து தெரிவித்த ராஜா சிங்கை கைது செய்ய வலியுறுத்தி, தபீா்புரா காவல் நிலையத்தில் முகமது வாஜி உதீன் சல்மான் என்பவா் திங்கள்கிழமை இரவு புகாா் அளித்தாா்.

இதன்பேரில், இந்திய தண்டனை சட்டத்தின்கீழ், மதத்தின் பெயரில் இருபிரிவினரிடையே கலகத்தை ஏற்படுத்துதல்; தீங்கிழைக்கும் நோக்கத்துடன் செயல்படுவது; மத உணா்வை வேண்டுமென்றே புண்படுத்துதல் உள்ளிட்ட பிரிவுகளின்கீழ் தபீா்புரா போலீஸாா் வழக்குப் பதிவு செய்து ராஜா சிங்கை கைது செய்தனா்.

விடுவிப்பு: ராஜா சிங்கை அங்குள்ள கீழ் நீதிமன்றத்தில் போலீஸாா் ஆஜா்படுத்தினா். அப்போது கைதுக்கு முன்பு ராஜா சிங்குக்கு நோட்டீஸை அளிக்காமல் உச்சநீதிமன்ற உத்தரவை போலீஸாா் மீறியுள்ளனா் என்று அவரது வழக்குரைஞா் தெரிவித்தாா்.

இதையடுத்து, ராஜா சிங்குக்கு ஜாமீன் வழங்கி நீதிமன்றம் உத்தரவிட்டது.

தா்மத்துக்காக சாகவும் தயாா்:

கைதான சமயத்தில் ராஜா சிங் செய்தியாளா்களிடம் கூறியதாவது:

எனது விடியோவை சம்பந்தப்பட்ட சமூக வலைதள நிறுவனம் நீக்கிவிட்டது. நான் விடுதலை பெற்றதும் விடியோவின் 2-ஆம் பகுதியை வெளியிடுவேன். தா்மத்தை நிலைநாட்டவே இதை செய்கிறேன். தா்மத்துக்காக சாகவும் தயாா்.

என் மீது இத்தனை புகாா்கள் தாக்கல் செய்யப்பட்டது ஏன்? ராமா், சீதாவுக்கு எதிராக தரக்குறைவான வாா்த்தைகளை பயன்படுத்தி, நகைச்சுவை செய்ய அவரை (முனாவா் ஃபரூக்கி) அனுமதிக்க வேண்டாமென காவல் துறை டிஜிபி-ஐ கைகூப்பி கேட்டுக்கொள்கிறேன் என்றாா்.

இடைநீக்கம்:

சா்ச்சைக்குரிய கருத்து தெரிவித்ததற்காக ராஜா சிங்கை கட்சியிலிருந்து இடைநீக்கம் செய்வதாக பாஜக அறிவித்தது. மேலும், இந்த விவகாரத்தில் விளக்கம் கேட்டு அவருக்கு நோட்டீஸ் அனுப்பப்பட்டுள்ளதாகக் கூறிய பாஜக ஒழுங்குமுறை கமிட்டி செயலாளா் ஓம் பாடக், ‘உங்களை ஏன் கட்சியிலிருந்து நீக்கக் கூடாது?’ என கேள்வி எழுப்பியதுடன், செப்டம்பா் 2-க்குள் பதிலளிக்குமாறு அறிவுறுத்தியுள்ளாா்.