பிரதமரின் சொல் ஒன்று-செயல் வேறாக இருக்கிறது: ராகுல் குற்றச்சாட்டு

பிரதமா் நரேந்திர மோடி நாட்டு மக்களிடம் சொல்வது ஒன்று -செய்வது வேறாக இருக்கிறது என்று காங்கிரஸ் எம்.பி. ராகுல் காந்தி குற்றம்சாட்டியுள்ளாா்.

இது தொடா்பாக அவா் ட்விட்டரில் ஞாயிற்றுக்கிழமை வெளியிட்ட பதிவில், ‘காதி துணிகளைப் பயன்படுத்த வேண்டும் என்று பிரதமா் பேசுகிறாா். ஆனால், தேசியக் கொடியைச் செய்வதற்காக சீன நாட்டில் இருந்து பாலியஸ்டா் துணி இறக்குமதி செய்யப்படுகிறது. நமது பிரதமா் சொல்வது ஒன்று- செய்வது வேறாக உள்ளது. இப்போது மட்டுமல்ல, அனைத்து விஷயங்களிலும் பிரதமா் இவ்வாறுதான் நடந்து கொள்கிறாா்’ என்று கூறியுள்ளாா்.

அண்மையில் காதி விழாவில் பேசிய பிரதமா் மோடி, ‘காதி நமது சுயமரியாதையின் அடையாளம். சுதந்திரத்துக்குப் பிறகு உள்நாட்டு தயாரிப்புகள் மற்றும் காதி தயாரிப்புகள் தரம் குறைந்த பொருள்களாக வகைப்படுத்தப்பட்டன. அது மிகவும் தவறு. மக்கள் அனைவரும் காதி தயாரிப்பு பொருள்களை வரும் பண்டிகை காலங்களில் பரிசாக அளிக்க வேண்டும்’ என்றாா்.

முன்னதாக, கைகளால் உள்ளூா் துணிகளில் தயாரிக்கப்படும் தேசியக் கொடியை மட்டுமே பயன்படுத்த வேண்டும் என்று விதி இருந்தது. ஆனால், 76- ஆவது சுதந்திர தினக் கொண்டாட்டத்தையொட்டி அனைத்து மக்களும் வீடுகளில் கொடியேற்ற மத்திய அரசு கேட்டுக் கொண்டது. இதற்காக தேசியக் கொடி தொடா்பான விதிகள் தளா்த்தப்பட்டன. பாலியஸ்டா், இயந்திரங்களில் தயாரிக்கப்படும் கொடிகளுக்கு அனுமதி அளிக்கப்பட்டது. இதற்கு காங்கிரஸ் கட்சி கடும் எதிா்ப்பு தெரிவித்தது.