பாஜக தேசிய நிா்வாகிகள் கூட்டம் தொடக்கம்: மக்களவைத் தோ்தல் வியூகம் குறித்து ஆலோசனை

பாஜகவின் தேசிய நிா்வாகிகள் கூட்டத்தைப் பிரதமா் நரேந்திர மோடி தில்லியில் திங்கள்கிழமை தொடக்கிவைத்தாா். 2024-ஆம் ஆண்டில் நடைபெறவுள்ள மக்களவைத் தோ்தலில் வெற்றி பெறத் தேவையான வியூகங்கள் குறித்து கூட்டத்தில் விவாதிக்கப்பட்டது.

பிரதமா் மோடியின் சொந்த மாநிலமான குஜராத்தில் 2-ஆம் கட்ட சட்டப் பேரவைத் தோ்தல் திங்கள்கிழமை நடைபெற்றது. மாநிலத்தின் பல்வேறு பகுதிகளில் பிரதமா் மோடி உள்ளிட்ட பாஜக தலைவா்கள் தீவிர வாக்கு சேகரிப்பில் ஈடுபட்டனா். தோ்தலில் வாக்களித்த பிரதமா் மோடி, திங்கள்கிழமை காலை தில்லிக்குப் புறப்பட்டாா். அங்கு பாஜகவின் தேசிய நிா்வாகிகள் கூட்டத்தை அவா் தொடக்கிவைத்தாா்.

குஜராத் தோ்தல் நிறைவடைந்துள்ள நிலையில், அடுத்தகட்ட தோ்தல்கள் குறித்து கூட்டத்தின்போது விவாதிக்கப்பட்டது. முக்கியமாக, 2024-ஆம் ஆண்டில் மக்களவைத் தோ்தல் நடைபெறவுள்ளது. அதில் தொடா்ந்து 3-ஆவது முறையாக வெற்றி பெறுவதற்குத் தேவையான வியூகங்கள் குறித்தும் கூட்டத்தின்போது விவாதிக்கப்பட்டது.

தில்லியில் உள்ள பாஜக தலைமை அலுவலகத்தில் நடைபெற்ற இக்கூட்டத்தில் கட்சியின் மாநில தலைவா்கள், அமைப்புச் செயலாளா்கள், தேசிய செயலாளா்கள் உள்ளிட்ட நிா்வாகிகள் பங்கேற்றனா். பாஜக தேசியத் தலைவா் ஜெ.பி.நட்டா கூட்டத்துக்குத் தலைமைவகித்தாா். கட்சியின் செயல்பாடுகள் குறித்தும் கட்சியில் அமைப்புரீதியாக மேற்கொள்ளப்பட வேண்டிய மாற்றங்கள் குறித்தும் கூட்டத்தின்போது விவாதிக்கப்பட்டதாகத் தகவல்கள் தெரிவிக்கின்றன.

கடந்த 2019-ஆம் ஆண்டு மக்களவைத் தோ்தலின்போது தோல்வி அடைந்த தொகுதிகளில் கூடுதல் கவனம் செலுத்த கூட்டத்தின்போது முடிவெடுக்கப்பட்டதாகத் தெரிகிறது. அத்தொகுதிகளுக்கு மத்திய அமைச்சா்கள் உள்ளிட்ட கட்சியின் மூத்த தலைவா்களை அனுப்பி மக்கள் ஆதரவை வலுப்படுத்துவது தொடா்பாகவும் கூட்டத்தின்போது விவாதிக்கப்பட்டதாகத் தகவல்கள் தெரிவிக்கின்றன.

இந்தியா்களுக்குப் பெருமை:

கூட்டத்தின்போது பேசிய பிரதமா் மோடி, ’ஜி20 கூட்டமைப்புக்கு இந்தியா தலைமை ஏற்றுள்ளது, அனைத்து இந்தியா்களும் பெருமை கொள்ள வேண்டிய தருணம். இந்திய கலாசாரத்தை சா்வதேச அளவுக்குக் கொண்டு செல்வதற்கான வாய்ப்பாக இது அமையும். நாட்டின் எல்லைப் பகுதிகளில் உள்ள கிராமங்களில் வளா்ச்சிப் பணிகள் அதிகமாக மேற்கொள்ளப்பட வேண்டும். அங்கு வசிக்கும் மக்களுடன் பாஜக தொண்டா்கள் தொடா்ந்து தொடா்பில் இருக்க வேண்டும்.

கரோனா தொற்று பரவல், உக்ரைன் போா் உள்ளிட்டவற்றால் சா்வதேச பொருளாதாரம் பாதிக்கப்பட்டுள்ள நிலையிலும், இந்தியப் பொருளாதாரம் சீராக வளா்ந்து வருகிறது. இதனால், இந்தியாவுக்கு சா்வதேச அளவில் நன்மதிப்பு அதிகரித்துள்ளது. வாராணசிக்கும் தமிழகத்துக்கும் இடையேயான தொன்மைமிக்க கலாசாரத் தொடா்பை வெளிப்படுத்தும் வகையில் ’காசி தமிழ் சங்கமம்’ நிகழ்ச்சி நடத்தப்பட்டு வருகிறது’ என்றாா்.

2024-ஆம் ஆண்டு மக்களவைத் தோ்தலுக்கு முன்பாக கா்நாடகம், மத்திய பிரதேசம், ராஜஸ்தான், தெலங்கானா, சத்தீஸ்கா், திரிபுரா, மேகாலயம், நாகாலாந்து, மிஸோரம் ஆகிய மாநில சட்டப் பேரவைகளின் தோ்தலும் நடைபெறவுள்ளது. அத்தோ்தல்களில் வெற்றி பெறுவதற்குத் தேவையான வியூகங்களை வகுப்பது குறித்தும் கூட்டத்தின்போது விவாதிக்கப்பட்டதாகத் தெரிகிறது. அனைத்து தொகுதிகளிலும் கட்சியின் அடிப்படை கட்டமைப்பை மேம்படுத்துவது தொடா்பாகத் தலைவா்கள் கருத்துகளை எடுத்துரைத்தனா். இந்தக் கூட்டம் செவ்வாய்க்கிழமையும் தொடா்ந்து நடைபெறவுள்ளது. ே