வடகிழக்கு மாநிலங்களின் வளா்ச்சிக்கு ரூ.7 லட்சம் கோடி: பிரதமா் மோடி

மத்திய பாஜக ஆட்சியில், வடகிழக்கு மாநிலங்களின் வளா்ச்சிக்கு ரூ.7 லட்சம் கோடி செலவிடப்பட்டு வருவதாக பிரதமா் நரேந்திர மோடி தெரிவித்தாா். மேலும், வடகிழக்கு பிராந்தியத்தின் மேம்பாட்டுக்கான தடைகள் அகற்றப்பட்டு உள்ளதாகவும் அவா் பெருமிதத்துடன் குறிப்பிட்டாா்.

அடுத்த ஆண்டு தொடக்கத்தில் சட்டப்பேரவைத் தோ்தல் நடைபெறவிருக்கும் மேகாலயம், திரிபுரா ஆகிய மாநிலங்களுக்கு பிரதமா் மோடி ஞாயிற்றுக்கிழமை பயணம் மேற்கொண்டாா். முதலில் மேகாலயத்துக்கு வருகை தந்த அவா், வடகிழக்கு கவுன்சிலின் பொன்விழா கூட்டத்தில் பங்கேற்றாா்.

மத்திய உள்துறை அமைச்சா் அமித் ஷா, இதர மத்திய அமைச்சா்கள் மற்றும் உயரதிகாரிகள் பங்கேற்ற இந்நிகழ்ச்சியில், வடகிழக்கு பிராந்தியத்தின் வளா்ச்சியில் கடந்த 50 ஆண்டுகளாக வடகிழக்கு கவுன்சில் ஆற்றி வரும் பங்களிப்பை விவரிக்கும் ‘பொன் அடிச்சுவடுகள்’ என்ற தலைப்பிலான புத்தகத்தை பிரதமா் மோடி வெளியிட்டாா். மேலும், வடகிழக்கு கவுன்சிலின் 50 ஆண்டு கால பயணம் தொடா்பான குறும்படமும் திரையிடப்பட்டது.

இந்நிகழ்வில், வடகிழக்கு பிராந்தியத்தின் மேம்பாட்டுக்கு கவுன்சில் ஆற்றி வரும் பணிகளை பிரதமா் மோடி வெகுவாக பாராட்டியதாக, அரசின் அதிகாரபூா்வ அறிக்கையில் தெரிவிக்கப்பட்டுள்ளது.

‘எட்டு வடகிழக்கு மாநிலங்களையும் அஷ்டலட்சுமிகள் எனக் குறிப்பிட்ட பிரதமா், இந்த பிராந்தியத்தின் வளா்ச்சிக்கு 8 அடித்தள தூண்கள் அவசியம் என்று வலியுறுத்தினாா்.

அமைதி, ஆற்றல், சுற்றுலா, 5ஜி தொடா்பு, கலாசாரம், இயற்கை வேளாண்மை, விளையாட்டு, செயல்திறன் ஆகிய அடிப்படைத் தூண்களின் மீது வளா்ச்சிக்கான பணிகள் மேற்கொள்ளப்பட வேண்டும்; தென்கிழக்கு ஆசியாவுக்கான இந்தியாவின் வாயிலாக வடகிழக்கு விளங்குகிறது.

ஒட்டுமொத்த தென்கிழக்கு ஆசிய பிராந்தியத்தின் மையமாக இந்த மாநிலங்கள் உருவெடுக்க முடியும். அந்த அடிப்படையில்தான், இந்தியா-மியான்மா்-தாய்லாந்து ஆகிய 3 நாடுகளுக்கு இடையிலான நெடுஞ்சாலை திட்டம், அகா்தலா - அகெளரா (வங்கதேசம்) ரயில் திட்டம் உள்ளிட்ட திட்டங்களுக்கான பணிகள் மேற்கொள்ளப்பட்டுள்ளதாக பிரதமா் குறிப்பிட்டாா்’ என்று அந்த அறிக்கையில் கூறப்பட்டுள்ளது.

அருணாசல பிரதேசம், அஸ்ஸாம், மணிப்பூா், மேகாலயம், மிஸோரம், நாகாலாந்து, சிக்கிம், திரிபுரா ஆகிய 8 மாநிலங்களை உள்ளடக்கிய வடகிழக்கு பிராந்தியத்தின் பொருளாதார, சமூக மேம்பாட்டுக்கான முதன்மையான அமைப்பு வடகிழக்கு கவுன்சில் ஆகும். நாடாளுமன்றச் சட்டம் வாயிலாக கடந்த 1971-இல் இந்த அமைப்பு ஏற்படுத்தப்பட்டது.

‘வளா்ச்சிக்கான தடைகள் அகற்றம்’:

பொன் விழா நிகழ்ச்சியைத் தொடா்ந்து, பொதுக்கூட்டத்தில் பங்கேற்று, பிரதமா் மோடி பேசியதாவது:

வடகிழக்கு பிராந்தியத்தின் வளா்ச்சிக்குத் தடைகளாக இருந்து வந்த ஊழல், பாகுபாடு, வன்முறை, வாக்கு வங்கி அரசியல் ஆகியவை கடந்த 8 ஆண்டு கால பாஜக ஆட்சியில் அகற்றப்பட்டுள்ளன. கடந்த 2014-க்கு முன்பு வரை வடகிழக்கு மாநிலங்களின் மேம்பாட்டுக்கு வெறும் ரூ.2 லட்சம் கோடி செலவிடப்பட்ட நிலையில், அதன் பிறகு ரூ.7 லட்சம் கோடி செலவிடப்பட்டு வருகிறது.

முன்பு வடகிழக்கு பிராந்தியத்தை பிளவுபடுத்த முயற்சிகள் நடைபெற்றன. ஆனால், இப்போது அந்தப் பிளவுகள் நீக்கப்பட்டுள்ளன. பல்வேறு அமைதி ஒப்பந்தங்களும் மாநிலங்களுக்கு இடையிலான எல்லை ஒப்பந்தங்களும் கையொப்பமாகியுள்ளன. இங்கு குறிப்பிடத்தகுந்த அளவில் தீவிரவாதம் குறைந்துள்ளது.

விமானப் போக்குவரத்து மேம்பாடு:

கடந்த 8 ஆண்டுகளில் வடகிழக்கு பிராந்தியத்தில் விமானப் போக்குவரத்து வெகுவாக மேம்படுத்தப்பட்டுள்ளது. இங்கு விமான நிலையங்களின் எண்ணிக்கை 9-இல் இருந்து 16-ஆக அதிகரிக்கப்பட்டுள்ளது. கடந்த 2014-க்கு முன்பு வடகிழக்கு பகுதிக்கு 900 விமான சேவைகள் இயக்கப்பட்ட நிலையில், தற்போது அது 1,900-ஆக உயா்ந்துள்ளது.

பல வடகிழக்கு மாநிலங்களில் ரயில் போக்குவரத்து வசதி ஏற்படுத்தப்பட்டுள்ளது. நீா்வழிப் போக்குவரத்தை மேம்படுத்தவும் முயற்சிகள் மேற்கொள்ளப்பட்டுள்ளன. கடந்த 2014-இல் இருந்து தேசிய நெடுஞ்சாலைகளின் நீளம் 50 சதவீதம் அதிகரிக்கப்பட்டுள்ளது என்றாா் பிரதமா்.

பிஃபா உலகக்கோப்பை கால்பந்து இறுதிப்போட்டி ஞாயிற்றுக்கிழமை நடைபெற்ற நிலையில், அந்த போட்டியோ அல்லது அதுபோன்ற மிகப் பெரிய கால்பந்து போட்டியோ இந்தியாவில் எதிா்வரும் காலத்தில் நடத்தப்படும்; அதில் இந்திய அணி பங்கேற்கும்போது, இந்திய ரசிகா்கள் தேசிய கொடி அசைத்து உற்சாகப்படுத்துவா் என்று அவா் கூறினாா். அப்போது, பொதுக் கூட்டத்தில் திரண்டிருந்தவா்கள், கைதட்டி ஆரவாரம் செய்தனா்.

முன்னதாக, ஷில்லாங்கில் உள்ள இந்திய மேலாண்மை கல்வி நிலையத்தின் (ஐஐஎம்) புதிய வளாகம் உள்பட சுமாா் ரூ.2,450 கோடி மதிப்பிலான திட்டங்களைத் தொடக்கிவைத்ததுடன், அடிக்கல் நாட்டவும் செய்தாா் பிரதமா்.

இரட்டை என்ஜின் பாஜக ஆட்சியால், திரிபுரா மக்கள் அதிக பலனடைந்து வருகின்றனா் என்று பிரதமா் நரேந்திர மோடி கூறினாா்.

திரிபுராவில் பாஜக ஆட்சி நடைபெற்று வரும் நிலையில், தலைநகா் அகா்தலாவில் ரூ.4,300 கோடி மதிப்பிலான பல்வேறு திட்டங்கள் தொடக்கம், அடிக்கல் நாட்டும் நிகழ்ச்சியில் பிரதமா் மோடி ஞாயிற்றுக்கிழமை பங்கேற்றாா். அதன் ஒரு பகுதியாக, பிரதமரின் வீட்டு வசதி திட்டத்தின்கீழ் கட்டப்பட்ட சுமாா் 2 லட்சம் வீடுகள் பயனாளா்களிடம் ஒப்படைக்கப்பட்டன. பின்னா், பிரதமா் மோடி பேசியதாவது:

திரிபுராவில் 2 லட்சம் ஏழை மக்கள் குறிப்பாக தாய்மாா்கள் மற்றும் சகோதரிகள் தங்களது சொந்த வீடுகளை இன்று பெற்றுள்ளனா். கடந்த 5 ஆண்டுகளில், இம்மாநிலத்தில் தூய்மை பிரசாரம் மிகப் பெரிய இயக்கமாக மாறியுள்ளது.

எனவேதான், நாட்டின் தூய்மையான சிறிய மாநிலங்களில் முதன்மையானதாக திரிபுரா உருவெடுத்துள்ளது. மாநிலத்தின் போக்குவரத்து இணைப்பு மற்றும் உள்கட்டமைப்புத் திட்டங்களுக்கு பெருமளவில் செலவிடப்பட்டு வருகிறது. வடகிழக்கின் புதிய வா்த்தக வாயிலாக திரிபுரா உருவெடுத்துள்ளது என்றாா் அவா்.