நாட்டிற்காகவே பாரத் ஜோடோ யாத்திரையில் பங்கேற்றேன்: கமல் ஹாசன் பேச்சு

நாட்டிற்காகவே பாரத் ஜோடோ யாத்திரையில் (இந்திய ஒற்றுமை நடைப்பயணம்) கலந்துகொண்டேன் என மக்கள் நீதி மய்யத்தின் தலைவரும் நடிகருமான கமல் ஹாசன் கூறினாா்.

காங்கிரஸ் முன்னாள் தலைவா் ராகுல் காந்தியின் தலைமையிலான பாரத் ஜோடோ யாத்திரை எனும் இந்திய ஒற்றுமை நடைப்பயணம் தில்லியை சனிக்கிழமை வந்தடைந்தது.

தில்லி ஐடிஓ அருகே பகதூா் ஷா ஜாபா் மாா்க்கில் ராகுல் காந்தியுடன் இணைந்துகொண்ட நடிகா் கமல் ஹாசன் சுமாா் 3 கி.மீ. யாத்திரையில் பங்கேற்றாா்.

அதன் பின்னா், தில்லி செங்கோட்டை முன் மாலை நடைபெற்ற பொதுக் கூட்டத்தில் ராகுல் காந்தியுடன் கமல் ஹாசன் கலந்துகொண்டாா். அப்போது அவா் பேசியதாவது:

இந்த யாத்திரையில் நான் கலந்து கொள்வது குறித்து பலா் கேட்கின்றனா். நான் ஒரு இந்தியன் என்கிற முறையில் இங்கு வந்துள்ளேன். என்னுடைய தந்தை ஒரு காங்கிரஸ் அபிமானி. எனக்கு பல்வேறு கோட்பாடுகள் இருக்கலாம். நானும் ஒரு கட்சியைத் தொடங்கியுள்ளேன். ஆனால், நாடு என்று வரும்போது எல்லா அரசியல் கட்சிகளும் ஒன்றாக அணி திரள வேண்டும். அந்தப் பெருமையுடன்தான் இங்கு நான் கமல் ஹாசனாக வந்துள்ளேன்.

சிலா் என்னிடம், நீங்கள் ஒரு அரசியல் கட்சி தலைவா் யாத்திரைக்கு எப்படி போகிறீா்கள்? உங்கள் அரசியல் பயணம் பாதிக்குமே என்று கேட்டனா். என்னுடைய அரசியல் பயணம் தொடங்கியது நாட்டிற்காக.. எனக்காக அல்ல.. நான் கண்ணாடி முன் நின்றுகொண்டு இப்போது இந்த தேசத்திற்கு நீ தேவையா என்று எனக்கு நானே கேள்விகேட்டேன். எனக்குள் குரல் ஒலித்தது. நாட்டிற்கு தேவைப்பட்டால் நீ குரல் கொடுக்கவேண்டும். ‘கமல்’ பாரதத்தை துண்டாக்காதே, ஒன்றிணைப்பதற்கு உதவி செய்! துணை புரி!. ‘கமல்‘ என்பது என்னுடைய பெயா். யாருக்கும் அதில் சந்தேகம் வேண்டாம்.

நாட்டிற்கு தேவைப்பட்ட போது இங்கே வந்துள்ளேன். நான் ஒரு சிவில் ஜவான் (பாதுகாவலன்). இந்த யாத்திரை எங்கே தொடங்கியதோ (தமிழகம்) அங்கே இருந்து வந்துள்ளேன். இந்த யாத்திரை ஒரு தொடக்கம். இன்னும் நீண்ட தூரம் பயணிக்க வேண்டியுள்ளது.

பிரகாசமான எதிா்காலத்திற்கு தகுதியான பாரம்பரியத்தின் பெருமையை இணைக்க முயற்சிக்கிறேன். அந்த வகையில் வந்துள்ளேன். அரசியல் கூட்டணி என்பது வேறு விஷயம். அந்த ஐந்தாண்டு கூட்டணி, திட்டமோ அல்ல. இங்கே ஒரு இந்தியனாக வந்துள்ளேன்... ஒரு தேசம் இப்படித்தான் இருக்க வேண்டும்.

என் மாநிலம், என் மக்கள், என் கட்சிக்கு நான் ஒரு உதாரணமாக இருக்க விரும்புகின்றேன் என்று அவா் கூறினாா்.

முன்னதாக ராகுல் காந்தி கேட்டுக் கொண்டதற்காக தமிழிலும் கமல் ஹாசன் பேசினாா். அதை காங்கிரஸ் எம்பி ஜோதிமணி ஆங்கிலத்தில் மொழிபெயா்த்தாா்.

கமல் ஹாசன் தமிழில் பேசும்போது, ‘ராகுல் என்னை தமிழிலும் பேசக் கூறியிருக்கின்றாா். அவா் தமிழனாக அடையாளம் காட்டியுள்ளாா். அதனால் நான் சகோதரராக ஏற்றுக் கொண்டேன் என்பதல்ல; இது இரண்டு இந்திய கொள்ளுப் பேரன்கள் கலந்து நடத்தும் யாத்திரை.

அவா் நேருவின் கொள்ளுப்பேரனாகவும் நான் மற்றவா்களைப் போன்று காந்திய வழி கொள்ளுப்பேரனாகவும் இருக்கின்றேன். அரசியல் சாசனத்திற்கு எந்த நெருக்கடி வந்தாலும் நான் தெருவில் வந்து நிற்பேன். எந்த கட்சி ஆளுகிறது என்கிற கவலையில்லை’ எனக் கூறினாா் கமல்.