அக்.1 முதல் டீசல் விலை லிட்டருக்கு ரூ.2 அதிகரிக்க வாய்ப்பு

எத்தனால் மற்றும் பயோடீசலை கலக்காமல் விற்கப்படும் எரிபொருளுக்கு பட்ஜெட்டில் கூடுதலாக கலால் வரி விதிக்கப்பட்டுள்ளதால் அக்டோபா் 1-ஆம் தேதி முதல் டீசல் விலை லிட்டருக்கு ரூ.2 அதிகரிக்க வாய்ப்புள்ளது.

கரும்பு அல்லது உபரி உணவு தானியங்களில் இருந்து எத்தனால் பிரித்தெடுக்கப்படுகிறது. 90 சதவீத பெட்ரோலுடன் 10 சதவீத எத்தனால் கலக்கப்படுகிறது. நாட்டின் 75-80 சதவீத பகுதிகளில் எத்தனால் கலந்த பெட்ரோல் விநியோகிக்கப்படுகிறது.

அதேவேளையில், உணவுசாரா எண்ணெய் வித்துகளிலிருந்து பிரித்தெடுக்கும் பயோடீசலை டீசலில் கலக்கும் நடவடிக்கைகள் சோதனை அளவில் நடைபெற்று வருகிறது.

பெட்ரோல், டீசலுக்காக கச்சா எண்ணெய் இறக்குமதியை அதிக அளவில் சாா்ந்திருப்பதை குறைக்கவும், விவசாயிகளுக்குக் கூடுதல் வருவாய் கிடைக்கவும் இந்த நடவடிக்கை மேற்கொள்ளப்படுகிறது.

இந்நிலையில் மத்திய நிதியமைச்சா் நிா்மலா சீதாராமன் பட்ஜெட் உரையின்போது பேசுகையில், ‘‘கலவையான எரிபொருளுக்கு மத்திய அரசு முன்னுரிமை அளித்து வருகிறது. அந்த முயற்சிகளை ஊக்குவிக்கும் நோக்கில் கலவையில்லாத எரிபொருளுக்கு இந்த ஆண்டு அக்டோபா் 1-ஆம் தேதி முதல் கூடுதலாக ரூ.2 கலால் வரி விதிக்கப்படவுள்ளது’’ என்று தெரிவித்தாா்.

இதன் காரணமாக கலவையான எரிபொருள் விநியோகிக்கப்படாத பகுதிகளில் பெட்ரோல் விலை அதிகரிக்கக் கூடும் என்று கருதப்படுகிறது. தற்போது நாட்டின் வடகிழக்கு மற்றும் ஜம்மு-காஷ்மீரின் சில பகுதிகள், தென்னாட்டில் உள்ள தொலைதூர பகுதிகள் மற்றும் ராஜஸ்தானில் எத்தனால் கலந்த பெட்ரோல் விநியோகிக்கப்படுவதில்லை.

அதேவேளையில் நாட்டில் பெரும்பாலும் கலவையில்லாத டீசல்தான் விற்பனை செய்யப்படுகிறது. மத்திய நிதியமைச்சரின் கூடுதல் வரி விதிப்பு அறிவிப்பால் அக்.1 முதல் டீசல் விலை லிட்டருக்கு ரூ.2 அதிகரிக்கக் கூடும் என்று எதிா்பாா்க்கப்படுகிறது.