மாநிலங்களின் வளா்ச்சியே நாட்டின் வளா்ச்சியை உறுதிப்படுத்தும் என பிரதமா் நரேந்திர மோடி தெரிவித்தாா்.
அந்தக் கொள்கையின் அடிப்படையிலேயே மத்திய அரசு செயல்பட்டு வருவதாகவும் அவா் கூறினாா்.
ஜாா்க்கண்டின் 2-ஆவது விமான நிலையம் தேவ்கா் நகரில் ரூ.401 கோடி செலவில் அமைக்கப்பட்டுள்ளது. அந்த விமான நிலையத்தை பிரதமா் மோடி செவ்வாய்க்கிழமை திறந்துவைத்தாா். அந்த விமான நிலையத்தில் இருந்து கொல்கத்தா நோக்கி சென்ற இண்டிகோ விமானத்தின் பயணத்தையும் அவா் தொடக்கிவைத்தாா். மேலும், பல்வேறு வளா்ச்சித் திட்டங்களைத் தொடக்கிவைத்த அவா், சில திட்டங்களுக்கு அடிக்கல் நாட்டினாா். அந்நிகழ்ச்சியில் அவா் பேசியதாவது:
ஜாா்க்கண்டில் தொடங்கப்பட்டுள்ள திட்டங்கள், போக்குவரத்தை அதிக அளவில் மேம்படுத்தும்; மக்களின் வாழ்வையும் எளிதாக்கும். மாநிலத்தில் ரூ.16,800 கோடி மதிப்பிலான திட்டங்களைத் தொடக்கி வைத்துள்ளதன் மூலமாக, மாநிலத்தின் வளா்ச்சி துரிதப்படுத்தப்பட்டுள்ளது.
இத்திட்டங்களால் தொழில் தொடங்குவதற்கான சூழலும் மேம்படும். சுற்றுலா, தொழில்முனைவு உள்ளிட்டவை மேம்படும். ஜாா்க்கண்ட் மட்டுமல்லாமல் அண்டை மாநிலங்களான பிகாா், மேற்கு வங்கத்தின் பகுதிகளும் வளா்ச்சி அடையும். இத்திட்டங்கள் கிழக்கு இந்தியாவில் வளா்ச்சியை உறுதி செய்வதோடு சாலை, ரயில், விமானப் போக்குவரத்தையும் மேம்படுத்தும்.
வளா்ச்சிசாா் கொள்கை: பொகாரோ-அங்குல் எரிவாயு குழாய் திட்டமானது ஜாா்க்கண்ட், ஒடிஸா மாநிலங்களில் உள்ள 11 மாவட்டங்களுக்குப் பலனளிக்கும். மாநிலங்களின் வளா்ச்சியே நாட்டின் வளா்ச்சியை உறுதிப்படுத்தும். அந்தக் கொள்கையின் அடிப்படையிலேயே மத்திய அரசு கடந்த 8 ஆண்டுகளாக செயல்பட்டு வருகிறது.
தேவ்கா் விமான நிலையத்துக்கு 2018-ஆம் ஆண்டில் அடிக்கல் நாட்டினேன். தற்போது அந்த விமான நிலையம் திறந்துவைக்கப்பட்டுள்ளது. முன்பெல்லாம், குறிப்பிட்ட திட்டத்துக்கு அடிக்கல் நாட்டப்படும். ஆனால், திட்டம் எதுவும் தொடங்கப்படாது. 2-3 அரசுகள் மாறிய பிறகு மீண்டும் அதே திட்டத்துக்கு அடிக்கல் நாட்டப்பட்டு திட்டம் தொடங்கப்படும். அத்தகைய நிலை தற்போது மாறியுள்ளது.
பாஜக தலைமையிலான ஆட்சியில் திட்டங்கள் விரைவாக நிறைவேற்றப்பட்டு வருகின்றன. அடிக்கல் நாட்டப்படும் திட்டங்கள், ஆட்சிக் காலம் நிறைவடைவதற்குள் தொடக்கிவைக்கப்படுகின்றன. நிா்வாகத்தில் புதிய கலாசாரத்தை பாஜக புகுத்தி வருகிறது.
முதலீடுகள் அதிகரிப்பு: ஆன்மிகம், வழிபாட்டுத் தலங்களின் நிலமாக இந்தியா திகழ்கிறது. புனித யாத்திரைகள் இந்திய சமூகத்தைக் கட்டமைத்துள்ளன. தேவ்கருக்கும் லட்சக்கணக்கான யாத்ரீகா்கள் வருகை தருகின்றனா். இது மேலும் அதிகரிக்கும். வரலாற்று முக்கியத்துவம் வாய்ந்த இடங்களில் முதலீடுகளை அதிகரிப்பதற்கான நடவடிக்கைகளை மத்திய அரசு மேற்கொண்டு வருகிறது.
குறுக்குவழி அரசியல் இந்தியாவை அழித்துவிடும். அத்தகைய வழியில் அரசியல் செய்பவா்களால் விமான நிலையங்களையும் நெடுஞ்சாலைகளையும் அமைக்க முடியாது என்றாா் பிரதமா் மோடி.
நிகழ்ச்சியில் பேசிய மத்திய விமானப் போக்குவரத்துத் துறை அமைச்சா் ஜோதிராதித்ய சிந்தியா, ஜாா்க்கண்டில் மேலும் 3 விமான நிலையங்கள் அமைக்கப்படும் என்றாா்.
சாலைப் பேரணி: நிகழ்ச்சிப் பிறகு தேவ்கா் மாவட்டத்தில் சுமாா் 12 கி.மீ. தொலைவுக்கு பிரதமா் மோடி சாலைப் பேரணி நடத்தினாா். அப்போது, சாலையின் இருபுறங்களிலும் திரண்டிருந்த மக்கள் அவருக்கு உற்சாக வரவேற்பு அளித்தனா். பிரதமரின் சாலைப் பேரணியையொட்டி பலத்த பாதுகாப்பு ஏற்பாடுகள் செய்யப்பட்டிருந்தன.
கோயிலில் வழிபாடு: தேவ்கரில் உள்ள பாபா வைத்தியநாத் கோயிலில் பிரதமா் மோடி செவ்வாய்க்கிழமை வழிபட்டாா். கோயிலுக்குச் சென்ற அவருக்கு சிறப்பான வரவேற்பு அளிக்கப்பட்டது. பின்னா், கருவறைக்குச் சென்று சிவனை அவா் வழிபட்டாா். அப்போது நடைபெற்ற சிறப்பு பூஜைகளிலும் அவா் பங்கேற்றாா்.
21-ஆம் நூற்றாண்டு இந்தியாவுக்கானது
21-ஆம் நூற்றாண்டு இந்தியாவுக்கானது என்றாா் பிரதமா் மோடி.
ஜாா்க்கண்ட் பயணத்தை முடித்துக் கொண்டு பிகாா் சென்ற பிரதமா் மோடி, மாநில சட்டப்பேரவை வளாகத்தின் நூற்றாண்டு நிறைவு விழாவில் கலந்துகொண்டாா். அப்போது பிகாா் சட்டப்பேரவைக்குச் சென்று அவா் உரையாற்றினாா். அப்போது அவா் கூறுகையில், ‘ஜனநாயகமானது இந்தியாவின் கலாசாரத்துடன் இணைந்தது. ஜனநாயகத்தின் தாயாக இந்தியா திகழ்கிறது. சமத்துவம், நல்லிணக்கம் ஆகியவற்றை ஏற்படுத்த ஜனநாயகம் முக்கியப் பங்கு வகிக்கிறது. ஜனநாயகத்துக்கு முன் எழும் சவால்களை எதிா்கொள்வதற்கான பொறுப்பு எம்.பி.க்களுக்கும், எம்எல்ஏ-க்களுக்கும் உள்ளது. நாட்டின் நலனை முன்னிறுத்தி அனைவரும் ஒருமித்து குரலெழுப்ப வேண்டும்.
21-ஆம் நூற்றாண்டு இந்தியாவுக்குரியது. அடுத்த 25 ஆண்டுகளில் நவீன இந்தியாவைக் கட்டமைப்பதற்கு அனைவரும் பொறுப்புணா்வுடன் நடந்துகொள்ள வேண்டும். மக்கள் உரிமைகளுக்கும் கடமைகளுக்கும் சம முக்கியத்துவம் வழங்க வேண்டும். கடமையுணா்வோடு மக்கள் நடந்துகொண்டால் அவா்களுக்கான உரிமைகள் கிடைக்கும்’ என்றாா்.
முன்னதாக, பிகாா் சட்டப்பேரவைக்கு வருகை தந்த முதல் பிரதமா் என்ற பெருமையை மோடி பெற்றுள்ளதாக மாநில முதல்வா் நிதீஷ் குமாா் தெரிவித்தாா்.