வீட்டுவசதித் திட்டத்தால் பெண்களுக்கு அதிகாரம்: பிரதமர் மோடி

வீட்டுவசதித் திட்டத்தின் கீழ் குடும்பத் தலைவிகளின் பெயரில் வீடுகள் பதிவு செய்யப்படுவதால், குடும்பத்தில் அவா்களுக்கான முக்கியத்துவம் அதிகரித்து, அதிகாரம் பெற்றவா்களாக விளங்குவதாக பிரதமா் நரேந்திர மோடி தெரிவித்தாா்.

பிரதமரின் வீட்டுவசதித் திட்டத்தின் கீழ் மத்திய பிரதேச மாநிலத்தில் கட்டப்பட்ட 5.21 லட்சம் வீடுகளை பயனாளிகளிடம் ஒப்படைக்கும் விழா செவ்வாய்க்கிழமை நடைபெற்றது. அந்நிகழ்ச்சியில் காணொலி வாயிலாகப் பங்கேற்ற பிரதமா் மோடி, பயனாளிகளுக்கு வீடுகளை வழங்கினாா். அப்போது அவா் கூறியதாவது:

நாட்டில் உள்ள ஏழை மக்களுக்கு வீடுகளை வழங்குவதற்கு பாஜக அரசு முக்கியத்துவம் அளித்து வருகிறது. இதுவரை பிரதமரின் வீட்டுவசதித் திட்டத்தின் கீழ் நாடு முழுவதும் 2.5 கோடி வீடுகள் கட்டப்பட்டுள்ளன. அவற்றில் சுமாா் 2 கோடி வீடுகள், குடும்பத் தலைவியின் பெயரில் பதிவு செய்யப்பட்டுள்ளன.

அதன் காரணமாக குடும்பத்தில் பெண்களின் முக்கியத்துவம் அதிகரித்துள்ளது. குடும்பத்தில் எடுக்கப்படும் முடிவுகளில் அவா்கள் முக்கியப் பங்களிக்கின்றனா். பிரதமரின் வீட்டுவசதித் திட்டத்தின் காரணமாக பெண்கள் அடைந்துள்ள மேம்பாடு குறித்து உள்நாட்டு, வெளிநாட்டுப் பல்கலைக்கழகங்கள் ஆய்வு நடத்த வேண்டும்.

வீட்டுவசதித் திட்டத்தின் கீழ் நடப்பாண்டில் 80 லட்சம் வீடுகளைக் கட்டுவதற்கு நிதிநிலை அறிக்கையில் ஒப்புதல் அளிக்கப்பட்டுள்ளது. இத்திட்டமானது மக்களுக்கு வீடுகளை மட்டும் வழங்கவில்லை, அவா்கள் ஏழ்மையில் இருந்து விடுபடுவதற்கான நம்பிக்கையையும் வழங்குகிறது.

வீட்டுவசதித் திட்டத்தின் கீழ் மத்திய பிரதேசத்தில் 30.5 லட்சம் வீடுகளைக் கட்ட அனுமதி அளிக்கப்பட்டுள்ளது. அவற்றில் சுமாா் 24 லட்சம் வீடுகள் இதுவரை கட்டி முடிக்கப்பட்டுள்ளன. மாநிலத்தில் வாழும் பழங்குடியின மக்கள் இத்திட்டத்தால் பெரிதும் பலனடைந்துள்ளனா்.

இலவச உணவு தானியங்கள்: நாட்டில் முன்பு ஆட்சியில் இருந்தவா்கள் (காங்கிரஸ்), 4 கோடி போலி குடும்ப அட்டைகளை வழங்கி ஏழைகளுக்கான திட்டங்களை சட்டவிரோதமாகப் பிறா் அனுபவிக்க அனுமதித்தனா். ரேஷன் கடையில் விநியோகிக்கப்பட வேண்டிய பொருள்கள், கடைகளில் சட்டவிரோதமாக விற்கப்பட்டன. அதன் காரணமாக ஆட்சியில் இருந்தவா்களே பலனடைந்தனா்.

பாஜக தலைமையிலான அரசு கடந்த 2014-ஆம் ஆண்டில் பொறுப்பேற்ற பிறகு, நாடு முழுவதும் போலி குடும்ப அட்டைகள் ரத்து செய்யப்பட்டன. கரோனா தொற்று பரவல் காலத்தில் ஏழை மக்கள் பாதிக்கப்படக் கூடாது என்பதற்காக உணவு தானியங்கள் இலவசமாக விநியோகிக்கப்பட்டன. அதற்காக ரூ.2.60 லட்சம் கோடி செலவிடப்பட்டது. அத்திட்டம் மேலும் 6 மாதங்களுக்கு நீட்டிக்கப்பட்டுள்ளது. அதற்காக ரூ.80,000 கோடி செலவிடப்படவுள்ளது.

‘குழாய் மூலம் குடிநீா்’: முன்பு மக்களின் பணத்தைத் திருடியவா்கள், தற்போது உணவு தானியங்கள் இலவசமாக விநியோகிக்கப்படுவதை விமா்சித்தும், பொய்களைப் பரப்பியும் வருகின்றனா். ‘குழாய் மூலம் குடிநீா்’ திட்டத்தின் வாயிலாக இதுவரை சுமாா் 6 கோடி வீடுகளுக்கு குழாய் இணைப்பு வழங்கப்பட்டுள்ளது. இதன்மூலம் பெண்கள் குடிநீா் சாா்ந்து எதிா்கொள்ளும் பிரச்னைகளுக்குத் தீா்வுகாண மத்திய அரசு உறுதி கொண்டுள்ளது.

விளிம்புநிலை மக்களுக்கும் அரசின் திட்டங்கள் கிடைப்பது உறுதி செய்யப்பட வேண்டும். நாடு 75-ஆவது சுதந்திர ஆண்டைக் கொண்டாடி வரும் நிலையில், ஊரகப் பகுதிகளில் உள்ள ஏரிகளைப் புதுப்பிப்பதற்கான பணிகள் மேற்கொள்ளப்பட வேண்டும் என்றாா் பிரதமா் மோடி.

நிகழ்ச்சியில் மாநில முதல்வா் சிவ்ராஜ் சிங் சௌஹான், மாநில அமைச்சா்கள் உள்ளிட்டோா் பங்கேற்றனா்.