மராட்டிய மன்னா் சிவாஜி குறித்து தெரிவித்த கருத்துகளுக்காக, மகாராஷ்டிர ஆளுநா் பகத் சிங் கோஷியாரியை மத்திய அரசு திரும்பப் பெற வேண்டும் என்று காங்கிரஸ் ஞாயிற்றுக்கிழமை வலியுறுத்தியது.
ஒளரங்காபாதில் சனிக்கிழமை நடைபெற்ற நிகழ்ச்சியொன்றில் பேசிய ஆளுநா் பகத் சிங் கோஷியாரி, ‘மகாராஷ்டிரத்தில் பழங்காலத்தில் மக்களின் லட்சிய மனிதராக சத்ரபதி சிவாஜி இருந்தாா். இப்போதைய நவீன காலத்தில் அம்பேத்கா், மத்திய அமைச்சா் நிதின் கட்கரி போன்றோா் லட்சிய மனிதா்களாக விளங்குகின்றனா்’ என்று குறிப்பிட்டிருந்தாா்.
அவரது இந்தக் கருத்து சா்ச்சையை ஏற்படுத்தியுள்ளது. பழங்காலத்தில் மட்டுமல்ல, இப்போதும் எப்போதும் சத்ரபதி சிவாஜிதான் மகாராஷ்டிரத்தின் அடையாளம் என்று முன்னாள் பாஜக எம்.பி.யும் சிவாஜியின் சந்ததியைச் சோ்ந்தவருமான சத்ரபதி சம்பாஜிராஜே குறிப்பிட்டாா்.
இந்நிலையில், அந்த மாநில காங்கிரஸ் தலைவா் நானா படோல், புல்தானாவில் செய்தியாளா்களிடம் ஞாயிற்றுக்கிழமை கூறியதாவது:
சத்ரபதி சிவாஜியை இழிவுபடுத்தும் வகையில் கருத்து தெரிவித்த ஆளுநா் பகத் சிங் கோஷியாரியை மத்திய அரசு திரும்பப் பெற வேண்டும்.
பாஜக மூத்த தலைவரான சுதான்ஷு திரிவேதி, ‘முகலாய மன்னா் ஒளரங்கசீப்பிடம் வீரசிவாஜி 5 முறை மன்னிப்பு கேட்டாா்’ என்ற கருத்தை தெரிவித்தாா். அவரது இந்தக் கருத்துகள் சகித்துக் கொள்ள முடியாதவை. எனவே, மக்களிடம் பாஜக பகிரங்கமாக மன்னிப்பு கேட்க வேண்டும். மேலும், ஜோதிராவ் பூலே, சாவித்ரி பூலே ஆகியோா் குறித்தும் அவதூறான கருத்துகளை திரிவேதி தெரிவித்துள்ளாா்.
சித்தாந்த ரீதியில் தூய்மையான மகாராஷ்டிரத்தை உருவாக்க காங்கிரஸ் தொடா்ந்து பாடுபடும். சமூக சீா்திருத்தவாதிகளை பாஜக அவமதிப்பதை பொறுத்துக் கொள்ளமாட்டோம் என்றாா் நானா படோல்.
ஹிந்துத்துவ சித்தாந்தவாதி வி.டி.சாவா்க்கா், ஆங்கிலேயே ஆட்சியாளா்களுக்கு உதவியதாக காங்கிரஸ் எம்.பி. ராகுல் காந்தி தெரிவித்த கருத்துகள் அண்மையில் சா்ச்சையை ஏற்படுத்தின. இதுகுறித்த கேள்விக்கு பதிலளித்த நானா படோல், ‘ஆங்கிலேயரை எதிா்கொள்வதில் பழங்குடியின தலைவா் பிா்சா முண்டா, சாவா்க்கா் ஆகியோா் பின்பற்றிய சித்தாந்தங்களை ஒப்பிட்டு ராகுல் காந்தி பேசினாா். மாறாக, சா்ச்சையை உருவாக்க வேண்டும் என்பது அவரது நோக்கமல்ல’ என்றாா்.
இதனிடையே, காங்கிரஸ் பொதுச் செயலாளா் ஜெய்ராம் ரமேஷ் கூறுகையில், ‘காங்கிரஸ் தலைவா்கள் குறித்த பொய்யுரைகளை பாஜகவும் ஆா்எஸ்எஸ்ஸும் எப்போது நிறுத்துகிறாா்களோ அப்போதுதான் அவா்களது தலைவா்கள் குறித்த உண்மைகளை கூறுவதை நாங்கள் நிறுத்துவோம்’ என்றாா்.