மணிப்பூா் நிலவரம் பிரதமருக்கு முக்கியமில்லை- சரத் பவாா்

‘மணிப்பூரில் நிலவும் சூழலை, பிரதமா் மோடி முக்கியமாக கருதவில்லை; எனவேதான், அவா் அங்கு பயணம் மேற்கொள்ளாமல் இருக்கிறாா்’ என்று தேசியவாத காங்கிரஸ் தலைவா் சரத் பவாா் விமா்சித்தாா். பாஜகவுடன் கூட்டணி சேரமாட்டேன் என்றும் அவா் மீண்டும் தெரிவித்தாா்.

சரத் பவாரின் அண்ணன் மகனும் தேசியவாத காங்கிரஸ் மூத்த தலைவருமான அஜீத் பவாா் தலைமையில் அக்கட்சியின் அதிருப்தி எம்எல்ஏக்கள் அணி, மகாராஷ்டிரத்தில் ஆளும் சிவசேனை (ஷிண்டே) - பாஜக கூட்டணி அரசில் அண்மையில் இணைந்தது.

எதிா்க்கட்சிகளின் இந்தியா கூட்டணியில் சரத் பவாா் அங்கம் வகிக்கும் நிலையில், அவருக்கு பின்னடைவாக இந்த நிகழ்வு அமைந்தது.

தற்போது சரத் பவாா்-அஜீத் பவாா் இடையே ரகசிய சந்திப்புகள் நிகழும் நிலையில், எதிா்க்கட்சிகள் கூட்டணியில் சரத் பவாா் நீடிப்பாரா? என்ற கேள்வி எழுந்துள்ளது.

இந்நிலையில், மகாராஷ்டிர மாநிலம், ஒளரங்காபாதில் செய்தியாளா்களிடம் புதன்கிழமை பேசிய சரத் பவாா், ‘தேசியவாத காங்கிரஸ் இல்லாமல் தோ்தலை எதிா்கொள்ளும் திட்டத்தை, சிவசேனையும் (உத்தவ் பிரிவு), காங்கிரஸும் தயாரித்து வருவதாக வெளியான தகவல்களில் உண்மையில்லை. பாஜகவுடன் கூட்டணி சேரமாட்டேன். மாறாக, 2024 மக்களவைத் தோ்தலில் மாற்றத்தை கொண்டுவரவே பணியாற்றுவேன்.

சந்திப்புகள் ஏன்?: அஜீத் பவாா் எனது குடும்ப உறுப்பினா். எங்களது குடும்பத்தில் ஏதேனும் ஒரு விழா திட்டமிடப்பட்டால், நான் கலந்தாலோசிப்பது இயல்பானதுதான்.

பிரதமா் மீது விமா்சனம்: மணிப்பூா் நிகழ்வுகளை பிரதமா் மோடி அரசு மெளனமாக வேடிக்கை பாா்க்கிறது.

‘வடகிழக்கு பிராந்தியம் மிகவும் முக்கியத்துவம் வாய்ந்ததாகும். குறிப்பாக, சீன எல்லையையொட்டிய பகுதிகளில் அதிக கவனம் செலுத்த வேண்டும். மணிப்பூரில் தற்போது நிகழும் விஷயங்கள், நாட்டுக்கு ஆபத்தானவை.

மணிப்பூருக்கு நேரில் சென்று, அங்குள்ள மக்களுக்கு பிரதமா் மோடி நம்பிக்கையளிக்க வேண்டும். ஆனால், அங்கு பயணம் மேற்கொள்ளும் அளவுக்கு மணிப்பூா் நிலவரம் பிரதமருக்கு முக்கியமாக தெரியவில்லை. மாறாக, மத்திய பிரதேசத்தில் தோ்தல் பிரசார கூட்டங்களில் அவா் பங்கேற்கிறாா்’ என்றாா் சரத் பவாா்.