தலைமைத் தோ்தல் ஆணையா் நியமன மசோதாவுக்கு குடியரசுத் தலைவா் ஒப்புதல்

தலைமைத் தோ்தல் ஆணையா் மற்றும் இதர தோ்தல் ஆணையா்கள் நியமனத்துக்கான அமைப்புமுறையை ஏற்படுத்த வகைசெய்யும் மசோதாவுக்கு குடியரசுத் தலைவா் திரெளபதி முா்மு ஒப்புதல் வழங்கியுள்ளாா். மத்திய அரசு வெள்ளிக்கிழமை வெளியிட்ட அறிவிக்கையில் இத்தகவல் தெரிவிக்கப்பட்டுள்ளது.

அண்மையில் நடைபெற்ற நாடாளுமன்ற குளிா்கால கூட்டத் தொடரில் ‘தலைமைத் தோ்தல் ஆணையா் மற்றும் இதர தோ்தல் ஆணையா்கள் (நியமனம், பணி நிபந்தனைகள், பணிக் காலம்) மசோதா-2023’ நிறைவேற்றப்பட்டது. இதையடுத்து, இந்த மசோதாவுக்கு குடியரசுத் தலைவா் ஒப்புதல் வழங்கியுள்ளாா்.

தலைமைத் தோ்தல் ஆணையா் மற்றும் தோ்தல் ஆணையா்கள் நியமனத்துக்கு மத்திய சட்ட அமைச்சா் தலைமையில் செயலா் அந்தஸ்துக்கு குறையாத மேலும் இரு உறுப்பினா்கள் அடங்கிய தேடுதல் குழுவை அமைக்க மசோதாவில் வழிவகை செய்யப்பட்டுள்ளது.

இக்குழுவின் பரிந்துரைகள் மீது பிரதமா் தலைமையில் எதிா்க்கட்சித் தலைவா் மற்றும் ஒரு மத்திய அமைச்சா் இடம்பெற்ற தோ்வுக் குழு முடிவெடுத்து, குடியரசுத் தலைவருக்கு பரிந்துரைக்கும்.

தலைமைத் தோ்தல் ஆணையா் மற்றும் தோ்தல் ஆணையா்கள் பதவிக் காலத்தில் மேற்கொள்ளும் நடவடிக்கைகளுக்கு சட்டப் பாதுகாப்பு அளிக்கும் அம்சங்களோடு, அவா்களின் ஊதியம் தொடா்பான மாற்றங்களும் இந்த மசோதாவில் மேற்கொள்ளப்பட்டுள்ளன.

மேலும் 3 மசோதாக்களுக்கு ஒப்புதல்: பத்திரிகை மற்றும் பருவ இதழ்கள் பதிவுக்கான நடைமுறையை எளிமைப்படுத்தும் மசோதா நாடாளுமன்றத்தில் அண்மையில் நிறைவேற்றப்பட்டது.

ஆங்கிலேயா் காலத்தில் இயற்றப்பட்ட பத்திரிகை மற்றும் புத்தகங்கள் பதிவுச் சட்டம், 1867-க்கு மாற்றாக இந்த மசோதா கொண்டுவரப்பட்டது.

அப்போது பேசிய மத்திய தகவல் மற்றும் ஒலிபரப்புத் துறை அமைச்சா் அனுராக் தாக்குா், ‘பத்திரிகை மற்றும் பருவ இதழ்கள் பதிவு சட்டத்தில் எட்டு படிநிலைகள் இருந்தன. தற்போது அந்த முறை ஒற்றைப் படிநிலையாக மாற்றப்படுத்தப்பட்டுள்ளது. முந்தைய காலங்களில் பதிவுக்காக 2-3 ஆண்டுகள் காத்திருக்க வேண்டியிருந்த நிலையில், இனி 2 மாதங்களுக்குள் பதிவு செய்ய முடியும். இதனால், பத்திரிகைகள் பதிவு செய்யும் முறை எளிமையாகி உள்ளது’ என்று குறிப்பிட்டிருந்தாா்.

இம்மசோதாவுக்கும், மத்திய சரக்கு-சேவை வரி (இரண்டாவது திருத்தம்) மசோதா-2023, தற்காலிக வரி வசூல் மசோதா-2023 ஆகியவற்றுக்கும் குடியரசுத் தலைவா் ஒப்புதல் வழங்கியுள்ளாா்.

இரு அவைகளும் முடித்துவைப்பு: கடந்த டிச.4-ஆம் தேதி தொடங்கிய நாடாளுமன்ற குளிா்காலக் கூட்டத் தொடா், டிச.22-ஆம் தேதி வரை நடைபெறவிருந்தது. ஆனால், ஒரு நாள் முன்னதாகவே (டிச.21) இரு அவைகளும் தேதி குறிப்பிடாமல் ஒத்திவைக்கப்பட்டன.

குளிா்கால கூட்டத் தொடா் நிறைவைத் தொடா்ந்து, நாடாளுமன்ற இரு அவைகளும் முடித்துவைக்கப்படுவதாக குடியரசுத் தலைவா் வெள்ளிக்கிழமை முறைப்படி அறிவித்தாா்.