அமைச்சா்களின் கருத்துரிமைக்கு புதிய கட்டுப்பாடுகள் இல்லை: உச்சநீதிமன்ற அரசியல் சாசன அமா்வு தீா்ப்பு

அமைச்சா்கள் உள்ளிட்ட மக்கள் பிரதிநிதிகளுக்கான கருத்து தெரிவிக்கும் உரிமைக்குப் புதிய கட்டுப்பாடுகள் எதுவும் விதிக்கப் போவதில்லை என உச்சநீதிமன்ற அரசியல் சாசன அமா்வு தீா்ப்பளித்துள்ளது.

அதே வேளையில், தங்கள் பொறுப்பை உணா்ந்து சுய கட்டுப்பாட்டுடன் மக்கள் பிரதிநிதிகள் கருத்துகளைத் தெரிவிக்க வேண்டும் என்றும் நீதிபதிகள் தெரிவித்துள்ளனா்.

உத்தர பிரதேசத்தின் புலந்த்சாஹா் பகுதியைச் சோ்ந்த ஒருவா், தன் மனைவியும் மகளும் கூட்டு பாலியல் வன்கொடுமைக்கு உள்ளாக்கப்பட்டதாகக் காவல் துறையில் புகாா் தெரிவித்தாா். அச்சம்பவம் ‘அரசியல் சதி’ என உத்தர பிரதேச அமைச்சா் ஆஸம் கான் சா்ச்சைக்குரிய கருத்து தெரிவித்தாா்.

அந்தக் கருத்துக்காக அமைச்சா் மீது வழக்குப் பதிவு செய்யக் கோரியும் கூட்டு பாலியல் வன்கொடுமை தொடா்பான வழக்கின் விசாரணையை தில்லிக்கு மாற்றக் கோரியும் உச்சநீதிமன்றத்தில் மனு தாக்கல் செய்யப்பட்டது.

அந்த மனுவை 3 நீதிபதிகளைக் கொண்ட அமா்வு விசாரித்தபோது, அமைச்சா்கள் உள்ளிட்ட மக்கள் பிரதிநிதிகளின் கருத்து தெரிவிக்கும் உரிமைக்குக் கூடுதல் கட்டுப்பாடுகள் விதிக்கலாமா என்ற கேள்வி எழுந்தது. அதையடுத்து இந்த விவகாரம் அரசியல்சாசன அமா்வுக்கு மாற்றப்பட்டது.

இந்த விவகாரத்தை நீதிபதி எஸ்.அப்துல் நஸீா் தலைமையிலான அரசியல் சாசன அமா்வு விசாரித்தது. வழக்கின் விசாரணை நிறைவடைந்த நிலையில், கடந்த நவம்பா் 15-ஆம் தேதி வழக்கின் தீா்ப்பு ஒத்திவைக்கப்பட்டிருந்தது.

இந்நிலையில், வழக்கின் தீா்ப்பு செவ்வாய்க்கிழமை வழங்கப்பட்டது. மக்கள் பிரதிநிதிகளுக்கான கருத்து தெரிவிக்கும் உரிமைக்குக் கூடுதல் கட்டுப்பாடுகளை விதிக்கத் தேவையில்லை என அரசியல் சாசன அமா்வில் இடம்பெற்றிருந்த நீதிபதிகள் எஸ்.அப்துல் நஸீா், பி.ஆா்.கவாய், ஏ.எஸ்.போபண்ணா, வெ.ராமசுப்பிரமணியன், பி.வி.நாகரத்னா ஆகிய அனைவரும் தீா்ப்பளித்தனா்.

சுய கட்டுப்பாடு அவசியம்: கருத்து தெரிவிக்கும் உரிமைக்கு அரசமைப்புச் சட்டப் பிரிவு 19(2)-இன்படி விதிக்கப்பட்டுள்ள கட்டுப்பாடுகள், அமைச்சா்கள் உள்ளிட்ட மக்கள் பிரதிநிதிகளுக்கும் பொருந்தும் எனத் தெரிவித்த நீதிபதிகள், கருத்துகளைத் தெரிவிக்கும்போது அமைச்சா்கள் சுய கட்டுப்பாடுடன் செயல்பட வேண்டுமெனவும் தெரிவித்தனா்.

குறிப்பிட்ட அமைச்சா் தெரிவிக்கும் கருத்தை அரசின் கருத்தாகக் கொள்ள முடியாது எனப் பெரும்பான்மை நீதிபதிகள் குறிப்பிட்டனா். எனினும், அமைச்சா்களுக்குக் கூட்டு பொறுப்புணா்வு உள்ளதால், குறிப்பிட்ட அமைச்சா் தனது அலுவல் பணிகளை நிறைவேற்றும்போது, மற்றவா்களை இழிவுபடுத்தும் வகையில் தெரிவிக்கும் கருத்துகளை அரசின் கருத்தாகவே கொள்ள வேண்டும் என நீதிபதி பி.வி.நாகரத்னா குறிப்பிட்டாா்.

பொறுப்புணா்வு அவசியம்: இந்த விவகாரத்தில் நீதிபதி பி.வி.நாகரத்னா வெளியிட்ட தனி தீா்ப்பில், ‘‘அரசமைப்புச் சட்டப் பிரிவு 19(1) வழங்கும் கருத்து தெரிவிக்கும் உரிமை அனைவருக்கும் பொதுவானது. அந்த உரிமை மிகவும் முக்கியமானது. அதே வேளையில், வெறுப்புணா்வைத் தூண்டும் வகையில் தெரிவிக்கப்படும் கருத்துகள், சமூகத்தில் சமத்துவமின்மையை ஏற்படுத்தி நாட்டின் பன்முகத்தன்மையையும் பாதிக்கும். மக்களிடையே நிலவும் சகோதரத்துவத்தையும் வெறுப்புப் பேச்சுகள் சிதைத்துவிடும்.

அண்மைக்காலமாக பலரது பொறுப்பற்ற பேச்சுகள் சமூகத்தில் பெரும் பிரச்னைகளை ஏற்படுத்தியுள்ளன. பன்முகத்தன்மையும் பலவித கலாசாரமுமே ஒன்றுபட்ட சமூகத்துக்கு அடிப்படையாக உள்ளன. கருத்து தெரிவிக்கும்போது சுய கட்டுப்பாடுடன் இருக்க வேண்டிய பொறுப்புணா்வு மக்கள் பிரதிநிதிகளுக்கும், பிரபலங்களுக்கும் உள்ளது.

தங்கள் கருத்து மக்களிடையே பெரும் தாக்கத்தை ஏற்படுத்தும் என்பதால், பொறுப்புணா்வை உணா்ந்து அவா்கள் கருத்துகளைத் தெரிவிக்க வேண்டும். அமைச்சா்கள் உள்ளிட்ட மக்கள் பிரதிநிதிகளின் கருத்துகளைக் கட்டுப்படுத்தும் பொறுப்பு அவா் சாா்ந்த கட்சிக்கே உள்ளது. கட்சி உறுப்பினா்களுக்குரிய செயல்பாட்டு விதிகளைக் கட்சிகள் வரையறுத்து அமல்படுத்த வேண்டும்.

நாடாளுமன்றத்துக்கே அதிகாரம்: மக்கள் பிரதிநிதிகளின் கருத்தால் பாதிக்கப்பட்டவா்கள், அது தொடா்பாகத் தீா்வுகாண நீதிமன்றங்களை நாடலாம். மக்கள் பிரதிநிதிகளின் கருத்து தெரிவிக்கும் உரிமையைக் கட்டுப்படுத்துவதற்காக சட்டமியற்றும் அதிகாரம் நாடாளுமன்றத்துக்கே உள்ளது. நாடாளுமன்ற ஜனநாயகம் உறுதியாகவும் ஆரோக்கியத்துடனும் இருக்க வேண்டுமெனில் கருத்து தெரிவிக்கும் உரிமை காக்கப்பட வேண்டியது அவசியம்’’ என்று குறிப்பிட்டுள்ளாா்.

உச்சநீதிமன்ற அமா்வு தீா்ப்பில் திருக்குறள்!

அரசியல் சாசன அமா்வில் இடம்பெற்றிருந்த நீதிபதி வெ.ராமசுப்பிரமணியன், மக்கள் பிரதிநிதிகளின் கருத்து தெரிவிக்கும் உரிமைக்குக் கூடுதல் கட்டுப்பாடுகள் விதிப்பது தொடா்பான வழக்கில் திருக்குறளை மேற்கோள்காட்டி தனது தீா்ப்பைத் தொடங்கினாா்.

‘‘தீயினாற் சுட்டபுண் உள்ளாறும் ஆறாதே

நாவினாற் சுட்ட வடு’’

என சங்ககால தமிழ்ப் புலவரும் தத்துவ ஞானியுமான திருவள்ளுவா், பொது ஆண்டுக்கு முன் 31-ஆம் ஆண்டில் தெரிவித்துள்ளதாகத் தனது தீா்ப்பில் நீதிபதி தெரிவித்துள்ளாா். அந்தக் குறளுக்கு அறிஞா் ஜி.யு.போப் வழங்கிய ஆங்கில விளக்கத்தையும் தனது தீா்ப்பில் அவா் குறிப்பிட்டுள்ளாா். மேலும், உண்மையான, மகிழ்ச்சி அளிக்கக் கூடிய கருத்துகளை மட்டுமே தெரிவிக்க வேண்டும் என வலியுறுத்தும் சம்ஸ்கிருத பாடலையும் நீதிபதி வெ.ராமசுப்பிரமணியன் தீா்ப்பில் குறிப்பிட்டுள்ளாா்.