தில்லி கலால் கொள்கை ஊழல் வழக்கு: சிசோடியாவின் இடைக்கால ஜாமீன் மனு மீதுசிபிஐ, அமலாக்கத் துறை பதிலளிக்க உத்தரவு

தில்லி கலால் கொள்கை ஊழல் விவகாரத்தில் சிபிஐ மற்றும் அமலாக்கத் துறை பதிவு செய்துள்ள வழக்குகளில் இடைக்கால ஜாமீன் கோரி ஆம் ஆத்மி கட்சியின் மூத்த தலைவா் மனீஷ் சிசோடியா தாக்கல் செய்துள்ள மனுக்கள் மீது அந்த இரு விசாரணை அமைப்புகளும் பதிலளிக்க உச்சநீதிமன்றம் வெள்ளிக்கிழமை உத்தரவிட்டது.

நீதிபதிகள் சஞ்சீவ் கண்ணா, பீலா எம். திரிவேதி, உஜ்ஜல் புயான் ஆகியோா் அடங்கிய அமா்வு முன் சிசோடியா தரப்பில் மூத்த வழக்குரைஞா் அபிஷேக் மனு சிங்வி ஆஜராகி, சிசோடியாவின் மனைவி தீவிர மருத்துவ நிலைமையில் பாதிக்கப்பட்டிருப்பதாகவும், அவா் மருத்துவமனையில் அனுமதிக்கப்பட்டிருப்பதாகவும் கூறினாா். அப்போது, சிசோடியாவின் இடைக்கால ஜாமீன் மனு பரிசீலிக்கப்படும் எனக் கூறிய நீதிபதிகள் அமா்வு, இந்த விவகாரத்தில் சிபிஐ, அமலாக்கத் துறை தங்களது பதிலை தாக்கல் செய்ய உத்தரவிட்டது.

இது தொடா்பாக நீதிபதிகள் அமா்வு கூறுகையில், ‘வழக்கமாக கொள்கை முடிவு விஷயங்களில் நீதிமன்றம் தலையிடுவதில்லை. ஆனால், இங்கு புறம்பான காரணங்களுக்காக கொள்கை உருவாக்கப்பட்டிருக்கும் வழக்காக உள்ளது’ என்றது. சிபிஐ, அமலாக்கத் துறை தரப்பில் ஆஜரான கூடுதல் சொலிசிட்டா் ஜெனரல் வி.ராஜு வாதிடுகையில், இடைக்கால ஜாமீன் மனு விசாரணை நீதிமன்றத்தால் நிராகரிக்கப்பட்டிருந்ததாகக் கூறினாா். அதற்கு, விசாரணை அமைப்புகள் சாா்பில் பதிலை தாக்கல் செய்யுமாறு ராஜுவை நீதிபதிகள்அமா்வு கேட்டுக்கொண்டது.

கடந்த ஜூலை 10-ஆம் தேதி இந்த விவகாரத்தை கேட்டறிந்த தலைமை நீதிபதி டி.ஒய். சந்திரசூட் தலைமையிலான அமா்வு, சிசோடியாவின் மனுக்கள் மீது ஜூலை 14-ஆம்தேதி விசாரிக்க சம்மதம் தெரிவித்திருந்தது. கலால் கொள்கை ஊழல் விவகார வழக்குகளில் தனது தனித் தனி ஜாமீன் மனுக்களை தள்ளுபடி செய்த தில்லி உயா்நீதிமன்றத்தின் 2 உத்தரவுகளை எதிா்த்து அவா் இந்த மேல்முறையீட்டு மனுவைத் தாக்கல் செய்துள்ளாா்.

தில்லியின் துணை முதல்வராகவும், கலால் துறை அமைச்சராகவும் இருந்த சிசோடியா, ‘ஊழலில்’ ஈடுபட்டதாகக் கூறப்படும் வழக்கில் நிகழாண்டு பிப்ரவரி 26-ஆம் தேதி மத்திய புலனாய்வுத் துறையால் (சிபிஐ) கைது செய்யப்பட்டாா். அதன் பின்னா் காவலில் வைக்கப்பட்ட அவா், பிப்ரவரி 28 -ஆம் தேதி தில்லி அமைச்சரவையில் இருந்து ராஜிநாமா செய்தாா்.

சிபிஐ விசாரித்து வரும் கலால் கொள்கை ‘ஊழல்’ வழக்கில் மே 30-ஆம் தேதி அவருக்கு ஜாமீன் வழங்க உயா்நீதிமன்றம் மறுத்து உத்தரவிட்டது. நீதிமன்றம் பிறப்பித்த உத்தரவில், ‘துணை முதலமைச்சராகவும், கலால் துறை அமைச்சராகவும் இருந்த அவா்“‘முக்கிய நபா்’. அவா் சாட்சிகளை மேலாதிக்கம் செய்வதற்கான வாய்ப்பு உள்ளது. மேலும், ஊழல் நடந்ததாகக் கூறப்படும் போது சிசோடியா ‘துறையின் பொறுப்பாளராக’ இருந்ததால், அவருக்கு எந்தப் பங்கும் இல்லை என்று கூற முடியாது. தேசியத் தலைநகரில் அவரது கட்சி இன்னும் ஆட்சியில் இருப்பதால், ஒரு காலத்தில் 18 இலாகாக்களை அவா் வைத்திருந்து, தொடா்ந்து செல்வாக்கை செலுத்தி வருகிறாா். சாட்சிகள் பெரும்பாலும் அரசு ஊழியா்களாக இருப்பதால், அவா்கள் மீது மேலாதிக்கத்தை செலுத்துவதற்கான வாய்ப்பை நிராகரிக்க முடியாது. ‘ செளத் குரூப்’ மூலம் அவா்களுக்கு தேவையற்ற நன்மைகளை அளிக்கும் நோக்கத்துடன் கலால் கொள்கை உருவாக்கப்பட்டுள்ளது’ என்று உத்தரவில் நீதிமன்றம் தெரிவித்திருந்தது.

ஜூலை 3-ஆம் தேதி, தில்லி அரசின் கலால் கொள்கையில் முறைகேடுகள் நடந்ததாகக் கூறப்படும் பணமோசடி வழக்கில் சிசோடியாவுக்கு ஜாமீன் வழங்க உயா்நீதிமன்றம் மறுத்துவிட்டது. மேலும், அவருக்கு எதிரான குற்றச்சாட்டுகள் இயல்பிலேயே ‘மிகவும் தீவிரமிக்கவை’ என நீதிமன்றம் தெரிவித்திருந்தது.