பாஜக கூட்டணியில் இருந்து விலகி தெலுங்கு தேசத்துடன் கூட்டணி

‘பாஜக கூட்டணியிலிருந்து விலகி, நெருக்கடி சூழலில் சந்திரபாபு நாயுடுவுக்கு ஆதரவளித்து தெலுங்கு தேசத்துடன் கூட்டணி வைப்பதாக நடிகரும், ஜன சேனை கட்சித் தலைவருமான் பவண் கல்யாண் வியாழக்கிழமை அறிவித்தாா்.

ஆந்திர மாநிலத்தில் அடுத்த ஆண்டு மத்தியில் மக்களவைத் தோ்தலுடன் இணைந்து பேரவைத் தோ்தலும் நடைபெற உள்ளது. முதல்வா் ஜெகன் மோகன் ரெட்டி தலைமையிலான ஓய்.எஸ்.ஆா்.காங்கிரஸிடம் இருந்து ஆட்சியைக் கைப்பற்றும் நோக்கில் எதிா்க்கட்சித் தலைவா் சந்திரபாபு நாயுடு தலைமையிலான தெலுங்கு தேசம் தீவிரமாகப் பணியாற்றி வந்தது.

இந்தச் சூழலில், திறன் மேம்பாட்டுக் கழகத்தில் ரூ.300 கோடிக்கு மேல் ஊழல் நடைபெற்ாக தொடரப்பட்ட வழக்கில், சந்திரபாபு நாயுடுவை சிஐடி அதிகாரிகள் கடந்த மாதம் 9-ஆம் தேதி கைது செய்தனா். பின்னா், நீதிமன்றக் காவலில் ராஜமகேந்திரவரம் மத்திய சிறையில் அவா் அடைக்கப்பட்டுள்ளாா். சிறையில் சந்திரபாபு நாயுடுவை பவண் கல்யாண் கடந்த மாதம் 14-ஆம் தேதி சந்தித்து நலம் விசாரித்தாா்.

முன்னதாக, தில்லியில் கடந்த ஜூலை 18-ஆம் தேதி நடைபெற்ற பாஜக தலைமையிலான தேசிய ஜனநாயக கூட்டணி (என்டிஏ) கூட்டத்தில் பங்கேற்ற பவண் கல்யாண், ‘பிரதமா் மோடியின் லட்சியத்துக்கு ஜன சேனை ஆதரவளிக்கும்’ எனத் தெரிவித்தாா். ஆந்திரத்தில் ஓய்.எஸ்.ஆா் காங்கிரஸை வீழ்த்த தெலுங்கு தேசத்தையும் என்டிஏ கூட்டணியில் இணைக்க வேண்டும் என அக்கூட்டத்தில் பவண் கல்யாண் வலியுறுத்தியதாக கூறப்பட்டது. சந்திரபாபு நாயுடுவுனான சந்திப்பும் அதற்கான முயற்சி என்று கருதப்பட்டது. இந்நிலையில், பாஜக கூட்டணியில் இருந்து ஜன சேனை விலகுவதாக அக்கட்சித் தலைவா் பவண் கல்யாண் அறிவித்துள்ளாா்.

கிருஷ்ணா மாவட்டத்தின் பெத்தனா பகுதியில் வியாழக்கிழமை நடைபெற்ற பொதுக்கூட்டத்தில் பங்கேற்று பவண் கல்யாண் பேசியதாவது: ஆந்திரத்தின் வளா்ச்சிக்கும், நல்ல அரசு நிா்வாகத்துக்கும் ஜனசேனை-தெலுங்கு தேசம் கூட்டணி அவசியமாகிறது. தற்போது நெருக்கடியில் சிக்கியுள்ள தெலுங்கு தேசத்துக்கு ஜன சேனையின் இளைஞா்கள் ஆதரவு தேவைப்படுகிறது. எனவே, தெலுங்கு தேசத்துக்கு நாம் ஆதரவு வழங்க வேண்டும். தெலுங்குதேசம் மற்றும் ஜனசேனை கூட்டணி ஓய்.எஸ்.ஆா்.காங்கிரஸை தோல்வியில் மூழ்கடிக்கும் என்றாா்.

கூட்டணி முக்கியத்துவம்:

கடந்த 2019 பேரவைத் தோ்தலில், பெரும்பான்மையாக 50.6 சதவீத வாக்குகளுடன் 151 இடங்களில் வென்று ஓய்.எஸ்.ஆா்.காங்கிரஸ் ஆட்சியைக் கைப்பற்றியது. அதேவேளையில், தெலுங்கு தேசம் 23 இடங்களில் வென்று 39.7 % சதவீத வாக்குகளையும், ஜன சேனை ஒரு இடத்தில் வென்று 5.6% சதவீதத்தை வாக்குகளையும் பெற்றன. இந்நிலையில், தெலுங்கு தேசம் மற்றும் ஜன சேனை கூட்டணி ஓய்.எஸ்.ஆா்.காங்கிரஸுக்கு கடும் சவாலாக அமையும் என்று எதிா்பாா்க்கப்படுகிறது.