காங்கிரஸ் கட்சியை விடவும், ராகுல் காந்திக்கு எதிராக பல தாக்குதல்களை தொடுப்பதில் தீவிரம் காட்டி வரும் பாஜக, தற்போது புதிய ஆயுதத்தைக் கையிலெடுத்திருக்கிறது.
வரும் மக்களவைத் தேர்தல் மோடிக்கும் - ராகுலுக்கும் இடையேயான போட்டியாகப் பார்க்கப்பட்டு வருகிறது. இந்த நிலையில்தான், இந்தியா கூட்டணியை உடைக்கவும், ராகுல் காந்தி என்ற மிக முக்கியத் தலைவரின் பிம்பத்தை குறைக்கவும் பாஜக மறைமுகமாக வேலை செய்து வருகிறது என்றே கூறப்படுகிறது.
இதற்காக அவர்கள் தற்போது கையிலெடுத்திருப்பது ராகுல் - பிரியங்கா இடையேயான உறவைத்தான். பாஜகவின் எக்ஸ் பக்கத்தில், ராகுல் - பிரியங்கா உறவில் ஏற்பட்டிருக்கும் விரிசல் பற்றி சில கருத்துகளும் அதனை உறுதி செய்யும் வகையில் சில விடியோக்களையும் இணைத்துள்ளது.
அந்த விடியோவுடன் இந்தக் கருத்தும் பதிவு செய்யப்பட்டுள்ளது. அதாவது, ராகுல் காந்திக்கும், பிரியங்காவுக்கும் இடையே உள்ள உறவு, பொதுவான சகோதர, சகோதரிகளுக்கு இடையேயான உறவு அல்ல.
இதையும் படிக்க.. இந்தியாவில் மனித உரிமைகள், பத்திரிகை சுதந்திரம் பற்றி மோடியுடன் பேசினேன்: ஜோ பைடன்
ராகுலை விட பிரியங்கா வேகமானவர் ஆனால் ராகுலின் இசைக்கு ஏற்றபடிதான் கட்சி ஆடுகிறது, சோனியா காந்தியும் முழுமையாக ராகுலுக்குத்தான் ஆதரவை தெரிவிக்கிறார். ஆணவக் கூட்டணியின் சந்திப்பில் இருந்து பிரியங்கா காணாமல் போனதற்கு காரணம் இல்லாமல் இல்லை!
அந்த சகோதரியை தேர்தல் பிரச்சாரத்திற்கு மட்டும் எப்படி பயன்படுத்துகிறார்கள் என்பதை வீடியோவில் பாருங்கள் என்று பதிவிடப்பட்டுள்ளது.
பாஜக வெளியிட்டிருக்கும் விடியோவில், தேர்தல் பிரசாரக் கூட்டத்தின்போது, ராகுல் காந்தி, பிரியங்காவுடன் கைகோர்க்க முன்வந்தார். ஆனால், அதனை பிரியங்கா நிராகத்திருப்பதை பாஜக இங்கே வட்டமிட்டுக் காண்பித்துள்ளது.