இந்தியா கூட்டணியின் முதல் பொதுக்கூட்டம் ரத்து: கமல்நாத்

இந்தியா கூட்டணியின் முதல் பொதுக்கூட்டம் ம.பி.யில் அடுத்த மாதம் நடைபெறும் என்று அறிவிக்கப்பட்ட நிலையில், அது ரத்து செய்யப்பட்டுள்ளதாக மத்தியப் பிரதேச காங்கிரஸ் தலைவர் கமல்நாத் அறிவித்துள்ளார்.

எதிா்க்கட்சிகளின் ‘இந்தியா’ கூட்டணியின் முதல் பொதுக்கூட்டம், மத்திய பிரதேச தலைநகா் போபாலில் அக்டோபர் மாதம் 2ஆம் தேதி நடைபெறும் என்று அறிவிக்கப்பட்டிருந்த நிலையில், இந்த அறிவிப்பு வெளியாகியிருக்கிறது.

தில்லியில் கடந்த புதன்கிழமை நடைபெற்ற ‘இந்தியா’ கூட்டணி ஒருங்கிணைப்புக் குழுவின் முதல் கூட்டத்தில் இந்த முடிவு எடுக்கப்பட்டிருந்தது. 

இதையும் படிக்க.. மகளிா் உரிமைத் தொகையை கபளீகரம் செய்த வங்கிகள்: ரூ.1,000 பறிபோனதால் தவித்த பயனாளிகள்

2024 மக்களவைத் தோ்தலை முன்னிட்டு, காங்கிரஸ், திமுக, திரிணமூல் காங்கிரஸ், ஆம் ஆத்மி, தேசியவாத காங்கிரஸ் உள்ளிட்ட 28 கட்சிகள் ஒருங்கிணைந்து, ‘இந்தியா’ கூட்டணியின்கீழ் செயல்பட்டு வருகின்றன.

மும்பையில் அண்மையில் நடைபெற்ற இக்கூட்டணியின் கூட்டத்தில், 14 போ் கொண்ட ஒருங்கிணைப்புக் குழு அமைக்கப்பட்டது. கூட்டணியில் முடிவெடுக்கும் உயா் அமைப்பான இக்குழுவின் முதல் கூட்டம், தில்லியில் தேசியவாத காங்கிரஸ் தலைவா் சரத் பவாரின் இல்லத்தில் புதன்கிழமை நடைபெற்றது.

யாா்-யாா் பங்கேற்பு?: குழு உறுப்பினா்களான கே.சி.வேணுகோபால் (காங்கிரஸ்), டி.ஆா்.பாலு (திமுக), சரத் பவாா் (தேசியவாத காங்கிரஸ்), ஹேமந்த் சோரன் (ஜாா்க்கண்ட் முக்தி மோா்ச்சா), சஞ்சய் ரெளத் (சிவசேனை-உத்தவ் பிரிவு), தேஜஸ்வி யாதவ் (ராஷ்ட்ரீய ஜனதா தளம்), ராகவ் சத்தா (ஆம் ஆத்மி), ஜாவத் அலி கான் (சமாஜவாதி), லாலன் சிங் (ஐக்கிய ஜனதா தளம்), டி.ராஜா (இந்திய கம்யூனிஸ்ட்), ஒமா் அப்துல்லா (தேசிய மாநாட்டுக் கட்சி), மெஹபூபா முஃப்தி (மக்கள் ஜனநாயக கட்சி) ஆகிய 12 போ் பங்கேற்றனா்.