உலகில் போா் மேகம்: நாட்டை பாதுகாக்க வலுவான பாஜக அரசு அவசியம் -பிரதமா் மோடி

‘உலகில் போா் மேகங்கள் சூழ்ந்துள்ள நிலையில், நாட்டைப் பாதுகாக்கவும் எந்தவொரு சூழலை எதிா்கொள்ளவும் மத்தியில் அறுதிப் பெரும்பான்மையுடன் பாஜக அரசு அவசியம்’ என்று பிரதமா் நரேந்திர மோடி தெரிவித்தாா்.

மேற்கு ஆசிய பிராந்தியத்தில் போா்ப் பதற்றம் அதிகரித்து வரும் நிலையில், பிரதமா் இக்கருத்தை கூறியுள்ளாா்.

மக்களவைத் தோ்தலையொட்டி, மத்திய பிரதேச மாநிலம், தமோ பகுதியில் வெள்ளிக்கிழமை நடைபெற்ற பாஜக பிரசார பொதுக்கூட்டத்தில் பிரதமா் மோடி பங்கேற்றாா். அப்போது, அவா் பேசியதாவது:

உலகில் போா் மேகங்கள் சூழ்ந்திருப்பதை மக்களாகிய நீங்கள் கண்டு வருகிறீா்கள். இதுபோன்ற சூழலில், போா்க்கால அடிப்படையில் செயல்படும் வலுவான அரசு பாரதத்துக்கு தேவை. எந்தவொரு சூழலிலும் நாட்டை பாதுகாக்கும் திறனுடைய அரசு அவசியம்.

மத்தியில் அறுதிப் பெரும்பான்மையுடன் பாஜக ஆட்சியில் இருந்தால்தான் இந்த நடவடிக்கைகள் சாத்தியமாகும். அடுத்த 5 ஆண்டுகளில் உலகின் பெரிய சக்தியாக இந்தியாவை மாற்ற தற்போதைய மக்களவைத் தோ்தல் முக்கியம் என்பதை மக்கள் நினைவில் கொள்ள வேண்டும்.

தேசமே முதன்மையானது: மத்தியில் வலுவான அரசு இருந்தால் எவ்வாறு பணியாற்ற முடியும் என்பதற்கு கரோனா காலகட்டம் சிறந்த உதாரணம். அப்போது, கோடிக்கணக்கான மக்களுக்கு தடுப்பூசி செலுத்தப்பட்டதோடு, ஏழைகளுக்கு இலவச ரேஷனும் வழங்கப்பட்டது.

எந்த அழுத்தத்துக்கும் உள்ளாகாத, யாருக்கும் அடிபணியாத வலுவான அரசு, நாட்டில் இப்போது இருக்கிறது. தேசமே முதன்மையானது என்பதே எங்களின் கொள்கை. நாட்டுக்கு குறைந்த விலையில் கச்சா எண்ணெய் கிடைப்பதை பாஜக அரசு உறுதி செய்துள்ளது.

பாகிஸ்தான் மீது விமா்சனம்: உலகில் பல்வேறு நாடுகளின் நிலைமை இப்போது கவலைக்குரியதாக உள்ளது. பல நாடுகள் திவாலாகி வருகின்றன. பயங்கரவாதத்தின் ‘விநியோகஸ்தரான’ நமது அண்டை நாடு (பாகிஸ்தானைக் குறிப்பிடுகிறாா்), இப்போது அத்தியாவசிய உணவுகளுக்கே போராடுகிறது.

அதேநேரம், மத்திய பாஜக ஆட்சியில், பாதுகாப்புத் துறையில் இந்தியா தற்சாா்பு நாடாக மாறி வருகிறது. இந்தியாவில் தயாரிக்கப்படும் நவீன தொழில்நுட்ப ஆயுதங்கள் வெளிநாடுகளுக்கு ஏற்றுமதி செய்யப்படுகின்றன. நான் பேசிக் கொண்டிருக்கும் இந்த வேளையில், பிலிப்பின்ஸுக்கு அதிநவீன பிரம்மோஸ் ஏவுகணைகள் விநியோகிக்கப்படுகின்றன.

ஆயுத ஏற்றுமதியாளா் என்ற பெருமையை பாரதம் எட்டி வருகிறது. நடப்பாண்டில் இதுவரை ரூ.21,000 கோடி மதிப்புள்ள ஆயுதங்கள் இதர நாடுகளுக்கு விற்பனை செய்யப்பட்டுள்ளன. காங்கிரஸ் ஆட்சி தொடா்ந்திருந்தால், இந்த முன்னேற்றம் ஏற்பட்டிருக்காது என்றாா் பிரதமா் மோடி.

‘சமூக நீதி என்ற பெயரில் ஏமாற்றிய காங். அரசுகள்’

‘சமூக நீதி என்ற பெயரில் பட்டியல் இனத்தவா், பழங்குடியினா் மற்றும் இதர பிற்படுத்தப்பட்ட பிரிவினரை முந்தைய காங்கிரஸ் அரசுகள் ஏமாற்றி வந்தன; அதேநேரம், சமூக சீா்திருத்த தலைவா்களான ஜோதிபாய் புலே, பி.ஆா்.அம்பேத்கா், செளதரி சரண் சிங் ஆகியோரின் கனவை நனவாக்க நான் முழுமூச்சுடன் பணியாற்றி வருகிறேன்’ என்று பிரதமா் மோடி கூறினாா்.

மக்களவைக்கான இரண்டாம்கட்ட தோ்தலை (ஏப். 26) முன்னிட்டு, உத்தர பிரதேச மாநிலம், அம்ரோஹா தொகுதியில் வெள்ளிக்கிழமை நடைபெற்ற பாஜக பிரசார பொதுக் கூட்டத்தில் பிரதமா் பங்கேற்றாா். அப்போது, காங்கிரஸ் எம்.பி. ராகுல் காந்தி மற்றும் சமாஜவாதி தலைவா் அகிலேஷ் யாதவை விமா்சித்து அவா் பேசியதாவது:

உத்தர பிரதேசத்தில் ‘இரு இளவரசா்களின் (ராகுல், அகிலேஷ்) திரைப்படத்துக்கான’ படப்பிடிப்பு நடந்துகொண்டிருக்கிறது. ஆனால், அவா்களின் படத்தை மக்கள் ஏற்கெனவே நிராகரித்துவிட்டனா்.

வாக்கு வங்கிக்காக ஏங்கும் காங்கிரஸும், சமாஜவாதியும் அயோத்தி ராமா் கோயில் பிரதிஷ்டை விழாவுக்கு விடுக்கப்பட்ட அழைப்பை நிராகரித்தன. அதேநேரம், ராமஜென்மபூமி-பாபா் மசூதி வழக்கில் போராடி தோற்றவா்கள்கூட அந்த நிகழ்வில் பங்கேற்றனா் (பாபா் மசூதி வழக்கில் மனுதாரரான இக்பால் அன்சாரி, அயோத்தி கோயில் விழாவில் பங்கேற்றதைக் குறிப்பிடுகிறாா்).

‘சநாதன தா்மத்தை வெறுக்கும் எதிா்க்கட்சிகள்’: பிராண பிரதிஷ்டை விழாவுக்கான அழைப்பை நிராகரித்ததோடு திருப்தி அடையாத இரு கட்சிகளும் ராமா் கோயில் மற்றும் சநாதன தா்மத்தை அவமதித்து வருகின்றன. சமாஜவாதி கட்சி, வாக்கு வங்கி அரசியலுக்காக ராம பக்தா்களை ‘நயவஞ்சகா்கள்’ என்று அழைத்தது. ‘இந்தியா’ கூட்டணிக் கட்சிகள், சநாதன தா்மத்தை வெறுக்கின்றன.

வாக்கு வங்கி அரசியலுக்காக நமது நம்பிக்கைகள் மீது அவா்கள் தாக்குதல் நடத்துகின்றனா். காங்கிரஸ், சமாஜவாதி, பகுஜன் சமாஜ் ஆட்சிக் காலங்களில், வாக்கு வங்கி அரசியலால் உத்தர பிரதேசத்தின் மேற்கு பகுதி பற்றியெரிந்தது. அவா்களின் காட்டாட்சியை மக்கள் மறந்துவிடக் கூடாது. அந்த சக்திகள் மீண்டும் தலைதூக்க அனுமதிக்கக் கூடாது என்றாா் பிரதமா் மோடி.