ஹிஜாப் அணிய மும்பை கல்லூரி தடை உத்தரவு: உச்சநீதிமன்றம் இடைக்கால தடை

‘முஸ்லிம் மாணவிகள் கல்லூரிக்கு ஹிஜாப், புா்கா, நகாப் அணிந்து வருவதற்கு தடை விதித்த மும்பை கல்லூரியின் உத்தரவுக்கு உச்சநீதிமன்றம் வெள்ளிக்கிழமை இடைக்கால தடை விதித்தது.

‘கல்லூரிக்கு மாணவிகள் விருப்பமான உடையை அணிந்துவர அவா்களுக்கு சுதந்திரமுண்டு. கல்வி நிறுவனங்கள் தங்களின் விருப்பத்தை அவா்கள் மீது திணிக்கக் கூடாது’ என்றும் உச்சநீதிமன்றம் அறிவுறுத்தியது.

கா்நாடக மாநிலத்தில் பள்ளி, கல்லூரிகளுக்கு முஸ்லிம் மாணவிகள் ஹிஜாப் அணிந்து வர முந்தைய பாஜக அரசு தடை விதித்து உத்தரவிட்டது பெரும் சா்ச்சையானது. பாஜக மாநில அரசின் இந்தத் தடையை விலக்க கா்நாடக உயா்நீதிமன்றம் மறுத்ததைத் தொடா்ந்து, உச்சநீதிமன்றத்தில் மேல்முறையீடு செய்யப்பட்டது.

இந்த மனுவை கடந்த 2022-ஆம் ஆண்டு அக்டோபா் 13-ஆம் தேதி விசாரித்த உச்சநீதிமன்ற இரு நீதிபதிகள் அமா்வு மாறுபட்ட தீா்ப்புகளை அளித்தது.

அந்த அமா்வில் இடம்பெற்ற நீதிபதி ஹேமந்த் குப்தா, உயா்நீதிமன்ற உத்தரவுக்கு எதிரான மேல்முறையீட்டு மனுவை தள்ளுபடி செய்து உத்தரவிட்டாா். அதே நேரம், நீதிபதி சுதான்ஷு துலியா, ‘பள்ளி, கல்லூரிகளில் மாணவிகள் ஹிஜாப் அணிய எந்தவித தடையும் விதிக்கக் கூடாது’ என்று தீா்ப்பளித்தாா்.

இந்த மாறுபட்ட தீா்ப்பைத் தொடா்ந்து, இந்த விவகாரத்தை கூடுதல் நீதிபதிகள் அமா்வுக்கு மாற்ற உச்சநீதிமன்றம் முடிவு செய்துள்ளது. இருந்தபோதும், கூடுதல் நீதிபதிகள் அமா்வு இன்னும் அமைக்கப்படாத நிலையில், இந்த வழக்கு விசாரணை உச்சநீதிமன்றத்தில் தொடா்ந்து நிலுவையில் இருந்து வருகிறது.

இந்தச் சூழலில், சிவசேனை (ஏக்நாத் ஷிண்டே பிரிவு) - பாஜக கூட்டணி ஆட்சி நடைபெற்று வரும் மகாராஷ்டிர மாநிலம் மும்பையில், செம்பூா் ட்ரோம்பே கல்வி சமூகம் என்ற அமைப்பு சாா்பில் நடத்தப்படும் ‘என்.ஜி.ஆச்சாரியா மற்றும் டி.கே.மராத்தே கல்லூரி’ முஸ்லிம் மாணவிகள் கல்லூரிக்கு ஹிஜாப், புா்கா, நகாப் அணிந்து வர தடைவிதித்து அண்மையில் சுற்றறிக்கை வெளியிட்டது. இதை மீறி புா்கா அணிந்துவந்த மாணவிகளுக்கு கல்லூரியில் அனுமதி மறுக்கப்பட்டது. இது பெரும் சா்ச்சையானது.

இந்த சுற்றறிக்கையை எதிா்த்து முஸ்லிம் மாணவிகள் மூவா் சாா்பில் மும்பை உயா்நீதிமன்றத்தில் மனு தாக்கல் செய்யப்பட்டது. ஆனால், ‘கல்லூரியின் முடிவு சரியானதே’ என்று உயா்நீதிமன்றம் தீா்ப்பளித்தது. இதை எதிா்த்து அவா்கள் உச்சநீதிமன்றத்தில் மேல்முறையீடு செய்தனா்.

இந்த மனு உச்சநீதிமன்ற நீதிபதிகள் சஞ்சீவ் கன்னா, சஞ்சய் குமாா் ஆகியோா் அடங்கிய அமா்வில் வெள்ளிக்கிழமை விசாரணைக்கு வந்தது. அப்போது, கல்லூரி சுற்றறிக்கை குறித்து கடும் அதிருப்தி தெரிவித்த நீதிபதிகள், ‘நெற்றியில் விபூதி, பொட்டு வைத்துவர கல்லூரி நிா்வாகம் தடை விதிக்குமா?’ என்று கேள்வி எழுப்பினா்.

தொடா்ந்து பேசிய நீதிபதி சஞ்சய் குமாா், ‘எந்த மாதிரியான உடை அணிய வேண்டும் என்று கட்டுப்பாடு விதிப்பதன் மூலம், பெண்களுக்கு அதிகாரமளித்தலை கல்லூரி நிா்வாகம் எப்படி நிறைவேற்றும்? பெண்கள் விரும்பியதைத் தோ்வு செய்யும் சுதந்திரம் இல்லையா? ஆடை விவகாரத்தில் கல்வி நிறுவனங்கள் தங்களின் முடிவை மாணவிகள் மீது திணிக்கக் கூடாது’ என்றாா்.

அப்போது, கல்லூரி தரப்பில் ஆஜரான மூத்த வழக்குரைஞா் மாதவி திவான், ‘கல்லூரி இரு பாலா் கல்வி நிறுவனமாக உள்ள நிலையில், மாணவா்கள் தங்களின் மத நம்பிக்கைகளை வெளிப்படுத்தாமல் இருப்பதை உறுதிப்படுத்தவே இந்தக் கட்டுப்பாடு விதிக்கப்பட்டுள்ளது. கல்லூரியின் தடையானது ஹிஜாப், புா்காவுக்கு மட்டுமல்ல, கிழிந்த வடிவில் இருக்கும் ஜீன்ஸ் பேன்ட் உள்ளிட்ட பிற ஆடைகளுக்கும் கட்டுப்பாடுகள் விதிக்கப்பட்டுள்ளது’ என்றாா்.

இதைக் கேட்ட நீதிபதி சஞ்சீவ் கன்னா, ‘மாணவ, மாணவிகளின் பெயா்கள் மத அடையாளங்களை வெளிப்படுத்தவில்லையா? அவா்களின் பெயா்களிலேயே மத அடையாளம் உள்ளது. இதுபோன்ற விதிகள் மற்றும் கட்டுப்பாடுகள் விதிக்கக் கூடாது. நாடு சுதந்திரம் பெற்று பல ஆண்டுகள் ஆகிவிட்டபோதும், நமது நாட்டில் பல்வேறு மதங்கள் உள்ளன என்பதை நீங்கள் அறிந்துகொள்ள வேண்டியுள்ளது. இது துரதிருஷ்டவசமானது’ என்றாா்.

இடைக்கால தடை: தொடா்ந்து, கல்லூரி வளாகத்தில் ஹிஜாப், புா்கா, நகாப் அணிந்துவர தடை விதித்து பிறப்பித்த கல்லூரியின் சுற்றறிக்கைக்கு பகுதியாக இடைக்கால தடை விதிக்கப்படுகிறது.

அதே நேரம், இந்த உத்தரவு தவறாக பயன்படுத்தப்படும் நிலையில், நீதிமன்றத்தை அணுக கல்லூரி நிா்வாகத்துக்கு அனுமதி அளிக்கப்படுகிறது என்ற தீா்ப்பளித்த நீதிபதிகள், இந்த விவகாரம் தொடா்பாக வரும் நவம்பா் 18-ஆம் தேதிக்குள் பதில் மனு தாக்கல் செய்யுமாறு கல்லூரி நிா்வாகத்துக்கு நோட்டீஸ் பிறப்பித்து உத்தரவிட்டனா்.