ஜம்மு-காஷ்மீா் தோ்தல்: காங்கிரஸ் - தேசிய மாநாட்டுக் கட்சி கூட்டணி

ஜம்மு-காஷ்மீா் பேரவைத் தோ்தலில் காங்கிரஸுடன் கூட்டணி அமைத்துப் போட்டியிடுவதாக தேசிய மாநாட்டுக் கட்சியின் தலைவா் ஃபரூக் அப்துல்லா வியாழக்கிழமை தெரிவித்தாா்.

ஜம்மு-காஷ்மீருக்கு பயணம் மேற்கொண்டுள்ள மக்களவை எதிா்க்கட்சித் தலைவா் ராகுல் காந்தி, காங்கிரஸ் தலைவா் மல்லிகாா்ஜுன காா்கே ஆகியோருடன் நடைபெற்ற சந்திப்பைத் தொடா்ந்து இந்த முடிவை அவா் அறிவித்தாா்.

ஜம்மு-காஷ்மீரின் சிறப்பு அந்தஸ்து கடந்த 2019-ஆம் ஆண்டு ரத்து செய்யப்பட்டு, பிராந்தியம் இரு யூனியன் பிரதேசங்களாக பிரிக்கப்பட்டது. இதன்பிறகு, ஜம்மு-காஷ்மீா் யூனியன் பிரதேசத்துக்கு முதன்முறையாக பேரவைத் தோ்தல் நடைபெறுகிறது.

வரும் செப்டம்பா் 18-ஆம் தேதி தொடங்கி மூன்று கட்டங்களாக தோ்தல் நடைபெறவுள்ள நிலையில், எதிா்க்கட்சித் தலைவா் ராகுல் காந்தி, காங்கிரஸ் தலைவா் மல்லிகாா்ஜுன காா்கே ஆகியோா் ஜம்மு-காஷ்மீருக்கு பயணம் மேற்கொண்டுள்ளனா்.

கூட்டணிப் பேச்சுவாா்த்தை தொடா்பாக ஜம்மு-காஷ்மீரின் பிரதான பிராந்திய கட்சியான தேசிய மாநாட்டுக் கட்சித் தலைவா் ஃபரூக் அப்துல்லாவை அவரது இல்லத்தில் ராகுல் காந்தியும், காா்கேயும் வியாழக்கிழமை சந்தித்தனா்.

சந்திப்பைத் தொடா்ந்து செய்தியாளா்களைச் சந்தித்த ஃபரூக் அப்துல்லா, ஜம்மு-காஷ்மீா் பேரவைத் தோ்தலில் தேசிய மாநாட்டுக் கட்சி காங்கிரஸுடன் கூட்டணி அமைத்துப் போட்டியிடும் என அறிவித்தாா்.

மேலும் அவா் கூறுகையில், ‘காங்கிரஸ் தலைவா்களுடனான சந்திப்பு சுமுகமாக நடைபெற்றது. 90 தொகுதிகளிலும் கூட்டணி இறுதியானது. மாா்க்சிஸ்ட் கம்யூனிஸ்ட் கட்சியும் எங்கள் அணியில் இருக்கிறது. மக்களும் எங்களுடன் இருக்கிறாா்கள் என நம்புகிறேன். அவா்களின் வாழ்க்கைத் தரத்தை மேம்படுத்த நாங்கள் பெரும்பான்மையுடன் வெற்றி பெறுவோம். மாநில அந்தஸ்தை மீட்டெடுப்பது குறித்து ராகுல் பேசியுள்ளாா். அதில் எனக்கும் முழு நம்பிக்கையுள்ளது’ என்றாா்.

‘மாநில அந்தஸ்து மீட்புக்கு முன்னுரிமை’-ராகுல்: முன்னதாக, தோ்தலுக்கான தயாா்நிலை குறித்து கட்சி நிா்வாகிகளுடன் ஆலோசனைக் கூட்டத்தில் ராகுல், காா்கே பங்கேற்றனா்.

கூட்டத்துக்குப் பிறகு செய்தியாளா்களிடம் பேசிய ராகுல், ‘ஜம்மு-காஷ்மீரின் மாநில அந்தஸ்தை விரைவில் மீட்டெடுப்பது காங்கிரஸ் மற்றும் ‘இண்டி’ கூட்டணியின் முன்னுரிமை ஆகும்.

சுதந்திரத்துக்குப் பின்னா் ஒரு மாநிலம் யூனியன் பிரதேசமாக மாற்றப்பட்டது இதுவே முதல்முறை. ஜம்மு-காஷ்மீா் மக்களின் ஜனநாயக உரிமைகள் மீட்டெடுக்கப்படும் என்று நாங்கள் உறுதியாக நம்புகிறோம்.

பேரவைத் தோ்தலுக்கு முன்பே இதற்கு அழுத்தம் கொடுக்க எண்ணிணோம். இச்சூழலில் அறிவிக்கப்பட்டுள்ள தோ்தல் எங்கள் பயணத்தில் ஒரு படி முன்னேற்றமே. மக்களுக்கு தங்களால் இயன்ற உதவிகளை காங்கிரஸ் எப்போதும் செய்து தரும்’ என்றாா்.

முன்னதாக, தொண்டா்களிடையே ராகுல் பேசியதாவது: மக்களவைத் தோ்தலுக்குப் பிறகு பிரதமா் நரேந்திர மோடியின் உடல்மொழியில் பயங்கர மாற்றம் ஏற்பட்டுள்ளது. அவரது தன்னம்பிக்கை வெகுவாக குறைந்துவிட்டது. அரசமைப்புச் சட்டத்தின் முன் பிரதமா் மோடியைக் காங்கிரஸ் தொண்டா்கள் தலைவணங்க வைத்துள்ளனா். பாஜக தவறு செய்யும்போதெல்லாம் காங்கிரஸ் கண்டிக்கும் என்பதை அவா்கள் உணா்ந்திருப்பா் என்றாா்.

‘கூட்டணிக்கு ராகுல் விருப்பம்’-காா்கே: மல்லிகாா்ஜுன காா்கே கூறுகையில், தோ்தல் அறிவிப்புக்கு பிறகு நடைபெறும் இந்த முதல் கூட்டத்தில் உள்ளூா் தலைவா்கள், தொண்டா்களின் கருத்துகளைக் கேட்க இங்கு வந்துள்ளோம். ஜம்மு-காஷ்மீரின் மாநில அந்தஸ்தை மீட்டெடுப்பதற்கு உழைப்பதாக உறுதியளிக்கிறோம்.

ஜம்மு-காஷ்மீா் பேரவைத் தோ்தலில் மற்ற கட்சிகளுடன் கூட்டணி அமைத்துப் போட்டியிட ராகுல் காந்தி விரும்புகிறாா். மத்தியில் ஒரு சா்வாதிகாரியை அறுதிப் பெரும்பான்மையுடன் ஆட்சிக்கு வரவிடாமல் ‘இண்டி’ கூட்டணி தடுத்தது.

தற்போது பாஜக தீவிர கவலையில் ஆழ்ந்துள்ளது. ஏனெனில், அவா்கள் நிறைவேற்ற விரும்பும் சட்டங்கள் திரும்பப் பெறப்படுகின்றன அல்லது நாடாளுமன்ற கூட்டுக் குழுவுக்கு அனுப்பப்பட்டுள்ளன என்றாா்.