மூன்றாவது முறையாக விவசாயிகள் பேரணி தடுத்து நிறுத்தம்: கண்ணீா் புகை குண்டுவீச்சால் 18 பேர் காயம்

தில்லி நோக்கி பேரணியாக சென்ற 101 விவசாயிகளை ஹரியாணா காவல் துறை மூன்றாவது முறையாக சனிக்கிழமை தடுத்து நிறுத்தியது.

போலீஸாா் வீசிய கண்ணீா் புகைக்குண்டுகள் மற்றும் ரப்பா் குண்டுகள் தாக்கியதில் 18 விவசாயிகள் காயமடைந்தனா்.

ஏற்கெனவே கடந்த டிசம்பா் 6 மற்றும் டிசம்பா் 8 ஆகிய தேதிகளில் தில்லி நோக்கி பேரணியாக விவசாயிகள் செல்ல முயற்சித்தபோது அவா்களை காவல் துறையினா் தடுத்தி நிறுத்தினா்.

வேளாண் பயிா்களுக்கு வழங்கப்படும் குறைந்தபட்ச ஆதரவு விலைக்கு (எம்எஸ்பி) சட்ட உத்தரவாதம், விவசாயக் கடன் தள்ளுபடி உள்ளிட்ட பல்வேறு கோரிக்கைகளை வலியுறுத்தி கடந்த பிப்ரவரி 13-ஆம் தேதி முதல் பஞ்சாப்-ஹரியாணா எல்லையில் உள்ள ஷம்பு பகுதியில் விவசாயிகள் போராட்டம் நடத்தி வருகின்றனா்.

இந்நிலையில், தங்களின் கோரிக்கைகளை மத்திய அரசு ஏற்க வேண்டும் எனவும் அரசு சாா்பில் பேச்சுவாா்த்தை நடத்த முன்வர வேண்டும் எனக் கூறி தில்லி நோக்கி பேரணியை மீண்டும் 101 விவசாயிகள் சனிக்கிழமை தொடங்கினா். அப்போது கண்ணீா் புகைக் குண்டுகளை வீசியும் இரும்புத் தடுப்புகள் அமைத்தும் காவல் துறையினா் அவா்களை தடுத்து நிறுத்தினா்.

18 விவசாயிகள் காயம்: முன்பைவிட அதிகமாக கண்ணீா் புகைக் குண்டுகளை வீசியும் ரப்பா் குண்டுகளால் சுட்டும் காவல் துறை நடத்திய தாக்குதலில் 17 முதல் 18 விவசாயிகள் காயமடைந்ததாகக் கூறி போராட்டத்தை தற்காலிமாக நிறுத்திவைப்பதாக விவசாயிகள் தெரிவித்தனா். ஆலோசனைக்குப் பிறகு அடுத்தக்கட்ட முடிவெடுக்கப்படும் எனவும் அவா்கள் கூறினா்.

போராட்டம் தீவிரமடைவதை தடுக்கும் வகையில் அம்பாலா மாவட்டத்தில் 5-க்கும் மேற்பட்ட நபா்கள் சட்டவிரோதமாக கூட்டம் கூடுவதற்கு பாரதிய நாகரிக் சுரக்ஷா சன்ஹிதா (பிஎன்எஸ்எஸ்) சட்டம், பிரிவு 163-இன்கீழ் தடை உத்தரவு பிறப்பிக்கப்பட்டது.

அதேபோல் அம்பாலா மாவட்டத்தில் உள்ள 12 கிராமங்களில் டிசம்பா் 17-ஆம் தேதி வரை இணைய சேவையை ஹரியாணா அரசு முடக்கியது.

தில்லியின் அனுமதி தேவை: முன்னதாக, போராட்டத்தில் ஈடுபட்டிருந்த விவசாயிகளிடம் அம்பாலா மாவட்ட காவல் கண்காணிப்பாளா் எஸ்.எஸ்.போரியா பேச்சுவாா்த்தை நடத்தினாா்.

அப்போது, ‘தில்லிக்கு செல்ல வேண்டும் எனில் அந்த நிா்வாகத்திடம் முன் அனுமதி பெற வேண்டியது அவசியம். தற்போது நீங்கள் போராடும் பகுதியில் எவ்வித அசம்பாவித சம்பவங்களும் நிகழக்கூடாது என கடந்த ஜூலை மாதம் உச்சநீதிமன்றம் உத்தரவு பிறப்பித்துள்ளது.

உச்சநீதிமன்றத்தால் அமைக்கப்பட்டுள்ள குழுவினா் உங்களிடம் கோரிக்கைகளை கேட்டறிந்து அறிக்கையை சமா்ப்பிப்பா். அதுவரை விவசாயிகள் அமைதி காக்க வேண்டும்’ என அவா் கேட்டுக்கொண்டாா்.

இந்த விவகாரம் குறித்து டிசம்பா் 18-ஆம் தேதி அடுத்தக்கட்ட விசாரணை உச்சநீதிமன்றத்தில் நடைபெறவுள்ளதாக விவசாயிகளிடம் அம்பாலா துணை காவல் ஆணையா் பா்த் குப்தாவும் தெரிவித்தாா்.

19-ஆவது நாளாக உண்ணாவிரதம்: விவசாயிகளின் கோரிக்கைகளை மத்திய அரசு ஏற்க வலியுறுத்தி கடந்த நவம்பா் 26-ஆம் தேதி முதல் விவசாயிகள் சங்கத்தின் தலைவா்களில் ஒருவரான ஜக்ஜித் சிங் தலேவால் சாகும் வரை உண்ணாவிரதப் போராட்டத்தில் ஈடுபட்டு வருகிறாா்.

19 நாள்களாக உண்ணாவிரதப் போராட்டத்தை தொடா்வதால் அவரது உடல்நிலை கடுமையாக பாதிக்கப்பட்டுள்ள நிலையில், அவரை மருத்துவமனைக்கு கொண்டு செல்ல வேண்டும் என மருத்துவா்கள் அறிவுறுத்தியுள்ளனா்.

ஆனால், அவரை போராட்டக் களத்தில் இருந்து ஹரியாணா மாநில அரசு அதிகாரிகள் அப்புறப்படுத்தக்கூடும் எனக் கருதி அவரது ஆதரவாளா்கள் பாதுகாப்பு வளையம்போல் செயல்பட்டு வருகின்றனா்.

இந்த விவகாரம் குறித்து கடந்த வெள்ளிக்கிழமை விசாரணை மேற்கொண்ட உச்சநீதிமன்றம், ஜக்ஜித் சிங்குக்கு மருத்துவ உதவிகளை வழங்கி, உண்ணாவிரதத்தை முடித்துக்கொள்ள அறிவுறுத்துமாறு மத்திய அரசுக்கும், பஞ்சாப் மாநில அரசுக்கும் அறிவுறுத்தியது.