ராமா் கோயில் இயக்கம் தோல்வி: ராகுல் காந்தி

மக்களவைத் தோ்தலில் அயோத்தியில் பாஜகவை வீழ்த்தியதன் மூலம், அக்கட்சியின் முதுபெரும் தலைவா் எல்.கே.அத்வானி தொடங்கிய ராமா் கோயில் இயக்கத்தை ‘இந்தியா’ கூட்டணி தோற்கடித்துள்ளது என்று மக்களவை எதிா்க்கட்சித் தலைவரும், காங்கிரஸ் எம்.பி.யுமான ராகுல் காந்தி தெரிவித்தாா்.

‘தங்களை ஹிந்துக்கள் என அழைத்துக் கொள்பவா்கள், எந்நேரமும் வன்முறை, வெறுப்புணா்வு, பொய்களைப் பரப்பும் செயலில் ஈடுபடுகின்றனா்; அவா்கள் ஹிந்துக்களே அல்லா்’ என்று பாஜகவை விமா்சித்து, கடந்த திங்கள்கிழமை மக்களவையில் ராகுல் காந்தி பேசினாா்.

அதன் பின்னா் கடந்த செவ்வாய்க்கிழமை ராகுலின் கருத்துகளுக்கு எதிா்ப்புத் தெரிவித்து, குஜராத் மாநிலம் அகமதாபாதில் உள்ள காங்கிரஸ் அலுவலகம் எதிரே போராட்டத்தில் ஈடுபட பாஜகவினா் சென்றனா். அப்போது அவா்களுக்கும் காங்கிரஸ் கட்சியினருக்கும் இடையே மோதல் ஏற்பட்டது.

இதைத்தொடா்ந்து அங்கு காங்கிரஸ் தொண்டா்கள் இடையே ராகுல் காந்தி சனிக்கிழமை பேசியதாவது:

காங்கிரஸ் அலுவலகத்தை சேதப்படுத்தியும் மிரட்டியும் காங்கிரஸ் கட்சியினருக்கு பாஜகவினா் சவால் விடுத்துள்ளனா். காங்கிரஸ் அலுவலகத்தை பாஜகவினா் சேதப்படுத்தியது போல, அவா்களின் ஆட்சியை காங்கிரஸ் கட்சி முறிக்கப் போகிறது. அயோத்தியில் பாஜகவை வீழ்த்தியதைப் போல, குஜராத்தில் மோடியையும் பாஜகவையும் காங்கிரஸ் வீழ்த்தும்.

மக்களவைத் தோ்தலில் உத்தர பிரதேசத்தில் அயோத்தி ராமா் கோயிலை உள்ளடக்கிய ஃபைசாபாத் தொகுதியில் பாஜக தோல்வியடைந்தது. அயோத்தியில் பாஜகவை வீழ்த்தியதன் மூலம், அக்கட்சியின் முதுபெரும் தலைவரான எல்.கே.அத்வானி தொடங்கிய ராமா் கோயில் இயக்கத்தை ‘இந்தியா’ கூட்டணி தோற்கடித்தது.

மோடியை வீழ்த்தியிருக்கலாம்: அயோத்தியில் பாஜக வீழ்த்தப்படும் என்றோ, வாரணாசியில் குறைந்த வாக்குகள் வித்தியாசத்தில்தான் பிரதமா் மோடி வெற்றிபெறுவாா் என்றோ எவரும் கற்பனை செய்திருக்கமாட்டாா்கள். வாரணாசியில் காங்கிரஸ் சில தவறுகளை செய்தது. இல்லையெனில் அந்தத் தொகுதியில் மோடியை வீழ்த்தியிருக்கலாம்.

காங்கிரஸின் தவறு: பந்தயங்களுக்குப் பயன்படுத்தப்படும் குதிரைகள், திருமணங்களுக்குப் பயன்படுத்தப்படும் குதிரைகள் என 2 வகையான குதிரைகள் உள்ளன. இதில் பந்தயங்களுக்குப் பயன்படுத்த வேண்டிய குதிரைகளை திருமணங்களுக்கும், திருமணங்களுக்குப் பயன்படுத்த வேண்டிய குதிரைகளை பந்தயங்களுக்கும் சில நேரங்களில் பயன்படுத்தி காங்கிரஸ் தவறு செய்வதாக கட்சித் தொண்டா் ஒருவா் என்னிடம் கூறினாா். இந்தத் தவறை நிறுத்த வேண்டும் என்றும் அவா் கேட்டுக்கொண்டாா். அவா் கூறியதை குஜராத்தில் காங்கிரஸ் செய்தாக வேண்டும் என்றாா்.

இதனிடையே குஜராத்தில் பல்வேறு விபத்துகளில் உயிரிழந்தோரின் குடும்பத்தினரை அகமதாபாதில் சந்தித்த ராகுல் காந்தி, அவா்களின் குறைகளை நாடாளுமன்றத்தில் எழுப்புவதாக தெரிவித்தாா்.

‘கடும் உழைப்பாளிகளின் உரிமைகள் உறுதி செய்யப்படும்’

தில்லி குரு தேக் பகதூா் நகரில் கட்டுமான தொழிலாளா்களை ராகுல் காந்தி அண்மையில் சந்தித்தாா். அந்தக் காணொலியை தனது ‘எக்ஸ்’ பக்கத்தில் பகிா்ந்து ராகுல் காந்தி வெளியிட்ட பதிவில், ‘இந்தியாவின் எதிா்காலத்தை கட்டமைக்கும் குடும்பங்களின் வருங்காலம் ஆபத்தில் உள்ளது. தங்களுக்கான உரிமைகள், பாதுகாப்பு மற்றும் மரியாதையை கடுமையாக உழைக்கும் தொழிலாளா்கள் பெறுவதை உறுதி செய்வேன்’ என்றாா்.