மாநில கட்சிகளின் வருவாய்: ரூ.737 கோடியுடன் பிஆா்எஸ் முதலிடம்; திமுக மூன்றாமிடம்

கடந்த 2022-23-ஆம் நிதியாண்டில் அதிக வருவாய் கொண்ட மாநில கட்சிகள் வரிசையில் ரூ.737.67 கோடியுடன் பாரத ராஷ்டிர சமிதி (பிஆா்எஸ்) முதலிடத்தில் உள்ளது.

மேற்கு வங்கத்தில் ஆளும் திரிணமூல் காங்கிரஸ் இரண்டாம் இடத்திலும் (ரூ.333.45 கோடி), தமிழகத்தில் ஆளும் திமுக மூன்றாமிடத்திலும் (ரூ.214.35 கோடி) உள்ளன.

அந்த நிதியாண்டில் அதிகம் செலவிட்ட மாநில கட்சிகளில் ரூ.181.18 கோடியுடன் திரிணமூல் காங்கிரஸ் முதலிடத்தில் உள்ளது. ரூ.52.62 கோடி செலவு செய்து திமுக நான்காம் இடத்தில் உள்ளது.

நாட்டில் மொத்தமுள்ள 57 மாநில கட்சிகளில் 39 கட்சிகளின் நிதி நிலைமையை (2022-23) பகுப்பாய்வு செய்து, ஜனநாயக சீா்திருத்தங்களுக்கான சங்கம் (ஏடிஆா்) என்ற அமைப்பு அறிக்கை வெளியிட்டுள்ளது. அதில் கூறப்பட்டுள்ளதாவது:

2022-23-ஆம் நிதியாண்டில் 39 மாநில கட்சிகளின் மொத்த வருவாய் ரூ.1,740 கோடியாகும். இதில் ரூ.737.67 கோடி வருவாயுடன் (42.38%) பிஆா்எஸ் முதலிடத்தில் உள்ளது.

ரூ.333.45 கோடி வருவாயுடன் (19.16%) திரிணமூல் காங்கிரஸ் இரண்டாமிடத்திலும், ரூ.214.35 கோடி வருவாயுடன் (12.32%) திமுக மூன்றாமிடத்திலும், ரூ.181 கோடி வருவாயுடன் (10.40%) பிஜு ஜனதா தளம் (பிஜேடி) நான்காமிடத்திலும், ரூ.74.78 கோடி வருவாயுடன் (4.30%) ஒய்எஸ்ஆா் காங்கிரஸ் ஐந்தாமிடத்திலும் உள்ளன.

இந்த 5 கட்சிகளின் மொத்த வருவாய் ரூ.1,541.32 கோடி (88.56%). இதில் ரூ.1,285 கோடி தோ்தல் நிதி பத்திரங்கள் மூலம் கிடைக்கப் பெற்றுள்ளது.

2022-23-ஆம் நிதியாண்டில் மாநில கட்சிகள் செலவிட்ட மொத்த தொகை ரூ.481 கோடியாகும். இதில் ரூ.181.18 கோடி செலவுசெய்து (37.66%) திரிணமூல் காங்கிரஸ் முதலிடத்தில் உள்ளது. ரூ.79.32 கோடி செலவுடன் (16.49%) ஒய்எஸ்ஆா் காங்கிரஸ், ரூ.57.47 கோடி செலவுடன் (11.94%) பிஆா்எஸ், ரூ.52.62 கோடி செலவுடன் (10.94%) திமுக, ரூ.31.41 கோடி செலவுடன் (6.53%) சமாஜவாதி ஆகிய கட்சிகள் அடுத்தடுத்த இடங்களில் உள்ளன.

ரூ.737 கோடி வருமானம் பெற்றபோதிலும், அதில் ரூ.680 கோடியை பிஆா்எஸ் செலவிடவில்லை. இதேபோல், பிஜு ஜனதா தளம் ரூ.171 கோடி, திமுக ரூ.161.72 கோடியை செலவிடவில்லை.

2023, அக்டோபா் 31-ஆம் தேதியுடன் தங்களது வருடாந்திர தணிக்கை கணக்குகளை சமா்ப்பிக்க வேண்டுமென்ற தோ்தல் ஆணையத்தின் கெடுவை 16 கட்சிகள் மட்டுமே பின்பற்றியுள்ளன. பிற கட்சிகள் 3 முதல் 150 நாள்கள் வரை தாமதமாக இக்கணக்குகளை சமா்ப்பித்துள்ளன.

தன்னாா்வ நன்கொடைகளே கட்சிகளின் வருவாய்க்கு முக்கிய ஆதாரமாக காட்டப்பட்டுள்ளது. தங்களது வருவாயைவிட அதிகம் செலவிட்டுள்ளதாக 20 கட்சிகள் தெரிவித்துள்ளன என்று அந்த அறிக்கையில் குறிப்பிடப்பட்டுள்ளது.

முதல் பத்து மாநில கட்சிகள்

மாநில கட்சிகள் வருவாய் - செலவு (கோடியில்)

பிஆா்எஸ் ரூ.737.67 - ரூ.57.47

திரிணமூல் காங்கிரஸ் ரூ.333.45 - ரூ.181.18

திமுக ரூ.214.35 - ரூ.52.62

பிஜேடி ரூ.181 - ரூ. 9.98

ஒய்எஸ்ஆா் காங்கிரஸ் ரூ.74.78 - ரூ. 79.32

தெலுங்கு தேசம் ரூ.63.99 - ரூ.12.31

சமாஜவாதி ரூ.32.95 - ரூ.31.41

அதிமுக ரூ.20.21 - ரூ.6.88

ஐக்கிய ஜனதா தளம் ரூ.16.85 - ரூ.5.07

இந்திய கம்யூனிஸ்ட் ரூ.15.32 - ரூ. 12.45

பிற 29 கட்சிகள் ரூ.49.82 - 32.29