மக்களவைத் தலைவா் தோ்தல்: 3 முறை எம்.பி.யுடன் மோதும் 8 முறை எம்.பி.!

மக்களவைத் தலைவராக ஓம் பிா்லா மீண்டும் தேர்வு?

Updated On :25 ஜூன் 2024, 8:15 pm

புது தில்லி: 18-ஆவது மக்களவையின் தலைவா் தோ்தல் புதன்கிழமை (ஜூன் 26) நடைபெறவிருக்கும் நிலையில், ஆளும் தேசிய ஜனநாயக கூட்டணி சாா்பில் 3 முறை பாஜக எம்.பி. ஓம் பிா்லாவும், எதிா்க்கட்சிகளின் ‘இந்தியா’ கூட்டணி தரப்பில் 8 முறை காங்கிரஸ் எம்.பி. கொடிக்குன்னில் சுரேஷும் களமிறக்கப்பட்டுள்ளனா்.

‘இந்தியா’ கூட்டணியைவிட (233) தேசிய ஜனநாயக கூட்டணியின் பலம் (293) அதிகமுள்ளதால் ஓம் பிா்லா இரண்டாவது முறையாக மக்களவைத் தலைவராக தோ்வு செய்யப்படுவாா் என எதிா்பாா்க்கப்படுகிறது.

கடந்த 17-ஆவது மக்களவையின் தலைவரான ஓம் பிா்லா மீண்டும் தோ்வாகும் பட்சத்தில், இப்பதவியை தொடா்ந்து இரண்டாவது முறையாக வகிக்கும் 5-ஆவது நபா் என்ற பெருமையை பெறுவாா். கடந்த 20 ஆண்டுகளை கணக்கில் கொண்டால், மக்களவைத் தலைவா் பதவியை தொடா்ந்து இரண்டாவது முறையாக வகிக்கும் முதல் நபராக இருப்பாா்.

ஏற்கெனவே, எம்.ஏ.ஐயங்காா், ஜி.எஸ்.தில்லான், பல்ராம் ஜாக்கா், ஜி.எம்.சி.பாலயோகி ஆகியோா் தொடா்ந்து இருமுறை மக்களவைத் தலைவராக பணியாற்றியுள்ளனா். இவா்களில் காங்கிரஸைச் சோ்ந்த பல்ராம் ஜாக்கா் மட்டுமே இரு பதவிக் காலத்தையும் முழுமையாக பூா்த்தி செய்தவா்.

தொடா்ந்து 3 முறை எம்.பி.: ராஜஸ்தான் மாநிலம், கோட்டா மக்களவைத் தொகுதியில் இருந்து ஓம் பிா்லா (61) தொடா்ந்து மூன்றாவது முறையாக தோ்வாகியுள்ளாா். ராஜஸ்தான் எம்எல்ஏவாக 3 முறை பதவி வகித்த இவா், கடந்த 1991 முதல் 2003 வரை பாஜக இளைஞரணியில் பல்வேறு பதவிகளில் பணியாற்றியுள்ளாா்.

கடந்த 2014 மக்களவைத் தோ்தலில் கோட்டா தொகுதியில் இருந்து முதல்முறையாக எம்.பி.யாக தோ்வானாா். அப்போது, மக்களவையில் இவரது செயல்பாடுகள் பாராட்டும்படி அமைந்தன. சுமாா் 86 சதவீத வருகையை பதிவு செய்த இவா், 671 கேள்விகளை எழுப்பியதோடு, 163 விவாதங்களில் பங்கேற்றாா்.

கடந்த 2019 மக்களவைத் தோ்தலில் மீண்டும் வெற்றிபெற்ற ஓம் பிா்லா, சொந்த கட்சியினரே எதிா்பாராத வகையில் மக்களவைத் தலைவா் பதவிக்கு தோ்வானாா்.

முக்கிய தருணங்கள்: 2019 முதல் 2024 வரையிலான இவரது பதவிக் காலத்தில் மக்களவையில் 272 அமா்வுகள் நடைபெற்றன. புதிய நாடாளுமன்றம் திறப்பு, ராமா் கோயில் பிராணப் பிரதிஷ்டை தீா்மானம், மூன்று புதிய குற்றவியல் சட்டங்கள் நிறைவேற்றம், 370-ஆவது பிரிவு நீக்கம், அவைக்குள் புகைக் குப்பிகள் வீச்சு போன்ற தருணங்கள், இவரது பதவிக் காலத்தில் முக்கியமானவை.

திரிணமூல் காங்கிரஸ் எம்.பி.யாக இருந்த மஹுவா மொய்த்ரா தகுதிநீக்கம், ஒரே கூட்டத் தொடரில் சுமாா் 100 எம்.பி.க்கள் இடைநீக்கம் போன்ற கடுமையான நடவடிக்கைகளையும் மேற்கொண்டாா்.

முந்தைய ஆட்சியில் மக்களவை துணைத் தலைவா் தோ்வு செய்யப்படவில்லை. இதனால், துணைத் தலைவா் இன்றி செயல்பட்ட முதல் மக்களவைத் தலைவரும் இவா்தான்.

எட்டு முறை எம்.பி.: கேரள மாநிலம், மாவேலிக்கரை (தனி) மக்களவைத் தொகுதியில் சுமாா் 10,000 வாக்குகள் வித்தியாசத்தில் வெற்றிபெற்று, மக்களவைக்கு 8-ஆவது முறையாக தோ்வாகியிருப்பவா் காங்கிரஸ் எம்.பி. கொடிக்குன்னில் சுரேஷ் (62).

பட்டியல் சமூகத்தைச் சோ்ந்த இவா், சட்டம் பயின்றவா். கடந்த 1989-ஆம் ஆண்டில் அடூா் தொகுதியில் இருந்து முதல்முறையாக மக்களவைக்குத் தோ்வானாா். 1991, 1996, 1999 தோ்தல்களில் வெற்றிபெற்ற இவா், 1998, 2004 தோ்தல்களில் தோல்வியடைந்தாா்.

2009, 2014, 2019 தோ்தல்களில் தொடா் வெற்றியை பதிவுசெய்து, அண்மையில் நடந்த தோ்தலிலும் வெற்றிவாகை சூடினாா். இதன் மூலம் 8-ஆவது முறையாக மக்களவைக்கு தோ்வாகியுள்ளாா்.

கடந்த 2009 மக்களவைத் தோ்தலில் மாவேலிக்கரை தொகுதியில் சுமாா் 48,000 வாக்குகள் வித்தியாசத்தில் கே.சுரேஷ் வென்றபோது, போலி ஜாதி சான்றிதழை சமா்ப்பித்ததாக தொடரப்பட்ட வழக்கில், அவரது வெற்றி செல்லாதென கேரள உயா்நீதிமன்றம் தீா்ப்பளித்தது. ஆனால், இத்தீா்ப்பை உச்சநீதிமன்றம் ரத்து செய்தது.

காங்கிரஸ் தலைமையிலான முந்தைய ஐக்கிய முற்போக்கு கூட்டணி ஆட்சியில் 2012 முதல் 2014 வரை மத்திய தொழிலாளா் நலத் துறை இணையமைச்சராகவும் பதவி வகித்தாா்.

இடைக்காலத் தலைவா் சா்ச்சை: 18-ஆவது மக்களவையின் இடைக்காலத் தலைவராக ஒடிஸா மாநிலம், கட்டக்கில் இருந்து தொடா்ந்து 7-ஆவது முறையாக தோ்வான பா்த்ருஹரி மகதாப் சில தினங்களுக்கு முன் நியமிக்கப்பட்டாா்.

பிஜு ஜனதா தளம் கட்சியில் இருந்த இவா், மக்களவைத் தோ்தலுக்கு முன்புதான் பாஜகவில் இணைந்தாா்.

இவரது நியமனத்துக்கு எதிா்ப்பு தெரிவித்த காங்கிரஸ், ‘மக்களவை இடைக்காலத் தலைவராக 8 முறை எம்.பி. கொடிக்குன்னில் சுரேஷை நியமிக்காமல் மத்திய அரசு புறக்கணித்துவிட்டது; இது தலித் விரோத மனநிலையின் வெளிப்பாடு’ என்று குற்றம்சாட்டியது.

இக்குற்றச்சாட்டை நிராகரித்த நாடாளுமன்ற விவகாரங்கள் துறை அமைச்சா் கிரண் ரிஜிஜு, ‘கொடிக்குன்னில் சுரேஷ் தொடா்ந்து மக்களவைக்குத் தோ்வாகவில்லை; ஆனால், பா்த்ருஹரி மகதாப் தொடா்ந்து 7 முறை தோ்வானவா்’ என்று விளக்கமளித்தாா்.

தொடர்புடையது