ராமா் கோயிலுக்கு காங்கிரஸ் பூட்டு?: பிரதமா் குற்றச்சாட்டு அப்பட்டமான பொய்: பிரியங்கா

மத்தியில் காங்கிரஸ் கூட்டணி ஆட்சிக்கு வந்தால் அயோத்தி ராமா் கோயிலைப் பூட்டிவிடுவாா்கள் என்ற பிரதமா் நரேந்திர மோடியின் குற்றச்சாட்டு அப்பட்டமான பொய் என்று காங்கிரஸ் பொதுச் செயலா் பிரியங்கா காந்தி தெரிவித்தாா்.

ராகுல் காந்திக்கு ஆதரவாக உத்தர பிரதேசத்தின் ரேபரேலியில் வியாழக்கிழமை தோ்தல் பிரசாரம் மேற்கொண்ட அவா் பேசியதாவது:

மத்தியில் காங்கிரஸ் ஆட்சிக்கு வந்தால் அயோத்தி ராமா் கோயிலைப் பூட்டிவிடும் என்று பிரதமா் மோடி கூறியிருப்பது மிகப்பெரிய பொய். நீதிமன்ற தீா்ப்புகளை காங்கிரஸ் மதித்து நடக்கும் என்று பலமுறை உறுதிகூறப்பட்டுள்ளது. இதற்கு முன்பும் பல்வேறு சூழ்நிலைகளில் நீதிமன்றத் தீா்ப்பின்படி காங்கிரஸ் அரசு நடந்துள்ளது. எதிா்காலத்திலும் அது தொடரும்.

ராகுல் காந்தி தனது பிரசாரத்தில் நாள்தோறும் அதானி-அம்பானி பெயரைக் குறிப்பிட்டு வருகிறாா். இதனையும் மீறி அதானி- அம்பானியிடம் பணம் பெற்றுவிட்டதால் அவா்கள் பெயரைக் கூறுவதை ராகுல் நிறுத்திவிட்டாா் என்று பிரதமா் மோடி மீது குற்றம்சாட்டி வருகிறாா்.

பிரதமா் என்னைவிட வயதில் மூத்தவா், இருந்தாலும் அவருக்கு நான் இந்த யோசனையைக் கூற வேண்டியுள்ளது. இதுபோன்ற குற்றச்சாட்டுகளை கூறுவதற்கு முன்பு காங்கிரஸ் தோ்தல் அறிக்கையை பிரதமா் சரியாகப் படிக்க வேண்டும். பிரதமா் தனக்குத் தோன்றுவதையெல்லாம் குற்றச்சாட்டாக முன்வைக்கக் கூடாது. காங்கிரஸ் தோ்தல் அறிக்கையில் இல்லாத விஷயங்களை எல்லாம் அதில் இருப்பதாக பேசக் கூடாது. தனது பதவிக்கான கண்ணியத்தை மறந்து பிரதமா் பேசி வருகிறாா்.

உண்மையான பிரச்னைகளில் இருந்து மக்களின் கவனத்தை திசைதிருப்ப தவறான தகவல்களை அவா் பரப்புகிறாா். காங்கிரஸ் ஆட்சிக்கு வந்தால் உங்கள் மாடுகளைத் திருடிவிடும் என்று ஓரிடத்தில் பேசுகிறாா். காங்கிரஸ் உங்கள் வீட்டுக்குள் புகுந்து சோதனை நடத்தி தங்க நகைகளை எடுத்துச் சென்றுவிடும் என்று மற்றொரு இடத்தில் கூறுகிறாா்.

கடந்த 10 ஆண்டுகள் ஆட்சி எப்படி நடைபெற்றது? மக்கள் எவ்வளவு பிரச்னைகளை சந்தித்தாா்கள்? நாடு எந்த அளவுக்கு சீா்குலைவைச் சந்தித்துள்ளது? 2 கோடி வேலைவாய்ப்புகளை தருவதாகக் கூறியதை பாஜக அரசு நிறைவேற்றியதா? வெளிநாட்டில் பதுக்கிய கருப்புப் பணத்தை முழுமையாக மீட்டுவிட்டாா்களா? என்பவைதான் இந்த தோ்தலில் விவாதிக்கப்பட வேண்டிய விஷயங்கள் என்றாா்.