உ.பி.யின் மதரஸா கல்விச் சட்டம் செல்லும்: உச்சநீதிமன்றம்

உத்தரப் பிரதேச மாநிலத்தின் மதரஸா கல்வி வாரிய சட்டம் செல்லுபடியாகும் என உச்சநீதிமன்றம் இன்று (நவ. 5) உத்தரவிட்டுள்ளது.

மேலும், மதரஸா கல்வி வாரிய சட்டம் அரசியல் சாசனத்துக்கு எதிரானதாக இல்லை என்றும் குறிப்பிட்டுள்ளது.

இந்த வழக்கைத் தலைமை நீதிபதி டி.ஒய். சந்திரசூட் தலைமையிலான நீதிபதிகள் ஜே.பி. பர்திவாலா, மனோஜ் மிஸ்ரா ஆகியோர் அடங்கிய அமர்வு விசாரித்துத் தீர்ப்பு வழங்கியுள்ளது.

மதரஸா கல்வி வாரிய சட்டம் 2004, மதச்சார்பின்மை விதிமுறைகளை மீறுவதால் இது அரசியல் சாசனத்துக்கு எதிரானதாக இருப்பதாகக் கூறி அலகாபாத் உயர்நீதிமன்றம் இச்சட்டத்தை மார்ச் 22ஆம் தேதி ரத்து செய்திருந்தது. மேலும், மதரஸா (முஸ்லிம் மாணவர்கள்) மாணவர்களை முறையான பள்ளிக்கல்வி முறைக்கு மாற்றுமாறு மாநில அரசுக்கு உத்தரவிட்டிருந்தது.

இதனை எதிர்த்து மதரஸா பள்ளிகள் சார்பிலும், அப்பள்ளி ஆசிரியர்களின் சார்பிலும் உச்சநீதிமன்றத்தில் மனுத்தாக்கல் செய்யப்பட்டது. இந்த மனுவின் மீது விசாரணை நடைபெற்று வந்தநிலையில், உச்சநீதிமன்றம் இன்று தீர்ப்பு வழங்கியுள்ளது.

மதரஸா கல்விச் சட்டம் செல்லும்

மதச்சார்பின்மையின் அடிப்படையை மதரஸா கல்வி சட்டம் மீறுவதாக அலகாபாத் நீதிமன்றம் கூறியது தவறு.

வாரியத்தின் கீழ் செயல்படும் மதரஸாக்களில் கல்வியின் தரத்தை மதரஸா கல்வி வாரிய சட்டம் ஒழுங்குப்படுத்துகிறது.

மாணவர்களை நல்வழிப்படுத்தி சமூகத்தின் ஓர் அங்கமாக இயங்கச் செய்யும் மாநில அரசின் கடமையுடன் மதரஸா கல்வி வாரிய சட்டம் ஒத்துப்போகிறது.

மதரஸாக்களில் 12ம் வகுப்புக்கு மேல் அளிக்கப்படும் ஃபாசில், கமில் பட்டங்கள் மட்டுமே யு.ஜி.சி சட்டங்களுடன் முரண்படுகிறது.

எனினும் மதரஸா கல்விச் சட்டம் சிறுபான்மையினர் பாதுகாப்புக்கு உதவுகிறது. கல்வியுடன் சில மதச் சடங்குகள் கற்றுக்கொடுக்கப்படுவதால் மதரஸாக்களை அரசியலமைப்புக்குப் புறம்பானதாகக் கருத முடியாது என உச்சநீதிமன்றம் குறிப்பிட்டுள்ளது.

2004ஆம் ஆண்டு சமாஜவாதி கட்சி தலைமையிலான உத்தரப் பிரதேச அரசு, மதரஸா கல்வி வாரிய சட்டத்தைக் கொண்டுவந்தது குறிப்பிடத்தக்கது.

இதையும் படிக்க | அனைத்து தனியார் சொத்துக்களையும் அரசால் கையகப்படுத்த முடியாது: உச்ச நீதிமன்றம்