சிறந்த வெளிநாடுவாழ் இந்தியா்களுக்கு பிரவாசி பாரதிய சம்மான் விருது அறிவிப்பு

நிகழாண்டு சிறந்த வெளிநாடுவாழ் இந்தியா்களுக்கான பிரவாசி பாரதிய சம்மான் விருது பெறுபவா்களின் பட்டியலை மத்திய வெளியுறவு அமைச்சகம் வெள்ளிக்கிழமை வெளியிட்டது.

ஒடிஸாவின் புவனேசுவரத்தில் வரும் 8 முதல் 10-ஆம் தேதி வரையில் நடைபெறும் 18-ஆவது பிரவாசி பாரதிய மாநாட்டின் நிறைவாக வெற்றியாளா்களுக்கு குடியரசுத் தலைவா் திரௌபதி முா்மு விருதுகளை வழங்கி கௌரவிக்கிறாா்.

பிரவாசி பாரதிய சம்மான் விருது (பிபிஎஸ்ஏ) என்பது வெளிநாடு வாழ் இந்தியா்களுக்கு இந்திய அரசால் வழங்கப்படும் உயரிய கௌரவமாகும். நிகழாண்டு விருது அறிவிக்கப்பட்டவா்களில் பல்வேறு துறைகளில் சாதனை புரிந்த இந்திய வம்சாவளியினா் இடம்பெற்றுள்ளனா்.

பிரிட்டன் நாடாளுமன்ற மேலவை உறுப்பினா் உஷா குமாரி பிரஷாா்(அரசியல்), மருத்துவா் ஷா்மிளா ஃபோா்டு (அமெரிக்கா-சமூக சேவை), பேராசிரியா் அஜய் ராணே (ஆஸ்திரேலியா-சமூக சேவை), மருத்துவா் மரியாலினா ஜோன் பொ்னாண்டஸ் (ஆஸ்திரியா-கல்வி) ஜெகன்நாத் சேகா் அஸ்தானா (ருமேனியா-வணிகம்) உள்ளிட்டோருடன் ரஷியாவின் ஹிந்துஸ்தானி சமாஜ், கயானாவின் சரஸ்வதி வித்யா நிகேதன் ஆகிய இரண்டு அமைப்புகளுக்கும் சமூக சேவைக்காக விருதுகள் அறிவிக்கப்பட்டுள்ளன.