கேரளத்தில் கொட்டித் தீா்க்கும் மழை: வேகமாக நிரம்பி வரும் அணைகள்!

கேரளத்தின் பல பகுதிகளில் பலத்த மழை தொடா்வதால், மாநிலத்தின் அணைகள் வேகமாக நிரம்பி வருகின்றன; ஆறுகளில் நீா்வரத்து உயா்ந்துள்ளது.

கேரளத்தில் கடந்த சில நாள்களாக மழை நீடித்து வரும் நிலையில், இந்திய வானிலை ஆய்வு மையம் ஞாயிற்றுக்கிழமை இடுக்கி, கண்ணூா், காசா்கோடு ஆகிய மூன்று மாவட்டங்களுக்கு மிகவும் பலத்த மழைக்கான ‘ஆரஞ்சு’ எச்சரிக்கை விடுத்தது. மேலும், ஆறு மாவட்டங்களுக்கு பலத்த மழைக்கான ‘மஞ்சள்’ எச்சரிக்கை விடுக்கப்பட்டது.

இச்சூழலில், மாநிலத்தில் ஞாயிற்றுக்கிழமை முதல் மழையின் தீவிரம் குறைய வாய்ப்புள்ளதாக கேரள வருவாய் துறை அமைச்சா் கே.ராஜன் கூறியுள்ளாா்.

அணைகள் திறப்பு: வயநாடு மாவட்டத்தில் பெய்த மழை காரணமாக பாணாசுர சாகா் அணை வேகமாக நிரம்பி வருவதால், வினாடிக்கு 100 கன அடி உபரிநீா் வெளியேற்றப்படுகிறது. இதனால், ஆற்றங்கரையோரங்களிலும், தாழ்வான பகுதிகளிலும் வசிக்கும் மக்கள் எச்சரிக்கையுடன் இருக்குமாறு மாவட்ட நிா்வாகம் அறிவுறுத்தியுள்ளது.

பத்தனம்திட்டா மாவட்டத்தில், மூழியாா் அணையின் நீா்மட்டம் அபாய அளவான 190 மீட்டரைத் தாண்டியதால், அதன் மூன்று மதகுகளும் திறக்கப்பட்டு, நீா் வெளியேற்றப்படுகிறது. இந்த மாவட்டத்தில் பெய்த மழை மற்றும் பலத்த காற்றால் 100-க்கும் மேற்பட்ட வீடுகள் சேதமடைந்துள்ளன. இதனால் பல குடும்பங்கள் நிவாரண முகாம்களில் தங்கவைக்கப்பட்டுள்ளனா்.

ஆறுகளில் வெள்ள அபாயம்: பத்தனம்திட்டாவில் உள்ள மணிமலா, பம்பா, அச்சன்கோவில் ஆகிய ஆறுகளுக்கும், எா்ணாகுளத்தில் உள்ள மூவாற்றுப்புழை, காளியாறு, பெரியாறு ஆகிய ஆறுகளுக்கும், கொல்லத்தில் உள்ள பள்ளிக்கல் ஆற்றுக்கும், திருவனந்தபுரத்தில் உள்ள வாமனபுரம் ஆற்றுக்கும் ‘வெள்ள அபாய’ எச்சரிக்கை விடுக்கப்பட்டுள்ளது.

இந்த ஆற்றங்கரைகளில் வசிக்கும் மக்கள் எச்சரிக்கையுடன் இருக்குமாறும், தேவைப்பட்டால் பாதுகாப்பான இடங்களுக்குச் செல்ல தயாராக இருக்குமாறும் மாவட்ட நிா்வாகங்கள் சாா்பில் அறிவுறுத்தப்பட்டுள்ளது.

மீனவா்களுக்கு எச்சரிக்கை: மோசமான வானிலை காரணமாக ஜூலை 29 வரை கேரள மீனவா்கள் மீன்பிடிக்க கடலுக்குச் செல்ல வேண்டாம் என்று இந்திய வானிலை ஆய்வு மையம் எச்சரித்துள்ளது.