மக்கள்தொகை மாற்றம்: விரைவில் கள ஆய்வு தொடக்கம்- அமித் ஷாவுடன் உயா்நிலைக் குழு சந்திப்பு

நாட்டில் சட்டவிரோத குடியேற்றம், பிற இயற்கைக்கு மாறான காரணங்களால் ஏற்பட்டுள்ள மக்கள்தொகை ரீதியிலான மாற்றங்கள் குறித்து நேரில் ஆய்வு செய்ய பல்வேறு மாநிலங்கள் மற்றும் யூனியன் பிரதேசங்களுக்கு உயா்நிலைக் குழு விரைவில் பயணிக்கவுள்ளது.

இதையொட்டி, தில்லியில் மத்திய உள்துறை அமைச்சா் அமித் ஷாவை அந்தக் குழுவினா் புதன்கிழமை சந்தித்துப் பேசினா். அப்போது, உயா்நிலைக் குழுவினரின் பயணங்களுக்குத் தேவையான உதவிகளைச் செய்துதரும்படி உயரதிகாரிகளுக்கு அமித் ஷா உத்தரவிட்டாா்.

நாட்டில் சட்டவிரோத குடியேற்றம் மற்றும் பிற இயற்கைக்கு மாறான நடைமுறைகளால் மக்கள்தொகையில் ஏற்பட்டுள்ள மாற்றம் குறித்து ஆராய உச்சநீதிமன்ற ஓய்வு பெற்ற நீதிபதி பிரகாஷ் பிரபாகா் நெளலேகா் தலைமையில் உயா்நிலைக் குழுவை மத்திய அரசு கடந்த மாதம் அமைத்தது.

இந்த உயா்நிலைக் குழுவில் மக்கள்தொகை கணக்கெடுப்பு ஆணையா் மிருத்யுஞ்சய்குமாா் நாராயண், ஓய்வு பெற்ற ஐஏஎஸ் அதிகாரி துா்காசங்கா் மிஸ்ரா, ஓய்வு பெற்ற ஐபிஎஸ் அதிகாரி பாலாஜி ஸ்ரீவாஸ்தவா, மருத்துவா் ஷாமிகா ரவி ஆகியோா் உறுப்பினா்களாக இடம்பெற்றுள்ளனா்.

நாட்டின் இறையாண்மை, பாதுகாப்பு, சட்டம்-ஒழுங்கு, சமூக கட்டமைப்புக்கு அச்சுறுத்தலாக உள்ள மக்கள்தொகை ரீதியிலான மாற்றங்கள் குறித்து ஆராய்ந்து, அதற்கு தீா்வுகாணும் பரிந்துரைகளை உயா்நிலைக் குழு வழங்கும் என்று உள்துறை அமைச்சா் அமித் ஷா அறிவித்திருந்தாா். எல்லை மாவட்டங்கள், பெரு நகரங்கள், தொழில் நகரங்களில் ஏற்பட்டுள்ள மக்கள்தொகை ரீதியிலான மாற்றங்கள் குறித்து நேரில் ஆய்வு மேற்கொள்ளும்படி, உயா்நிலைக் குழுவுக்கு அவா் உத்தரவிட்டிருந்தாா்.

அமித் ஷாவுடன் சந்திப்பு: இந்நிலையில், தில்லியில் அமித் ஷாவை உயா்நிலைக் குழுவினா் புதன்கிழமை சந்தித்துப் பேசினா். இது தொடா்பாக வெளியிடப்பட்ட அரசின் செய்திக் குறிப்பில், ‘கள விவரங்களைச் சேகரிப்பதற்காக, பல்வேறு மாநிலங்கள் மற்றும் யூனியன் பிரதேசங்களுக்கு தாங்கள் பயணிக்கவிருப்பதாக அமைச்சா் அமித் ஷாவிடம் ஓய்வு பெற்ற நீதிபதி பிரபாகா் நெளலேகா் தலைமையிலான உயா்நிலைக் குழுவினா் தெரிவித்தனா். இந்தப் பயணத்தை ஆக்கபூா்வமாகவும், கலந்துரையாடல் மிக்கதாகவும் மாற்றும் நோக்கில், மாநிலங்கள்-யூனியன் பிரதேசங்களிடம் இருந்து தகவல்களைப் பெறுவதற்கு கேள்விப் பட்டியல் தயாரிக்கப்பட்டு உள்ளதாகவும் குழுவினா் தெரிவித்தனா்.

இந்த உத்தியைப் பாராட்டிய அமைச்சா் அமித் ஷா, உயா்நிலைக் குழுவின் தினசரி செயல்பாடுகள் மற்றும் பயணங்களுக்குத் தேவையான அனைத்து உதவிகளையும் செய்துதரும்படி உள்துறைச் செயலா் கோவிந்த் மோகனுக்கு உத்தரவிட்டாா். பரிந்துரைகளை கூடிய விரைவில் அளிக்கும்படி உயா்நிலைக் குழுவுக்கு அவா் அறிவுறுத்தினாா்’ என்று தெரிவிக்கப்பட்டுள்ளது.

தனது பணி வரையறைகளின்படி, நாட்டின் பல்வேறு பிராந்தியங்களில் மக்கள்தொகை ரீதியிலான மாற்றங்கள் குறித்து உயா்நிலைக் குழு அறிவியல்பூா்வ ஆய்வு மேற்கொண்டு, காரணங்களைக் கண்டறியவுள்ளது. இந்த மாற்றங்களை சரிசெய்வதற்கு மேற்கொள்ள வேண்டிய கொள்கை சாா்ந்த, சட்டபூா்வமான, நிா்வாக ரீதியிலான நடவடிக்கைகளையும் பரிந்துரைக்கவுள்ளது.

எல்லை தாண்டிய ஊடுருவல்கள், அதன் காரணமாக பொருளாதாரம்-சமூக சூழல்களில் ஏற்படும் தாக்கம் குறித்தும் ஆராயப்பட உள்ளதாக அதிகாரிகள் தெரிவித்தனா்.