விமான நிலையத்தில் காத்திருந்தாரா பிரதமர் மோடி? யாருக்காக??

பிரதமர் நரேந்திர மோடி, சர்வதேச யோகா நாளில் பங்கேற்றுவிட்டு, கொல்கத்தாவிலிருந்து தில்லி விமான நிலையம் வந்த நிலையில், அவர் 45 நிமிடங்கள் வெளியே செல்லாமல் அங்கேயே காத்திருந்ததாகத் தகவல்கள் வெளியாகியுள்ளன.

ஞாயிற்றுக்கிழமை பிற்பகல் கொல்கத்தாவிலிருந்து தில்லி வந்தார் பிரதமர் நரேந்திர மோடி. அவர் அப்போது விமான நிலையத்திலிருந்து வெளியே வந்து பிரதமர் அலுவலகம் அல்லது பிரதமல் இல்லம் திரும்பும்போது போக்குவரத்து பாதிக்கப்பட்டு அதனால் நீட் மாணவர்களுக்கு ஏதேனும் சிக்கல் ஏற்படக்கூடாது என்று கருதினார்.

கொல்கத்தாவிலிருந்து வந்த விமானம் தில்லியில் பிற்பகல் 1.15 மணிக்கு தரையிறங்கியது. ஆனால், மதியம் 1.30 மணி வரை நீட் தேர்வு மையத்துக்குள் மாணவர்கள் அனுமதிக்கப்படுவார்கள் என்று அவகாசம் ஒதுக்கப்பட்டிருந்தது. தேர்வு பிற்பகல் 2 மணிக்குத் தொடங்க இருந்தது.

எனவே, பிரதமர் மோடியின் பாதுகாப்பு வாகனங்களால் எங்கேனும் போக்குவரத்து நெரிசல் ஏற்பட்டு, நீட் தேர்வுக்கு செல்லும் மாணவர்கள் யாரும் பாதிக்கப்படக் கூடாது என்பதால், நீட் தேர்வு மையங்களின் கதவுகள் 2 மணிக்கு மூடப்பட்டதை உறுதி செய்துகொண்ட பிறகே, பிரதமர் விமான நிலையத்திலிருந்து புறப்பட்டுள்ளார்.

இது குறித்து மத்திய இணையமைச்சர் சுகந்தா மஜும்தார் தன்னுடைய சமூக வலைத்தளப் பக்கத்தில், பிரதமர் நரேந்திர மோடியைப் பொருத்தவரை பதவி என்பது பொறுப்பு. நீட் மாணவர்களுக்காக, விமான நிலையத்தில் காத்திருந்தது என்பது, குடிமக்களே முக்கியம் என்பதை காட்டுகிறது என்று பதிவிட்டுள்ளார்.