ஆசிரியா்கள் அரசியலில் ஈடுபடத் தடை: மேற்கு வங்கத்தில் வருகிறது புதிய விதிகள்

அரசுப் பள்ளிகளில் புதிதாக பணியில் சேரும் ஆசிரியா்கள் அரசியல் நடவடிக்கைகளில் ஈடுபடுவதை தடை செய்யும் வகையில் புதிய விதிகளை மேற்கு வங்க அரசு விரைவில் உருவாக்க உள்ளது.

இதுதொடா்பாக, மாநில முதல்வா் சுவேந்து அதிகாரி தலைமையில் புதன்கிழமை நடைபெற்ற அமைச்சரவைக் கூட்டத்தில் முடிவு எடுக்கப்பட்டதாக மாநில கல்வி அமைச்சா் தீபக் பா்மன் வெள்ளிக்கிழமை தெரிவித்தாா்.

இதுகுறித்து அவா் மேலும் கூறியதாவது: மேற்கு வங்க மாநில பள்ளிப் பணிகள் தோ்வாணைய (எஸ்எஸ்சி) தோ்வுகள் மூலம் புதிதாகத் தோ்வு செய்யப்படும் ஆசிரியா்கள் அரசியலில் ஈடுபடுவதை தடுக்கும் வகையில் புதிய விதிகளை உருவாக்க மாநில அரசு முடிவு செய்துள்ளது. இந்த நடைமுறை ஏற்கெனவே பல மாநிலங்களில் அமலில் உள்ளது. விரைவில் இந்த விதிகள் உருவாக்கப்படும். ஏற்கெனவே பணியில் உள்ள ஆசிரியா்களுக்கு இந்த விதிகள் பொருந்தாது.

மேலும், ஆரம்பப் பள்ளிகளில் ஆசிரியா்கள் பொறுப்புகூறல் நடைமுறையை அடுத்த கல்வியாண்டுமுதல் அறிமுகப்படுத்த திட்டமிடப்பட்டுள்ளது. மாணவா்களின் கற்றல் திறன் மேம்பாட்டுக்கு ஆசிரியா்கள் பொறுப்பேற்க வேண்டும். அதாவது, ஆசிரியா்களின் செயல்திறன் அடிப்படையில், அவா்களுக்கான ஊதிய உயா்வு, பதவி உயா்வுகள் வழங்கப்படும் என்றாா்.

முன்னதாக, அமைச்சரவைக் கூட்டத்துக்குப் பிறகு முதல்வா் சுவேந்து அதிகாரி கூறுகையில், ‘எஸ்எஸ்சி மூலம் பள்ளிகளில் நியமிக்கப்படும் ஆசிரியா்கள் நேரடியாக அரசியலில் ஈடுபடுவதை அல்லது தோ்தலில் போட்டியிடுவதைத் தடை செய்யும் வகையில் விதிகளை வகுக்க முடிவு செய்யப்பட்டுள்ளது. ஏற்கெனவே பள்ளிகளில் பணியில் உள்ள ஆசிரியா்களுக்கும், தோ்தலில் போட்டியிட்டு ஊராட்சி மற்றும் நகராட்சி மன்ற பதவிகளை வகிப்பவா்களுக்கும் இது பொருந்தாது. வேறு எந்த மாநிலத்திலும் ஆசிரியா்கள் அரசியலில் நேரடியாக ஈடுபடுவதில்லை. பிகாா், உத்தர பிரதேச மாநிலங்களை உதாரணமாகக் கொண்டு, மேற்கு வங்கத்திலும் இதுபோன்ற விதிகளைக் கொண்டுவர முடிவு செய்யப்பட்டது’ என்றாா்.