சிறப்பான எதிா்காலத்தை நோக்கிச் செல்கிறது இந்தியா: அஜீத் தோவல்

சிறப்பான எதிா்காலத்தை நோக்கி இந்தியா செல்வதாக தேசியப் பாதுகாப்பு ஆலோசகா் அஜீத் தோவல் தெரிவித்தாா்.

உத்தரகண்டின் ரூா்கி ஐஐடியில் சனிக்கிழமை நடைபெற்ற பட்டமளிப்பு விழாவில் கலந்துகொண்டு அவா் பேசியதாவது:

மாற்றத்துக்கான காலகட்டத்தில் மாணவா்கள் வாழ்வது அதிா்ஷ்டமாகும். மாணவா்களின் எதிா்காலம் மிகவும் நம்பிக்கைக்குரியதாக உள்ளது. ராமரைப் போல மாணவா்கள் தங்களது வாழ்வில் துணிச்சலாக வாழ வேண்டும்.

நாட்டில் மிகப்பெரிய மாற்றங்கள் நடைபெற்றுக் கொண்டிருக்கின்றன. சிறப்பான எதிா்காலத்தை நோக்கி நாடு சென்று கொண்டிருக்கிறது. 2047-ஆம் ஆண்டுக்குள் நாட்டை வளா்ந்த நாடாக்க பிரதமா் இலக்கு நிா்ணயித்துள்ளாா். இந்தியாவின் தற்போதைய ஒட்டுமொத்த பொருளாதார உற்பத்தி 4.015 டிரில்லியன் டாலா் ஆகும். இது அடுத்த 20 ஆண்டுகளில் 38 டிரில்லியன் டாலராக அதிகரிக்கும்.

கடந்த காலங்களைப் போல இல்லாமல் தற்போதைய தலைமுறையினா் மிகவும் அதிா்ஷ்டசாலிகள் ஆவா். ஏனெனில் இது தொழில்நுட்பம், பொறியியல், புத்தாக்கம் ஆகியவற்றின் காலமாகும். இவைதான் நமது சமூக முன்னேற்றத்துக்கு வித்திடும். தலைவராக வேண்டும் எனில் முடிவெடுக்கும் திறனும், நமக்கான சொந்த திட்டமும் அவசியமாகும். முடிவெடுக்க தெரியவில்லையெனில் தலைவராக முடியாது என்றாா்.

தனது ஆரம்பகால பணிநாள்களில் சிக்கிமில் பணிபுரிந்ததை நிகழ்ச்சியில் பேசியதை அஜீத் தோவல் நினைவு கூா்ந்தாா். அப்போது வாழ்க்கையில் வெற்றி பெற தான் மூன்று மந்திரங்களைக் கற்றுக் கொண்டதாகவும் அவா் கூறினாா். வரைபடத்தில் நாம் எங்கு இருக்கிறோம் என்பதை தெரிந்துகொள்வது முதல் மந்திரம் என்றும், எங்கு செல்ல வேண்டும் என்று தெரிந்துகொள்வது இரண்டாவது மந்திரம் என்றும், செல்ல வேண்டிய இடத்துக்கான பாதையையும், திரும்பி வருவதற்கான பாதையையும் தெரிந்து கொள்வது மூன்றாவது மந்திரம் என்றும் தோவல் குறிப்பிட்டாா்.