திருச்சி மேற்கு தொகுதி இடைத்தேர்தல்: ஜெயலலிதா இன்று பிரசாரம்

திருச்சி:  திருச்சி மேற்கு தொகுதி இடைத்தேர்தல் பிரசாரத்திற்காக, முதல்-அமைச்சர் ஜெயலலிதா இன்று திருச்சி செல்கிறார். வேனில் சென்று, ஒரே நாளில் 7 இடங்களில் அவர் பேசுகிறார்.

திருச்சி மேற்கு தொகுதிக்கு இடைத்தேர்தல் வருகிற 13-ந் தேதி (வியாழக்கிழமை) நடைபெறுகிறது. இடைத்தேர்தலில் அ.தி.மு.க. சார்பில் எம்.பரஞ்சோதியும், தி.மு.க. சார்பில் முன்னாள் அமைச்சர் கே.என்.நேருவும் போட்டியிடுகிறார்கள். மேலும் இந்திய ஜனநாயக கட்சி, அகில இந்திய உழவர் உழைப்பாளர் கட்சி, மக்கள் சக்தி ஆகிய கட்சி வேட்பாளர்களுடன், 12 சுயேச்சைகள் உள்பட தேர்தல் களத்தில் மொத்தம் 16 பேர் உள்ளனர்.

தேர்தல் பிரசாரம் 11-ந் தேதி மாலை 5 மணியுடன் முடிவடைய இருப்பதால் இறுதி கட்ட பிரசாரத்தில் அரசியல் தலைவர்கள் பம்பரமாக சுழன்று தங்கள் கட்சி வேட்பாளர்களுக்கு ஆதரவு திரட்டி வருகிறார்கள். முதல்-அமைச்சரும், அ.தி.மு.க. பொதுச்செயலாளருமான ஜெயலலிதா அ.தி.மு.க. வேட்பாளர் பரஞ்சோதியை ஆதரித்து திருச்சியில் இன்று பிரசாரம் செய்கிறார்.

இதற்காக சென்னையில் இருந்து இன்று பிற்பகல் 3.15 மணிக்கு விமானம் மூலம் திருச்சி செல்லும் முதல்-அமைச்சர் ஜெயலலிதாவுக்கு விமான நிலையத்தில் உற்சாக வரவேற்பு அளிக்கப்படுகிறது, பிரசாரத்தை முடித்துவிட்டு இன்று இரவு 9 மணியளவில் சென்னை திரும்புகிறார்.